Ez 2 - Chuj San Sebastian Bible

Yawtnb'il Ezequiel yuj Dios

¹ 'Ix yaln 'ayn 'ixtic: Ach 'anma', q'uen̈ wa'an to 'ay tas 'oj wal 'ayach, xchi.

² Wanto yaln jun chi 'ayin, ax xwab'ni 'ix 'och Yespíritu Dios 'ayin, 'ix 'och yip woc, in q'ue wan lin̈an.

³ 'Ix yaln 'ixtc 'ayin: Ach 'anma', an tzach in checb't 'a eb' et israelal. A jun tzo'n̈ 'anma cha, caw wal pit eb', 'ix 'och eb' 'ajc'ojlal 'ayin. 'Icha wal yutjnac sb'a eb' e mam eyichm 'a pecti', 'ixta tz'ajch pax eb' 'ajc'ojlal 'ayn ticnec.

⁴ An tzach in checb't 'a eb' 'anma caw pit sjolom, eb' caw tzatz snab'en. Tzal 'a eb' 'ixtic: 'Ixtc wal xyutj Jehová Cajlil yaln eyu'uj, xa chi 'a eb'.

⁵ Lemb'il ma'oj scha eb' yab' 'ayach, yujto caw wal pit eb', palta 'oj yojcoc 'el eb' to 'ayc' jun in checb' 'a scal eb'.

⁶ Ach 'anma', man̈ ach xiw yuj tas 'oj yal eb' 'ayach, wach'xam 'oj yoych sb'a eb' 'aych 'icha te q'ui'ix, mto 'icha to scal no sinan 'aych 'ec' tzela, man̈ ach xiw xon yuj tas 'oj yal eb' 'ayach, yujto caw pit xon eb'.

⁷ 'Oj al in paxti tic 'a eb', toxn̈ej 'oj scha eb' yab'i', mto ma'ay, yujto caw pit eb'.

⁸ Palta ach xo tic, chaj ab' tas tzwala, man̈ pitc tzotj a b'a 'icha eb' cha. C'aw a ti', ax a c'uxn tas 'oj wac' 'ayach, xchi 'ayin.

⁹ Ax xwilni 'ay jun c'ab' xjaw 'a wojltac, 'ix cot b'achn 'ayn yet' jun ch'an̈ un̈ chulb'ilb'ec'an.

¹⁰ 'Ix xuyn 'at jun ch'an̈ un̈ chi 'a wojltac, tz'ib'b'il jun un̈ chi 'a schapaq'uil, ax tas tz'ib'b'il 'a ch'an̈, atn yab'xil cusc'ojlal, yailal yet' 'el-l 'aw.