Ez 15 - Chuj San Sebastian Bible

A Jerusalén lajn yet' te snun uva

¹ 'Ix yaln pax Jehová 'ayn 'ixtic:

² Ach 'anma', ¿'aym 'aj tzab' yalxi to a te sch'an̈l uva 'ec'b'al yel'ch te 'a sc'ab' eb' te tzann̈j te'al?

³ ¿'Ay am 'aj tz'och yopiso te 'a junc tas tzb'o'i, mto 'ay 'aj tz'och locn junc pa 'a te sc'ab' cha?

⁴ May xon yopiso te', ¿tom at wal 'a c'atztzil 'aj wach' sc'anxi? 'In a yic tz'a te', tz'och te 'ac'alil, ¿tom 'ayt 'aj wach' sc'anxi?

⁵ A yic mantzac tz'a te', toxn may xon yopiso te', ¿tom at wal yic 'ac'al xo yaj te stz'a'i, 'ayt 'aj wach' sc'anxi?

⁶ Yuj cha, an Jehová in an tzwal 'ixtic: 'Icha wal tz'aj yoch te sch'an̈l uva chi 'a scal c'ac' yic tz'a'i, 'ixta 'oj wutc eb' 'aj Jerusalén wa'n 'och syailal, yujto may yopiso eb' 'a in sat.

⁷ An wal 'oj woch 'ajc'ojlal 'a eb'. Wach'xam 'oj yac' ganar eb' scoln sb'a 'a jun yailal cha, palta chucx junx yailal chi 'oj satn 'el eb'. A yic 'oj woch 'ajc'ojlal chi 'a eb', ax in eyojcan 'eli, to an ton Jehová in, to cojn in ton Dios in.

⁸ An tzwala to 'oj wa'ch can jun nacion̈ chi 'a cusltaquil, man̈x 'a 'anma 'oj can 'a 'a, yujto tenmtac xyutj sb'a eb' 'ayin, xchi Dios.