Ez 17 - Chuj San Sebastian Bible

Yab'xil no salt'iw

¹ 'Ix yaln pax Jehová 'ayn 'ixtic:

² Ach 'anma', al jun 'ab'x tic 'a eb' et israelal.

³ Tzaln 'a eb' to an tzwal jun ab'x tic 'ixtic: 'Ay wal jun no niwquil salt'iw xc'och 'a Líbano, caw niwc sc'axl no', tz'ib'quintac yilx xil no cha. Sn̈a'n cot no schon jun te c'ute'.

⁴ Sc'uychtan 'el no te schon cha, xyi'n 'at no te', axta x'at yawc no te 'a schon̈b' jun tzo'n̈ eb' chon̈wjum.

⁵ An̈jtona', xyi'n 'at no jun te sc'ab' te', 'ix yawn no te 'a jun lum lum caw 'ay syaxil sat. A 'a sti a', ata xyawj no te', 'icha tz'aj yawx te sauce.

⁶ 'Ix pac' jun te sc'ab' 'ix 'awx cha, ax 'ix 'aj 'el'chi, snun uva xo xyutj sb'a. Til wal x'ajl sc'ab'. Yunen̈ej x'aj ste'il, ax te sc'ab' cha, a 'a stojlal no salt'iw chi x'at t'in̈n eb' te'. 'Ix pac' 'elt sch'an̈l yib' yic tz'em 'a yol lu'um, snun uva xyutj sb'a. 'Ix wolni, til wal x'ajl sc'ab'.

⁷ 'Ay junx no salt'iw caw niwquil, niwc sc'axl no', caw pim xil no'. 'Ix c'och te sch'an̈l yib' chi 'a stz'ey no', ax te sc'ab' cha, x'at t'in̈n te', yic tzc'och te 'a no', sec tzya'ch no yalil te 'a 'aj 'awb'il cha.

⁸ 'Ixta 'ix yutj sb'a wach'xam a 'a lum lum caw wach', ata 'awb'il te', sti a 'aj 'awb'il, sec wach' tzwolni, tzya'n pax sat yic tz'och snun uvail.

⁹ Ax ticnec, al jun tzo'n̈ tic 'a eb' et' chon̈ab'. An Jehová in, an tzwal 'ixtic: A jun snun uva tic, ma'oj q'uib'oc. A no b'ab'l salt'iw, a no 'oj to'noc chan̈ te yet' sch'an̈lyib', ax spucl te sat yet' te xil cha. Man̈ yowlalc niwn 'anma tzto'n chan̈ te yet' sch'an̈lyib' yic tztacji.

¹⁰ Wach'xam 'oj cob' 'awxoc paxi, palta man̈x 'oj wolnoc, ax 'ic' 'oj cot 'a stojlal 'aj tzq'uel c'u, a 'oj ma'nc tacjoc. 'Oj tacjoc chan̈ 'a yet'l 'aj 'awb'il cha, xa chi 'a eb', xchi Dios 'ayin.

A tas tz'ajx snal eb' 'aj Jerusalén

¹¹ 'Ix yaln pax Jehová 'ayn 'ixtic:

¹² C'anb'j 'a eb' et chon̈b' tenmtac cha, tzam nachj 'el yuj eb' tas tzyal 'el'ch jun 'ab'x tzal cha. Al 'ixtc 'a eb': A no b'ab'l salt'iw cha, tzyal 'el'chi atn win sreyl Babilonia. 'Ix c'och win 'a Jerusalén, 'ix yi'n cot win eb' syajlil Judá yet' sreyl 'icha presoal. 'Ix yij cot win eb' yet' 'a Babilonia tic.

¹³ 'Ix yi'n cot win jun yican win rey cha, 'ix ya'n win yopiso winac, sb'on win strato yet' winac, xya'n pural win ya'n win sti', sec yiclum tzyutj sb'a win 'a win sreyl Babilonia cha. 'Ixta xyutj win yi'n cot eb' niwc winc 'a 'icha presoal,

¹⁴ sec 'ixta tz'aj yelcn yip yopiso winac, man̈xtzac stac' yi'n chan̈ sb'a, tzcann̈j 'ixta', sec tz'el'ch jun strato cha.

¹⁵ Palta 'ix 'och win 'ajc'ojlal 'a win sreyl Babilonia cha, 'ix ya'n 'at win schecb' 'a win sreyl Egipto yic tzc'ann cot win no chej yic owal yet' nan̈loc eb' soldado, (a no schab'l salt'iw cha, tzyal 'el'chi, atn win sreyl Egipto). ¿Tom 'oj yac' ganar scoln sb'a yet' jun snab'en cha? ¿Tom 'oj stac' scoln sb'a jun mach to matz yac' 'el'choc strato cha?

¹⁶ An Jehová in, an tzwal 'ixtic: 'Oj cham win sreyl Judá 'a Babilonia tic, yujto ma'ix syiclj win strato yet' win rey x'a'n yopiso cha.

¹⁷ Wach'xam a win rey 'a Egipto, caw niwn soldado winac, palta may jac 'aj 'oj stac' scolwj win 'a owl cha. A eb' soldado 'aj Babilonia, 'oj sb'o chan̈ eb' smuro yet' sb'achte 'a spatquil 'el chon̈b' Jerusalén. Caw niwn 'anma 'oj smil eb'.

¹⁸ Yujto ma'ix yac' 'el'choc win rey tas xyal yet' sti', 'ix yac' win 'es 'a strato, xcob' yala' to yiclum tzyutj sb'a. Yujn̈ej cha, ma'oj stac' xon scoln sb'a.

¹⁹ Yuj cha, an Jehová Yajl in, an tzwal 'ixtic: Yujto ma'ix yac' 'el'choc win rey sti cha, may yel'ch jun strato chi 'a sat, 'ix yac' 'es 'ayin, yuj cha, 'oj wac' jawc yailal 'a yib'an̈.

²⁰ 'Icha to 'oj wa't 'in ch'an̈ yal 'a yib'an̈, ax scan 'a yojol. 'Oj wi' cot 'a Babilonia tic, ax 'a tic 'oj in b'eyc'ojloc, yujto tenmtac xyutj sb'a 'ayin.

²¹ A eb' soldado caw jelan, 'oj cham eb' 'a scal owl cha, ax eb' ma'oj chamoc, 'oj sactzic can 'at eb' 'a yolyib'n̈q'uinl tic. 'Ixta to b'i'an, ax eyojcan 'eli to an Jehová in tzwac' 'el'choc tas tzwala.

²² An Jehová Yajl in, an tzwal 'ixtic: An 'oj in b'ijl sjolm te c'ute cha, ax junc te swol chi 'oj in c'uy 'elta, ax wawn te 'a sjolm junc lum witz caw 'ayb't 'a cha'an̈.

²³ Ata 'oj wawc te 'a sjolm lum switzl chon̈b' Israel. 'Oj laj q'uib'l sc'ab' te', ax ya'n te sat, caw niwquil c'ute 'oj 'ajoc. 'Oj jawc smasnil no noc' 'iljoc 'a yich te', ax 'a scal sc'ab' te', ata 'oj 'aj cajn smasnil no ch'ic.

²⁴ Ax smasnil te niwc te', 'oj yojcoc 'el eb' te', to an ton Jehová in. An tzwac' ch'acxoc 'el te niwquil te cha, ax te tzapn ste'il, a te tzwac' q'uib'oc. An tzwac' tacjoc eb' te', an pax tzwac' yaxb'oc te wan stacji. An tzwal jun tzo'n̈ tic, to 'oj wac' 'el'choc, xchi Dios.