Ez 16 - Chuj San Sebastian Bible

A tas 'ajnc spitzw chan̈ Jerusalén

¹ 'Ix yaln pax Jehová Cajlil 'ayn 'ixtic:

² Ach 'anma', al yab' eb' 'aj Jerusalén tas yajb'entac tz'el sb'on eb'.

³ Al 'a eb' to an Jehová Yajl in, an tzwala to 'ixtc yaj yab'xil Jerusalén yic xpitzw cha'an̈: Lajn wal 'icha junc 'ix 'ix to a 'a lum Canaán 'aljnac. Amorreo smam, ax snun, hitita.

⁴ A yic yalj cha, ma'ix lot'x 'el smuxuc', may mach xb'icn 'eli, may mach x'a'n 'och 'atz'm 'a 'a, ma'ix 'ajx 'och spichul.

⁵ May xon mach 'ix 'o'ch sc'ojl 'a 'a, yic tzb'on eb' jun tzo'n̈ cha. A yic x'alj cha, xcan t'ocn yuj eb' 'a sat lu'um, caw yajb'il yuj eb'.

⁶ An xo, in 'ec' 'a stz'ey, 'ix wiln 'ochi to caw wal c'almtac yilx yet' schiq'uil, 'ix in nani to wach' tzpitzw chan̈ 'a scal schic'l cha.

⁷ An xin q'uib'tzej 'icha junc te c'ultc tzpac'chan̈ 'a sat lu'um. Xq'uib' cha'an̈, yajn̈ej 'ix 'och yip, caw wach' pax yilx 'icha junc 'ix cob's xq'uib' 'elt yim 'a sn̈i sc'ojol, xq'uib' pax xil sjolom, palta jitn 'eli, may spichul.

⁸ In 'ec' pax 'a stz'ey jun 'ejm xo, xwilni to stiempoal xo yoch 'a nupnel. Yuj cha, ax in potil, a xin potb't 'a yib'an̈, 'ixta x'aj yoch spichul, 'ix macchj 'el sq'uixwelal. 'Ix wa'n in trato yet'oc to tzwique'ej an Jehová in.

⁹ Xin b'icl yet' a a', xin b'icl schic'l cha, xlajw cha, xwa'n 'och perjuma 'a 'a.

¹⁰ 'Ix wa'ch jun spichl tz'ib'quintac yilxi, xwa'n 'och xan̈ab', xwa'n 'och sjal-l to b'ob'il a te lino ch'al, caw sera pichl xwac' ya'chi.

¹¹ Caw wach' xwutj in b'oni, xwa'ch jun tzo'n̈ q'uen brazalete 'a sc'ab', xwa'n 'och q'uen ton̈ 'a sjaj.

¹² Xwa'n 'och jun q'uen 'icha colc'ab' 'a sn̈i', xwa'n 'och syumchiquin, xwa'n q'ue jun corona caw wach' yilx 'a sjolom.

¹³ 'Ixta wal 'ix 'aj sb'o yet' q'uen oro, q'uen plata; a sera pichl tz'ib'quintac yilx 'ix ya'chi. Ax yarinail 'ixm trigo caw wach', a xwac' swa', xwa'n slec' no yal chab' yet' pax yaceiteal te olivo. Caw wal wach' yilxi, yuj cha, 'ix 'och reinail.

¹⁴ An Jehová Yajl in, an tzwala, to caw wal tzb'inax 'a scal jun tzo'n̈ xo nacion̈ yuj swach'l yilxi, yujto wach' xwutj in b'oni.

A 'ajmulal 'a Jerusalén

¹⁵ Palta 'ix ya'ch yipc sc'ojl swach'l yilx cha, caw b'inab'il snani. Yujn̈ej cha, 'ix ya'n 'och sb'a 'ajmulal, tzann̈j mach tzc'och 'a 'a, tzya'n 'och sb'a 'a yol sc'ab'.

¹⁶ Ax yet' jun tzo'n̈ spichl wach' yilx cha, a yet' sb'o jun tzo'n̈ mantiado 'aj tz'och 'emmquilal 'a jun tzo'n̈ comn dios 'a lum tzalctac. Atn wal yet' jun tzo'n̈ chi say smuloc, caw man̈ smojc wal ton sb'on jun tzo'n̈ cha.

¹⁷ 'Ix yi'n 'el q'uen oro yet' q'uen plata siyb'il wuj 'a 'a, ax yet' jun tzo'n̈ chi sb'o jun tzo'n̈ yechl winac, sb'on 'ajmulal yet' eb'.

¹⁸ A te pichl tz'ib'quintac yilx cha, a te 'ix ya'ch spichloc eb', ax aceite yet' incienso to wic yaji, a sb'achch 'a yojltac eb'.

¹⁹ An̈jtona 'ixm pan b'ob'il yet' 'ixm harina caw wach', aceite yet' no yal chab' xwac' sc'uxu', 'ix sb'achch 'a yojltac eb', sec wach' yec' sjab'. 'Ixtnta 'ix yutj sb'a 'a in sat an Jehová in.

²⁰ Ax eb' wunnal yet'oc, 'ix yac' tz'a eb' xajmb'al-l 'a jun tzo'n̈ yechl cha. Man̈ cojnoc to 'ix 'och 'ajmulal,

²¹ palta to 'ix smil cham eb' wunnal cha, 'ix ya'n tz'a eb' xajmb'al-l 'a jun tzo'n̈ yechl comn dios cha.

²² Yuj yajmulal yet' tas yajb'entac sb'o'o, yuj cha, man̈xtzac sna cot tas 'ajnc scot 'a yune'al, matz na coti toto jitn 'eli, yic 'ayt 'ec' 'a scal schiq'uil. 'Icha junc 'ix 'ix cha, 'ixta yaj Jerusalén 'a in sat.

²³ An Jehová Yajl in, an tzwal 'ixtic: 'Oltac wal jun chon̈b' tic yuj jun tzo'n̈ maysch'olnil tz'el sb'on tic.

²⁴ 'Ix laj sb'o jun tzo'n̈ mantiado 'aj tz'och 'emmquilal 'a jun tzo'n̈ comn dios 'a jolmctac tzalan, 'ix ya'n 'och sb'a 'ajmulal.

²⁵ A 'a 'aj tzlajw c'och junjn caye, ata xlaj sb'o chan̈ jun tzo'n̈ cha. A swach'l yilxi, 'ix ya'ch sb'a yajb'entaquil, tzann̈j mach tzc'och 'a 'a, tzb'on̈j 'ajmulal yet'oc.

²⁶ 'Ix sb'o 'ajmulal yet' eb' 'aj Egipto, yujto caw wal pec' eb' 'a 'ajmulal cha, caw wal xniwtj sayn smuloc, yuj cha, stzuntzn cot yowl in c'ojol.

²⁷ Yuj wal cha xcot wowal, xwa'n 'och syailal, xwi'n 'emt yoc tas tzc'uxu, xwa'n 'a yol sc'ab' eb' 'ix filistea, eb' 'ajc'ojl yajch 'a 'a. Caw wal tzq'uixw eb' 'ix yiln 'och sb'eyb'al.

²⁸ Palta matz c'och sc'ojl yuj jun tzo'n̈ cha, 'ix muln pax yet' eb' winc 'aj Asiria; man̈ yujoc cha xc'och pax sc'ojol.

²⁹ 'Ix muln pax yet' eb' 'aj Babilonia, atn eb' chon̈wjum, palta ma'ix c'och pax sc'ojol.

³⁰ An Jehová Yajl in, an tzwal 'ixtic: Caw wal pec' 'a 'ajmulal, lajn wal tzyutj sb'a 'icha junc 'ix 'ajmul 'ix man̈xtzac q'uixwi.

³¹ 'Ix laj sb'o chan̈ jun tzo'n̈ mantiado chi 'aj tzlajw c'och caye, ax 'a plas, ata sb'o jun tzo'n̈ yet'l xajmb'al, palta man̈ lajnoc yet' eb' 'ix 'ajmul 'ix tzchaj stojol. May xon stojl chi tzcha'aj.

³² Lajn wal tzyutj sb'a Jerusalén 'icha junc 'ix 'ajmul 'ix 'ay yichmil, ax yic may yichmil 'ayq'ui, chucx win tzc'och 'a 'ix.

³³ A eb' 'ix 'ajmul 'ix, tzchaj eb' 'ix stojol, palta ax jun cha, a tztojn eb' winc tzmuln yet'oc, sec tzann̈j 'aj tzlaj cot eb', tzc'och eb' mulnc yet'oc.

³⁴ Chuc wal yel 'a yib'n̈ jun tzo'n̈ xo eb' 'ix 'ajmul 'ix, yujto may mach tzsayn 'eq'ui yic tzb'on 'ajmulal cha. Matz chaj pax stojol, palta to a tztojwji, yujn̈ej cha chuc yeli.

'Oj b'eyc'ojlaxc Jerusalén

³⁵ Yuj cha, an Jehová Yajl in, an tzwal 'ixtc yuj 'ix 'ajmul 'ix cha:

³⁶ Caw wal may sq'uixwel, yic sjitn 'el sb'a 'a sat eb' xmuln yet'oc, yet' pax 'a sat jun tzo'n̈ yechl sdiosal caw yajb'entac cha. 'Ix yi'n can pax 'el schic'l eb' yune xyac' xajmb'alil.

³⁷ Yuj wal cha, 'oj wac' syam sb'a eb' xmuln yet'oc, atn eb' caw wal chamc'ojlb'il yu'uj, yet' eb' ma'ix snib'ej; 'oj 'och oyn eb' 'a 'a, ax in jitn 'el 'a sat eb', sec 'oj yil eb' sniwnal chi smasnil.

³⁸ Ax in b'eyc'ojlan yuj yajmulal yet' yuj smilm 'anma'il, 'oj wac' 'a yol sc'ab' chaml yuj yowl in c'ojl 'a yib'an̈.

³⁹ 'Oj wac' 'a yol sc'ab' eb' 'anma cha, ax sma'n lan̈chjoc eb' jun tzo'n̈ mantiado sb'o 'aj tz'och 'emmquilal 'a jun tzo'n̈ comn dios 'a tzalctac, ax sma'n poj eb' jun tzo'n̈ yet'l 'aj xlaj sb'o 'ajmulal cha. 'Oj yi'c eb' spichl wach' yilxi, yet' jun tzo'n̈ q'uen wach' yilx xwa'ch 'a 'a, ax sjitn can 'el eb'.

⁴⁰ 'Oj 'och eb' 'anma 'ajc'ojlal 'a 'a. 'Oj sjul q'uenoc eb', ax stzu'n cham eb' yet' yespada.

⁴¹ 'Oj sn̈ustz'a eb' yatut, ax sb'eyc'ojlan eb' yet' yailal 'a sat jun tzo'n̈ xo eb' 'ix 'ix. 'Ixta 'oj aj yoch wan sb'on 'ajmulal, ax yactn stojn eb' chamc'ojlab'il yuj cha.

⁴² 'Ixta wal 'oj wutc wi'n 'el yowl in c'ojl 'a yib'an̈. 'Oj b'o in c'ojol, man̈x 'oj cot wowl 'a 'a.

⁴³ An Jehová in, an tzwala. 'In man̈xtoc sna coti tas 'ajnc scot 'a yune'al, stzuntzj cot yowl in c'ojl yet' jun tzo'n̈ tas sb'o cha. Yuj wal jun sb'eyb'al tic, ax wa'n 'och syailal.

A 'ix nunb'il yet' 'ix 'uneab'il

⁴⁴ Til wal 'anma 'oj 'a'nc 'och 'a scal spaxti', ax yaln eb' yuj Jerusalén chi 'ixtic: 'Icha wal 'ix nunb'il, 'ixta pax 'ix 'uneab'il, 'oj schic eb'.

⁴⁵ A Jerusalén tic, 'icha to yune junc 'ix 'ix chacb'il 'el yichmil yu'uj, yet' pax eb' yune'. 'Ixta pax eb' 'ix nuljab'il cha, chacb'il 'el yichmil eb' 'ix yu'uj, yet' pax yune eb' 'ix. A 'ix nunb'il cha, hitita 'ix, ax win mamb'il, amorreo winac.

⁴⁶ A 'ix b'ab'l 'ix cha, tzyal 'el'chi atn chon̈b' Samaria 'ay 'a stojlal norte yet' yaldeail; ax 'ix tza'n 'ix, tzyal 'el'chi atn chon̈b' Sodoma yet' yaldeail 'ay 'a stojlal sur.

⁴⁷ 'Ix 'och tza'n Jerusalén yuj sb'eyb'al eb', caw yajb'entac tas x'el sb'oni. Man̈ cojnoc cha, palta yel xo wal tu 'ix yutj sb'a 'a yib'n̈ eb' chab' chon̈b' cha.

⁴⁸ An Jehová Yajl in, an tzwal 'ixtic: A Sodoma yet' yaldeail, ma'ix sb'o 'icha tas sb'o Jerusalén yet' yaldeail.

⁴⁹ Yaj jun tzo'n̈ smul chon̈b' Sodoma yet' yaldeail. Caw wal sb'an̈ sb'a yet' tas 'ay 'a 'a. Til wal tas tzc'uxu, caw wach' yaji, palta ma'ix colwj jac 'a eb' meb'a', yet' 'a eb' 'anma may tas tzc'uxu.

⁵⁰ Caw b'an̈quintac xyutj sb'a, sb'on tas yajb'entac 'a wojltac; yuj wal jun tzo'n̈ cha, xin satn 'eli.

⁵¹ Ax Samaria, ma'ix q'ue'ch 'a spacl sayn smulc 'icha Jerusalén cha. Yujto yel xo wal x'ec' 'a yib'n̈ sb'on tas yajb'entac 'a yib'n̈ eb' 'ay 'a sla'nil cha; tu 'ix yal 'a eb', palta wach' to wal eb' jab'x 'a yib'an̈.

⁵² A Jerusalén cha, 'oj yac' techjoc q'uixwc'ojlal, yujto yel xo wal yajb'entac 'ix yutj sb'a, 'a yib'n̈ Sodoma yet' Samaria. A chab' chon̈b' cha, toto tzqui lajb'tzej eb' yet' Jerusalén, wach' to wal eb' jab'x 'a yib'an̈.

A Sodoma yet' Samaria

⁵³ Palta 'oj wi'x chan̈ Sodoma yet' yaldeail, ax wi'n chan̈ Samaria yet' yaldeail, an̈jtona 'oj wi'x chan̈ Jerusalén yet' eb' yanma pucnc can 'ati,

⁵⁴ sec 'oj techjoc q'uixwelal yu'uj, yic tzyi'n 'ejm sb'a yuj tas sb'o cha. 'Oj 'och sniwnalc sc'ojl chab' chon̈b' cha,

⁵⁵ atn Sodoma yet' yaldeail, Samaria yet' yaldeail. 'Oj c'ochx eb' 'a yet'l 'icha xon yaj 'a yic yalan̈. An̈jtona pax Jerusalén cha, 'oj cann̈jn̈ej 'a yet'l 'icha xon yaj yet' eb' aldea 'ay 'a yol slugar.

⁵⁶ A yic sb'an̈n sb'a Jerusalén, spatquiln can 'el Sodoma,

⁵⁷ yujto mantzac checlj smul. Ax ticnec, a eb' edomita, eb' filistea yet' eb' cajn 'a stz'ey, caw wal 'oj sb'uch eb'.

⁵⁸ Ax ticnec b'i'an, tzchaj scuch yailal yuj tas maysch'olnil sb'o'o, yujto yajb'entac 'ix yutj sb'a.

⁵⁹ An Jehová in, an tzwal 'ixtic: 'Oj wac' spac tas 'ix sb'o'o, yujto ma'ix syiclj tas tzyal in trato.

⁶⁰ An tic, nann̈ej jun in trato wa'jnac yet'oc yic 'unn to, ax ticnec, 'oj in b'o junx in trato yet' 'a jun 'ejmn̈ej.

⁶¹ Tzlajw cha, ax snan cot sb'a yuj sb'eyb'al, ax yecn q'uixwc sb'a yic 'oj wa'nc pax meltzjoc chab' chon̈b' chi 'a 'a. 'Icha to yune 'oj 'aj eb', wach'xam to may yaln eb' yic a 'in trato yet' Jerusalén cha.

⁶² Atn yuj in trato 'oj wac' 'el'choc yet'oc, 'ixta to b'i'an, ax in yojcan 'eli, to an ton Jehová in.

⁶³ 'Oj wac' niwnc'ojlal 'a yuj tas sb'o cha, palta 'oj sna coti, man̈x 'a wal b'a'n̈ 'oj sb'an̈ sb'a, to an tzwala, xchi Dios, xa chi 'a yib'n̈ Jerusalén, xchi 'ayin.