Ez 13 - Chuj San Sebastian Bible

Eb' tzyalch sb'a schecb'oc Dios

¹ 'Ix yaln Jehová 'ayn 'ixtic:

² Ach 'anma', al jun tzo'n̈ in paxti tic 'a eb' tzcob' yalch sb'a in checb'oc 'a scal eb' israel. A eb' cha, mun tzcob' yal eb' junc tas 'a yol yico', al yab' eb' to an Jehová in, an tzwal 'ixtic:

³ ¡'Ay, 'oltac wal jun tzo'n̈ eb' checb' mun tzcob' yal junc tas 'a yol yico'! Man̈ yeloc to 'ay tas tzyil eb' cha.

⁴ A jun tzo'n̈ eb' tzcob' yalch sb'a in checb'oc 'a scal eb' israel, lajn wal eb' 'icha e no wax ton̈j chotn ec' 'a junc chon̈b' to lan̈chjnacx 'ejmi.

⁵ Mant 'a xon jac tas tzb'o eb' yic tzcolchj chon̈b' Israel, sec ax yic tzin jaw an Jehová in wul wac' owl 'a jun chon̈b' cha, 'oj colchjoc 'el eb' yu'uj.

⁶ Tzcob' yal eb' to 'ay tas tzyila, tznan eb' tas tzyutj ya'n 'es, tzyaln cob' eb' 'ixtic: A Jehová a tz'a'n cal jun tzo'n̈ tic, xchi cob' eb', palta may tas tzwal 'a eb'. Tzlaj cob' stan̈wnoc eb' yel'ch tas tzyal cha.

⁷ A jun tzo'n̈ tzcob' yal eb' yil cha, yet' tas tzcob' snal eb', a jun tzo'n̈ cha, man̈ yeloc. Tzcob' yal pax eb' 'ixtic: A Jehová a tz'a'n cal jun tzo'n̈ tic, xchi cob' eb', palta may tas tzwac' yal eb'.

⁸ Yuj cha, an Jehová Yajl in, an tzwal 'ixtc 'a eb': Yujto man̈ yelc tas tzeyala, cojn 'es tzeyac'a, yuj cha, tzin 'och 'ajc'ojlal 'ayex.

⁹ 'Oj wi' chan̈ in c'ab' 'a eb' tzcob' yalch sb'a in checb'oc, ax wa'n 'och syailal eb'. Yujto cojn tas man̈ yeloc an̈j chi tzyal eb', an̈j 'es tzyac' eb'. Yuj cha, may yaln eb' yic sc'och 'a 'aj 'ay syamnil eb' israel; may pax sb'i eb' 'oj tz'ib'xoc 'a slista eb' israel cha, man̈x 'oj meltzjoc pax eb' 'a slu'um. 'Ixta to b'i'an, ax in yojcan 'el eb', to an Jehová in, to Yajl in.

^10-16 A eb' tzyalch sb'a in checb'oc cha, caw wal 'ix yac' eb' 'es 'a eb' in chon̈ab'. 'Ix cob' yaln eb' 'ixtic: A ticnec man̈x e na to 'ay tas 'oj jawc 'a quib'n̈ec, xchi cob' eb', palta man̈ yeloc to may tas 'oj jawc 'a yib'n̈ eb'. A eb' cha, lajn tzyutj sb'a eb' 'icha junc mach tznipn junc muro ton̈j b'alb'ob'il. A b'i'ch tzya'ch sniploc, tzicn 'och tan̈ 'a spatic yic wach' cob' yilxi. Palta ax yic tzya'n junc niwquil yaxn̈ab' 'aych yic'al, 'aych pax sacb'at 'a scal, a jun n̈ab' chi tzma'n lan̈chjoc. Ax yic tzyiln eb' 'anma to lan̈chjnacx 'ejmi, tzyaln eb' 'ixtic: ¿Tas x'aj lum b'i'ch x'och sniploc jun muro tic? ¿'Ajtil xc'och lu'um? xchi eb'. 'Ixtnta yaj tas tzyal eb' cob' tzyalch sb'a in checb'oc cha. Tzyal cob' eb' to a Jerusalén may tas 'oj 'i'noc yuj smaysch'olnilal eb' 'anma cha. Palta an Jehová in, an tzwal 'ixtic: 'Oj wa' cot yowl in c'ojl 'a yib'n̈ Jerusalén, 'oj lajwc 'ejm yuj in c'a'lc'ojlal. Sactzicnac 'oj 'ajcn 'a sat lu'um, ax scheclj yipnub'al yich. 'Ixta 'oj 'aj scham eb' cob' tzyalch sb'a in checb'oc cha yujto a tas tzyal eb' 'a eb' in chon̈ab', lajn 'icha b'i'ch tz'och sniploc junc muro cha. Ax waln 'ixtic: 'Iltec, tox 'ix lajw 'ejm Jerusalén, yet' eb' 'anma xcob' 'alnoc to may tas tz'i'ni, 'oj in chioc. Atta 'oj in eyojcoc 'eli, to an ton Jehová in, to cojn in ton Dios in.

Eb' 'ix tzyalch sb'a schecb'oc Dios

¹⁷ Ach 'anma', a ticnec al 'a jun tzo'n̈ eb' 'ix et chon̈ab', eb' 'ix cob' xyalch sb'a in checb'oc. A eb' 'ix cha, mun cob' tzyal eb' 'ix junc tas 'a yol yico'.

¹⁸ Al 'a eb' 'ix to an Jehová Yajl in, an tzwal 'ixtic: ¡'Ay, 'oltacx wal ax 'ixx tzex 'ec' 'a stitc n̈a 'ec' e jalch jun tzo'n̈ nip 'icha cinta 'a sc'ab' eb' 'anma' sec may tz'i'n eb' eyalni! Tze b'on pax spotl sjolm eb', 'ixta tzeyutj eb' eyixtni, sec tz'och tza'n eb' in chon̈b' tic eyu'uj. Tze nib'j ax tzeyala jantc sq'uinl eb' mto b'a'n̈ tzcham eb', sec wach' yec' jac tiempo eyu'uj.

¹⁹ Ax tic, yuj jun jopoc 'ixm cebada, mto yuj junc 'ixm pan, tzin e patquiln can 'el 'a sat eb' in chon̈ab'. 'In tzlaj e mil cham eb' 'anma to man̈ smojc schami. A eb' 'ayx 'och chaml 'a yib'an̈, a eb' tze colcn 'eli. Tzeya'n 'es 'a eb' in chon̈ab', ax eb', caw wal tzchaj sc'ojl eb' yab'n tas tze yal cha.

²⁰ Yuj cha, an Jehová in, an tzwal 'ixtic: Caw wal tzin chac in b'a yet' jun tzo'n̈ nip tze b'o cha, yujto a yet' jun tzo'n̈ chi tze b'o maysch'olnil, a yet' tze montj eb' 'anma'. Palta an 'oj in col-l eb' 'a yol e c'ab', ax wa'n 'el eb' 'a libre 'icha junc no ch'ic tz'at 'eloc.

²¹ 'Oj in jatl jun tzo'n̈ nip chi tzeya'ch 'a sc'ab' eb' yet' spotl sjolm eb' cha. 'Oj in col-l eb' in chon̈b' chi 'a yol e c'ab', man̈x 'oj montchjoc eb' eyu'uj. 'Ixta to b'i'an, ax eyojcan 'eli, to an Jehová in, to cojn in ton Dios in.

²² Yuj eyixtm 'anma'il xlaj eya'nc cus sc'ojl eb' tojl snab'en. A jun cha, caw matz in nib'j an tic. Ax eb' maysch'olnil sb'eyb'al, tzeyac' sc'ojloc eb' sec matz jel eb' sb'eyb'al yic tzchan eb' sq'uinl 'ayin.

²³ Yuj cha, man̈x 'a wal b'a'n̈ 'oj stac' eyalni to 'ay tas tzeyila, mto 'ay tas 'oj stac' e nan 'eli. An 'oj in col-l eb' in chon̈b' tic 'a yol e c'ab', ax in eyojcan 'eli, to an Jehová in, xchi Dios, xa chi 'a eb', xchi 'ayin.