Ez 14 - Chuj San Sebastian Bible

Eb' tzyac' 'ejm sb'a 'a junc yechel

¹ 'Ix jaw nan̈l eb' yichm wincal chon̈b' Israel 'ayin, yic tzwul sc'anb'noc sb'a eb' 'a Jehová, 'ix 'em wocn eb' 'a wojltac.

² Xlajw cha, 'ix yaln Jehová 'ayn 'ixtic:

³ Ach 'anma', a wal jun tzo'n̈ winc xjaw 'aych tic, caw wal 'aych snab'en eb' 'a jun tzo'n̈ yechl comn dios, a maysch'olnil 'aj 'ix ya'ch eb' snab'en, a eb' cha, nab'a xoj tzwul sc'anb'c sb'a eb' 'ayin.

⁴ Al 'a eb' to an Jehová in, an tzwal 'ixtc 'a eb': Tzann̈j junc 'a eb' israel to tzyac' 'ejm sb'a 'a jun tzo'n̈ yechl comn dios, a maysch'olnil 'aj 'aych snab'en, tzlajw cha, tzcob' jawc sc'anb'c sb'a 'a junc in checab', an Jehová Yajl in, an tzwala to a yailal 'oj wac' spacc 'a junc 'anma cha, yujto niwn yechl sdiosal cha.

⁵ 'Ixta 'oj wutc wi'n meltzjoc snab'en eb' israel yijnac 'el snab'en 'ayn yuj jun tzo'n̈ yechl cha.

⁶ Yuj cha, al 'a eb' to an Jehová in, an tzwal 'ixtic: Meltzjan̈c cot 'ayin, tzeyactn can jun tzo'n̈ yechl comn dios cha, tzeyactn e b'on tas yajb'entac.

⁷ Yujto tzann̈j junc mach, junc israel mto junc chuc chon̈b'al cajn 'a scal eb' israel, to tzyij 'el snab'en 'ayin, ax 'a eb' comn dios chi 'aj tzyac' 'ejm sb'a, tzya'n 'och pax snab'en 'a maysch'olnil, toto tzcob' jawc 'a junc in checab' yic tzwul sc'anb'n sb'a 'ayin, an tzwala to a yailal 'oj wac' spacc 'a junc mach cha.

⁸ An tzwala to 'oj woch 'ajc'ojlal 'a 'a, ax wa'n 'och ch'oxnb'ilal 'a scal 'anma', ax wi'n 'el 'a scal eb' in chon̈ab', 'ixta to b'i'an, ax in eyojcan 'eli, to an Jehová in, to cojn in ton Dios in.

⁹ Toto 'ay junc mach tzcob' sc'anb'j sb'a 'a junc tzyalch sb'a in checb'oc, toto tzyac' jun checb' chi spac junc paxti chi 'a yol yico', a jun cha, an tzwac' 'ixtxoc paxti'. 'Oj wic' chan̈ in c'ab' 'a 'a, ax wa'n 'och syailal, 'oj wi'l 'a scal eb' in chon̈ab'.

¹⁰ A junc 'anma tzc'anb'j sb'a cha, yet' junc tzyalch sb'a in checb'oc, 'oj wa'ch syailal eb' yuj smul cha,

¹¹ sec wach' man̈xtzac yij 'el eb' israel snab'en 'ayin, man̈x 'oj sb'o eb' tas maysch'olnil. 'Oj 'ochx eb' in chon̈b'oc, ax wochx sDiosalc eb', xchi Jehová.

Tzb'eyc'ojlax Jerusalén

¹² 'Ix yaln pax Jehová 'ayn 'ixtic:

¹³ Ach 'anma', a yic tz'och smul junc chon̈b'al 'anma 'ayin, tz'och jun chon̈b' chi tenmtacl 'ayin, an xo 'oj wac' jawc yailal 'a yib'n̈ jun chon̈b' cha. Man̈x 'oj yac' lum lum sb'a'al, ax sjaw wejl 'a jun chon̈b' cha, 'ixta 'oj 'aj scham eb' 'anma', yet' no noc'.

¹⁴ Q'uinloc a 'a jun chon̈b' chi cajn Noé, Daniel, yet' Job, cojn am eb' 'oxwn̈ tic tzcolchj can 'eli, yujto tojl sb'eyb'al eb', palta may junc mach 'oj stac' scoln 'el eb'.

¹⁵ Q'uinloc tzwa' cot no chiwjum noc' 'a sat lum lum tic, ax tz'aji, tzsatn 'el no eb' 'anma 'a jun chon̈b' cha, cusltac tz'ajcni, man̈x 'a junc 'anma tztac' yec' yuj no'.

¹⁶ Q'uinloc ata cajn 'oxwn̈ eb' winc cha, cojn eb' tzcolchj can 'eli. May junc mach tztac' scoln 'el eb', wach'xam yunnal eb' mto yisl eb', ma'oj stac' scoln 'el eb'. An tzwala to tzcan jun chon̈b' chi 'a cusltaquil.

¹⁷ Q'uinloc tzwij cot owl 'a yib'n̈ jun chon̈b' cha, tzwalni to tzcham eb' 'anma yet' no noc'.

¹⁸ Q'uinloc ata cajn 'oxwn̈ eb' winc cha, cojn eb' tzcolchj can 'eli. May junc mach tztac' scoln 'el eb', wach'xam yunnal eb' mto yisl eb', ma'oj stac' scoln 'el eb'.

¹⁹ Toto tzwa't yab'il 'a yib'n̈ junc nacion̈ cha, yet' wal yowl in c'ojol, ax wa'n cham eb' 'anma yet' no noc'.

²⁰ Q'uinloc ata cajn Noé, Daniel yet' Job, cojn eb' tzcolchj can 'eli yujto tojl snab'en eb'. May junc mach tztac' scoln 'el eb', wach'xam yunnal eb' mto yisl eb', ma'oj stac' scoln 'el eb'.

²¹ Yuj cha, an Jehová Yajl in, an tzwal 'ixtic: A yic 'oj wa'noc cot chan̈e niwc yailal 'a yib'n̈ chon̈b' Jerusalén, caw wal 'ay smay tas 'oj ujc cha. 'Oj jawc owal, wejel, no chiwjum noc' yet' yab'il. 'Oj cham eb' 'anma', yet' no noc'.

²² Palta 'ayt jaywn̈ocx eb' 'oj colchjoc 'el yet' yunnal mto yisil. A eb' cha, 'oj 'ijxoc cot eb'. Ax yic 'oj jawc eb' 'ayex, ax eyiln 'och tas tzb'o eb' mto sb'eyb'al eb', 'ixta to b'i'an, ax eyoch wan e nan yuj yailal tzwac' jawc 'a yib'n̈ Jerusalén.

²³ Yujto a yic 'oj eyiln 'och sb'eyb'al eb' cha, ax snachj 'el eyu'uj, chajtlto man̈ nab'an̈ejoc 'ay tas tzwac' jawc 'a yib'n̈ jun chon̈b' cha. An Jehová Yajl in, an tzwala, xchi Dios.