Ez 19 - Chuj San Sebastian Bible

Cusc'ojlal 'a eb' sreyl Israel

¹ Ach 'anma', b'itnej jun b'it yic cusc'ojlal tic 'a yib'n̈ eb' sreyl chon̈b' Israel, tzaln 'ixtic:

² A 'a jun 'el 'ay jun no nun león x'ajx can 'och 'a scal no mam león. Ax 'a scal no mam león cha, ata sq'uib'tzej no yune'.

³ 'Ix q'uib' jun no 'unn cha, caw wal jeln x'aj no'. Scuyn sb'a no sayn schib'ej, ax x'aji, 'anma syam no schib'joc.

⁴ 'Ix yab'n jun tzo'n̈ nacion̈ yab'xil no', yuj cha, sb'on eb' sch'an̈ ya'al. 'Ix ya'n ganar eb' scan no 'a yojol. 'Ix ya'ch eb' ch'oc 'a 'a, sjucn 'at eb' 'a Egipto.

⁵ A yic xyiln no nun león cha, to ma'ix 'el'ch 'icha tas 'aych yipc sc'ojl no', 'ix sq'uib'tzan no junx yune', caw jeln 'ix 'aj junx no cha.

⁶ A yic x'och no quelmal, 'ix c'och no 'a scal e no mam león cha. 'Ix scuyn sb'a no syamn schib'ej, ax x'aji, 'anma syam pax no schib'joc.

⁷ 'Ix laj smac' 'ejm lan̈chjoc no jun tzo'n̈ cuartel, til wal chon̈b' xyac' juwc 'el no', 'ix juw 'el pax sat lum lum yu'uj. A yic tz'el yaw no', caw wal tzxiw smasnil 'anma yu'uj.

⁸ Xlajw cha, 'ix 'och eb' nacion̈ chi 'ajc'ojlal 'a no', atn eb' 'ay 'a sla'nil cha. 'Ix sb'on eb' sch'an̈ ya'al, ax x'aji, 'ix can no quelm león chi 'a yojol, 'ixta x'aj syamchj yuj eb' 'ajc'ojl cha.

⁹ Xya'ch eb' ch'oc 'a 'a, smacn 'och eb' 'a yol jaula, xyi'n 'at eb' 'a win sreyl Babilonia, axta xya'ch eb' 'a preso. 'Ixta xyutj eb' sec man̈xtzac 'ab'x yel yaw 'a lum jolmctac witz yic chon̈b' Israel. (A tzyal 'el'ch jun 'ab'x tic atn snun eb' sreyl chon̈b' Israel.)

¹⁰ A 'e nun chi ex rey, lajn pax 'icha junc te snun uva 'awb'il 'a sti a', til wal sat tzyac'a, caw niwquil tz'aji, til wal swol, yujto 'ay a a chi 'aj 'awb'il.

¹¹ Caw wal ch'ijmtac x'aj eb' te sc'ab', ax te x'och sc'occhoc eb' rey, yel xo wal xq'uib' te si'mb'il. 'Ix 'ec' stel 'a yib'n̈ jun tzo'n̈ te niwc te', caw wal 'ay xo smay yilx yuj ste'il yet' pax yuj te sc'ab' 'ix q'uib'l cha.

¹² Palta 'ix to'x chan̈ te yuj yowl sc'ojl Dios. 'Ix sma'n wecchjoc sb'a te yem 'a sat lu'um. Ax jun 'ic' xcot 'a stojlal 'aj tzq'uel c'u, a 'ix ma'n tacjoc, 'ix pucl te sat. A eb' te sc'ab' cha, 'ix tacj eb' te', xlajw cha, 'ix 'ajx tz'a eb' te'.

¹³ Ax ticnec, ata xcob' 'awxc pax te 'a lum cusltac lu'um, 'a 'aj may xon a a'.

¹⁴ A eb' te sc'ab' cha, 'aych can c'ac' 'a eb' te', yuj cha, a yic tzcob' wolnc te', ax jun c'ac' chi tzn̈usn pax te swol chi yet' te sat cha. Man̈x 'a te sc'ab' chi wach' yoch sc'occhoc eb' rey, xa chi, xchi Dios 'ayn an Ezequiel in tic. (A jun b'it tic, yic cusc'ojlal. A yic 'ay cusc'ojlal ata smoj sb'itnaxi.)