Ez 18 - Chuj San Sebastian Bible

A mach tz'och smul, yowlal tzchami

¹ 'Ix yaln pax Jehová 'ayn 'ixtic:

² ¿Tas yuj an̈ja yalx jun tzo'n̈ paxti tzyal eb' 'anma 'ixtc 'a scal chon̈b' Israel? A eb' mamb'il, 'ix laj slo eb' te paj uva, ax eb' 'unnab'il, a eb' xcomn cus ye, xchi eb'.

³ An Jehová Yajl in, an tzwal 'ixtic: Man̈x 'a wal b'a'n̈ 'oj yal eb' jun paxti tic 'a scal chon̈b' Israel.

⁴ A eb' 'anma', wic eb' smasnil, wic win mamb'il yet' win 'unnab'il, a mach tz'och smul, tojln̈ej schami.

⁵ A mach tojl snab'en, wach' ton tas tzb'o'o:

⁶ Man̈ comnoc tzwa yet' eb' 'anma tz'at wac 'a lum jolmctac witz 'aj 'ay jun tzo'n̈ yechl comn dios yic eb' yit israelal; matz b'o 'ajmulal yet' yistzil yit wincal, man̈ comnoc tz'och 'a eb' 'ix 'ix 'aj stiempoal yel a a'.

⁷ May mach tzcomn 'ixtej, a mach 'ay sb'oc 'a 'a, tzyac' meltzjoc tas 'aycn yuj sb'oc cha. May 'aj tz'och 'elc'al; a eb' tz'och swejel tzyac' tas tzc'ux eb', tzpichn eb' 'anma may spichul.

⁸ May 'aj tzyac' tumn majnil yic tzc'ann yune'; may mach tzyixtej, tojl tzyutj sb'on yaj eb' 'anma 'ay yowal.

⁹ Tzb'eylb'ej in checnb'il, yiclum tzyutj sb'a 'a tas tzwala. Yuj stojlal snab'en cha, najtl 'oj yila'. An Jehová Yajl in, an tzwala.

¹⁰ Palta q'uinloc a junc yunnal jun winc cha, 'elc'um mto miln 'anma tz'aji.

¹¹ Wach'xam a win mamb'il cha, ma'ix sb'o jun tzo'n̈ tic, palta ax win 'unnab'il tz'at win wac yet' eb' 'anma 'a jolmctac witz, mto tzb'o win 'ajmulal yet' yistzil junc xo mach.

¹² Tzyixtj win eb' meb'a 'anma', tzyel'j win eb', matz yac' meltzj tas tzyactjcan junc mach yuj tas tzmajnj 'a winac, a 'a jun tzo'n̈ yechl comn dios 'aj tzya'ch snab'en, a tas yajb'entac a tzb'o'o.

¹³ Tzyac' tumn majnil, tzc'ann yune q'uen tumn cha. A junc winc 'ixta sb'eyb'al cha, man̈ najtloc 'oj yila', yujto yajb'entac tas tzb'o'o, yuj cha, mun tzyij cot chaml 'a yib'an̈.

¹⁴ Palta q'uinloc 'ay junc yunnal jun winc cha, tzyila tas smul jun smam chi tzya'chi, palta man̈oc jun tzo'n̈ chi tznib'j sb'o';

¹⁵ tzyal 'el'chi, matz nib'j tz'at sb'a wac yet' eb' 'anma chi 'a lum jolmctac witz, matz ya'ch pax snab'en 'a jun tzo'n̈ yechl comn dios 'ayc' 'a scal eb' yit israelal, matz comn b'oj 'ajmulal yet' yistzil junc xo yit wincal.

¹⁶ May mach tzcomn 'ixtej; toto 'ay mach tz'och majn 'a 'a, may tas tzc'an yuj smajnub'al junc cha. May tas tzyelq'uej. A eb' 'ay swejel, tzyac' tas tzc'ux eb', tzya'n 'och spichl eb' may spichul.

¹⁷ Matz yixtj eb' meb'a', matz c'an yune q'uen majn tumin. A yico' to tzyiclj tas tzwala, tzb'eylb'an in checnb'il. A jun mach 'ixta tzb'o cha, ma'oj cham yuj smul smam, to 'oj najtxb'oc sq'uinal.

¹⁸ A smam cha, 'ixtm 'anma winac, caw wal 'elc'um, maysch'olnil tas sb'o 'a scal yit chon̈ab', yuj cha, mun 'oj cham yuj smul cha.

¹⁹ Toto 'ay eb' 'oj c'anb'noc 'ayx 'ixtic: ¿Tas yuj man̈ locnoc win 'unnab'il tic xcham yuj smul smam cha? toto schi eb', tzeyalni to a win 'unnab'il cha, tojl tas tzb'o'o. Yiclum tzyutj sb'a 'a in ley, tzb'eylb'an in checnb'il, yuj cha, tznajtxb'i sq'uinal.

²⁰ A mach tz'och smul, a tzchami. A win 'unnab'il, matz tac' scham win yuj smul smam. 'Ixta pax win mamb'il cha, matz tac' scham win yuj smul yunnal. A mach tojl tas tzb'o'o, wach' spac 'oj scha'; ax mach maysch'olnil tas tzb'o'o, maysch'olnil tas 'oj scha sb'a yet'oc.

'Oj b'eyc'ojlwoc Dios 'a stojlal

²¹ Toto 'ay mach maysch'olnil sb'eyb'al, palta tznib'j tzyactjcan jun maysch'olnil cha, syiclc cab' in ley, tzb'eylb'an tas tojol, a jun 'anma cha, ma'oj cham muc'uc.

²² Smasnil tas maysch'olnil xlaj sb'o', man̈x 'oj in na coti, 'oj wac' sq'uinal yujto tojl tas tzb'o'o.

²³ An Jehová Yajl in, an tzwal 'ixtic: Matz in nib'j to tzcham eb' maysch'olnil sb'eyb'al, palta to tzin nib'j to tzjel eb' sb'eyb'al cha, sec 'ay sq'uinl eb'.

²⁴ Palta a mach tojl xon sb'eyb'al, q'uinloc tzjuw 'el sb'eyb'al cha, ax smasnil tas yajb'entac tzb'o eb' maysch'olnil sb'eyb'al, a chi tzb'o'o, ¿tom 'oj to wac' sq'uinl jun 'anma chi tze na'a? Wach'xam niwn tas wach' 'ix cob' sb'o', palta man̈x 'oj in na cot jun tzo'n̈ cha, cojn to tzcham yuj smul cha.

²⁵ Tecn 'ayx tzeyal 'ixtic: A Dios man̈ tojloc tas tzb'o'o, xe chi. Ex israel, tzcham wal eyab'n tas tzwala, an tic tojln̈ej tas tzin b'o'o, palta to ax man̈ tojloc e b'eyb'al.

²⁶ A mach tojl xon sb'eyb'al, q'uinloc tzjuw 'el sb'eyb'al cha, a maysch'olnil tzb'eylb'ej, yuj cha, 'oj yi' cot chaml 'a yib'an̈.

²⁷ Palta a junc maysch'olnil sb'eyb'al, toto tzyactjcan tas maysch'olnil, ax tas tojl tzb'o'o, 'oj colchjoc, ma'oj chamoc.

²⁸ Yujto tzyil cot sb'a to maysch'olnil tas tzb'o'o, yuj cha, 'oj colchjoc can 'eli.

²⁹ Ex israel tecn 'ayx tzeyal 'ixtic: A Dios man̈ tojloc tas tzb'o'o, xe chi. A 'in, tojln̈ej tas tzin b'o'o, palta ax man̈ tojloc e b'eyb'al.

³⁰ Ex israel, e Yajlil waji, an 'oj ex in b'eyc'ojloc yuj tas maysch'olnil tze b'o'o. An tzwala to tzeyactj can smasnil e tu b'eyb'al, sec man̈oc 'oj e satn 'eli.

³¹ 'Actjec can smasnil maysch'olnil xe b'o cha, ax jun 'ac' nab'en yet' jun 'ac' espíritu tze chaj 'och 'ayex. Ex israel, ¿tas yuj tzeyij cot chaml 'a eyib'an̈?

³² Yujto an tic, matz in nib'j to tzex comn chami. 'Actjec e b'on maysch'olnil, sec 'ay e q'uinal. An Jehová in, an tzwala, xchi Dios.