Ez 12 - Chuj San Sebastian Bible

A Ezequiel tzyac' jun ch'oxnb'il

¹ 'Ix yaln pax Jehová 'ayn 'ixtic:

² Ach 'anma', ach tic cajn ach 'ec' 'a scal jun c'aj eb' 'anma caw wal pit. 'Ay cob' yol sat eb', palta 'icha to matz tac' yiln eb'; 'ay pax cob' schicn eb', palta 'icha to matz tac' yab'n eb', yujto caw wal pit eb'.

³ Yuj cha, molb'tzej tas 'ay 'ayach, tze'ni tzach 'ati, 'icha to tzach 'ijx 'at 'icha presoal. A cab' 'a c'ul tza b'o jun tic, sec tzyil eb' smasnil. 'Eln̈ 'a et'l cha, chucx junc lugar 'aj tzach c'och yil eb', sec lemb'il 'oj yil cot sb'a eb', yujto caw pit jun chon̈b'al eb' 'anma tic.

⁴ C'ul tza b'o a pa chi yil eb' 'anma cha, 'icha tzyac' junc mach to wan yijx 'at 'icha presoal, palta at 'a yemc'ul tzach 'at yil eb', 'icha to wan ejx 'at 'icha presoal cha.

⁵ Q'ueln 'och eb' 'ayach, tza b'on junc oln 'a sat yich atut, ax yic tzb'o'i, tzach 'el 'a jun oln cha.

⁶ A 'a yic wan xo sq'uic'b'i, tza'n q'ue a pa chi 'a sjolm a quelab', q'ueln 'och eb' 'ayach yic tzach 'at cha. Tza mac a sat, sec matz uj eln can jun chon̈b' cha. 'Ixta tzach wutj ach wa'n 'och ch'oxnb'ilal 'a eb' et israelal cha, xchi 'ayin.

⁷ Xin b'on in pa 'a c'ul 'icha x'aj yalx 'ayin. Ax 'a yemc'ual, xin b'on jun oln 'a sat yich watut cha. A yic wan sq'uic'b'i, 'ix wa'n q'ue in pa chi 'a in quelab', q'ueln 'och eb' 'anma chi 'ayin yic in 'elt 'a jun oln cha.

⁸ Ax 'a yic sacb'el 'a junx c'u cha, 'ix yaln pax Jehová 'ayn 'ixtic:

⁹ Ach 'anma', ¿'ix sc'anb'j am eb' et israelal chi 'ayach tas jun tza ch'ox cha? 'In xwal 'ayach to caw wal pit eb'.

¹⁰ Al 'a eb' to an tzwac' a b'o jun tic yic tz'och ch'oxnb'ilal 'a eb' yuj tas 'oj 'aj win sreyl Jerusalén, yet' smasnil eb' et israelal cajn 'a jun chon̈b' cha.

¹¹ Tzaln 'a eb' 'ixtic: An tic ton̈j ch'oxnb'il jun tzwac' 'ayx tic. 'Icha 'ix wutj in ch'oxn tic, 'ixta 'oj 'aj eb' 'ayt can 'a Jerusalén yijx 'at 'icha presoal, xa chi 'a eb'.

¹² Ax win rey cha, 'oj yic' win spa ax s'at win 'a 'ac'wl cha. 'Oj yac' win b'o yolnil smuroal Jerusalén, ax yel ta'. 'Oj smac win sat sec ma'oj yilcn jun chon̈b' cha.

¹³ An xo 'oj wa't in ch'an̈ yal 'a yib'an̈, ax scan 'a yojol, ax yijx cot 'icha presoal 'a Babilonia tic, atn lum slum ewin caldeo. Palta ma'oj yil xon jun chon̈b' tic, a pax a tic 'oj chamoc.

¹⁴ Ax smasnil eb' 'anma oyn 'och stan̈woc yet' eb' soldado win cha, 'oj sactzic can eb' 'a chuc chon̈b'al, 'oj wic' q'uet wespada 'a yol yet'ul, ax woch tza'n yuj eb'.

¹⁵ A yic tox 'ix sactzic can eb' in pechn 'at 'a jun tzo'n̈ xo nacion̈ cha, atta 'oj yil cot sb'a eb' ax in yojcan 'el eb', to an ton Jehová in, to cojn in ton Dios in.

¹⁶ Palta an 'oj wac' colchjoc can jaywn̈oc eb' 'a scal owal, 'a scal wejel yet' yuj yab'il, sec 'oj yal-l eb' 'a scal eb' 'anma 'a jun tzo'n̈ nacion̈ 'aj 'oj c'och cha, to til wal tas yajb'entac xlaj sb'o eb', ax in yojcan 'el eb', to an ton Jehová in, to cojn in ton Dios in, xchi Dios chi 'ayin.

Yailal tzjaw 'a Jerusalén

¹⁷ 'Ix yaln pax Jehová 'ayn 'ixtic:

¹⁸ Ach 'anma', a yic tzach wa'i, caw wal tzach xiw yil eb' 'anma tic, ax yic tzo'n tas tzoq'uej, caw wal cusltac cab' yilx a sat.

¹⁹ Tzlajw cha, tzaln 'ixtc 'a eb' et israelal cha, to an Jehová Yajl in, an tzwal 'ixtc 'a yib'n̈ eb' cajn to can 'ec' 'a yol smacb'en Jerusalén, yet' 'a smasnil yol yic Israel cha: 'Oj laj wa eb' 'a scal xiwc'ojlal, 'a scal cusc'ojlal 'oj laj yuc' eb' a'. A jun chon̈b' cha, smul yujoc eb' 'anma cajn 'a 'a, ax scan 'a sictaquil, man̈x 'a xon jac tas 'oj can 'a 'a

²⁰ Ax smasnil eb' lum chon̈b' 'aj cajn eb' 'anma', caw wal sictac 'oj 'ajcn eb' satli; cusltac yilx 'oj 'ajcn jun nacion̈ cha. 'Ixta to b'i'an, ax in yojcan 'el eb', to an ton Jehová in, to cojn in ton Dios in, xchi Dios, xa chi 'a eb', xchi 'ayin.

'Oj 'el'choc smasnil tas xyal Dios

²¹ Xlajw cha, 'ix yaln pax Jehová 'ayn 'ixtic:

²² Ach 'anma', ¿tas yuj tzyal eb' et israelal jun spaxti tic? 'Ipn yec' tiempo, ax tas alb'il can yuj eb' schecb' Dios, 'in matz 'el'chi, xchi jun spaxti eb' cha.

²³ Yuj cha, al 'a eb' to an Jehová in, an tzwal 'ixtic: Man̈x 'oj wac' yal eb' 'anma jun paxti chi 'a scal eb' israel tic. Palta to caw wal la'n xo yaj sc'ul yel'ch smasnil tas in ch'oxjnac 'ilxoc 'a 'icha waychil cha.

²⁴ Yujto man̈x 'a mach 'oj cob' stz'ac yala', to 'ay tas tzyil 'a 'icha waychil, mto cob' 'oj sna chan̈ junc 'es paxti 'a scal eb' in chon̈b' cha.

²⁵ A tas 'oj wal an Jehová in tic, 'oj 'el'choc muc'uc. Ax xo caw wal pitx tic, 'oj eyil wal jun tzo'n̈ tzwal tic, yowlal 'oj 'el'choc tas tzwala, xchi Dios 'ayin.

²⁶ 'Ix yaln pax Jehová 'ayn 'ixtic:

²⁷ Ach 'anma', a eb' et israelal cha, tzyal eb' 'ixtc yuj tas xin ch'ox ela', mto 'a tas tzwac' al 'a eb'. ¿B'a'n̈ xom yuj jun tzo'n̈ cha? xchi eb'.

²⁸ Yuj cha, al 'a eb' to an Jehová in an tzwal 'ixtic: A tas xwala, ma'oj 'ec' tiempo yel'chi, yowlal 'oj 'el'choc muc'uc, xa chi 'a eb', xchi Dios 'ayin.