Ez 11 - Chuj San Sebastian Bible

Syailal eb' syajlil Jerusalén

¹ Ax Yespíritu Dios in 'i'n 'at 'a spuertail yatut Jehová, jun 'ay 'a stojlal 'aj tzq'uel c'u. A 'a yol sti puerta cha, ata 'ayc' 25 eb' winac, ax 'a scal eb', ata 'ayc' Jaazanías yunnal Azur yet' win Pelatías yunnal Benaías, atn eb' tic yajl yaj 'a scal eb' 'anma cha.

² 'Ix yaln Jehová 'ayn 'ixtic: Ach 'anma', 'ilt wal jun tzo'n̈ winc tic, atn eb' tznalb'ej sb'on maysch'olnilal, tzya'n eb' nab'en man̈ tojloc 'a eb' 'anma'.

³ Tzyaln eb' 'ixtic: An̈ec tic jab'xoj 'oj laj qui b'oc pax catut. A qui chon̈b'ec tic, lajn 'icha junc chen, an̈ec xo tic, lajn on̈c 'icha no chib'j tz'em 'a yojol, yujto colchjnacn̈ec xo 'eli, xchi eb'.

⁴ Yuj cha, al yab' eb' in paxti tic ach 'anma', xchi Dios 'ayin.

⁵ Xlajw cha, xjaw pax Yespíritu Jehová 'ayin, xyaln 'ixtic: Al 'a eb' 'anma cha, to an tzwal 'ixtc 'a eb': Ex israel, wojc wal si'mb'il tas wan yec' 'a e nab'en.

⁶ Caw wal tzniwtj chaml 'a yol e chon̈ab', b'ut'n yoltc caye yuj eb' 'anma tze mila.

⁷ Yuj cha, tzwaln an Jehová in 'ixtic: A chon̈b' Jerusalén, lajn wal 'icha junc lum chen. Ax jun chib'j cha, atn eb' 'anma tze milcn 'a yoltc caye, yuj cha, an 'oj ex wic' 'elt 'a yol jun chon̈b' tic.

⁸ Wojtac caw tzex xiw yuj owal, yuj cha, 'oj wa' cot owl 'a eyib'an̈.

⁹ 'Oj ex wic' 'elt 'a yol chon̈b' tic, ax wa'n 'och yailal 'a eyib'an̈, ax 'a yol sc'ab' eb' chuc chon̈b'al, ata 'oj ex wactcani.

¹⁰ 'Oj e tzu'x cham yet' q'uen espada 'a smon̈jonal e nacion̈ tic, ata 'oj ex in b'eyc'ojloc, ax in eyojcan 'eli, to an ton Jehová in, to cojn in ton Dios in.

¹¹ A jun chon̈b' tic, ma'oj 'och chenl 'ayex, man̈oc ex 'oj eyoch chib'jal chi 'a 'a, at 'a smon̈jonal e nacion̈ tic 'oj ex in b'eyc'ojloc,

¹² ax eyojcan 'eli, to an ton Jehová in. Ma'ix eyiclj in ley yet' in checnb'il, a sb'eyb'al jun tzo'n̈ xo nacion̈ 'ay 'a e la'nil, a xe b'eylb'ej, xchi Dios, xin chi 'a eb'.

¹³ Ya' sb'a wanto waln jun tzo'n̈ tic, ax xwiln win Pelatías yunnal Benaías 'ix cham winac. Yuj cha, in 'em cumn 'a sat lu'um, 'ix 'el waw, 'ix waln 'ixtc 'a Jehová: Mamin, ¿tom 'oj a wach' satc 'el jaywn̈ xo eb' wit israelal 'ix cob' can tic? xin chi 'a 'a.

Junx yac' trato Dios

¹⁴ 'Ix yaln pax Jehová 'ayn 'ixtic:

¹⁵ Ach 'anma', a eb' et israelal 'aycn 'a Jerusalén tzyal eb' 'ixtc eyu'uj yet' yuj eb' eyican 'ijxnac cot 'icha presoal: A eb' 'anma cha, caw wal najt 'ix 'ijxcan 'el eb' 'a stz'ey Jehová, ax lum lum tic, 'ix 'ajx can lum 'ayn̈ec, xchi eb'.

¹⁶ Yuj cha, al 'a eb' 'ijxnac cot 'icha presoal cha to an tzwal 'ixtic: Wach'xam najt ex in pechcn 'at 'a jun tzo'n̈ nacion̈, sactzicnac ex 'ajcn 'a yolyib'n̈q'uinl tic wu'uj, palta an 'ayn ec' eyet' 'aj 'ayx ec' cha yic tzeyaln e b'a 'ayin.

¹⁷ An 'oj ex in molb'tzoc cot 'a jun tzo'n̈ nacion̈ 'aj sactzicnac eyajcn 'ati, ax wa'n chon̈b' Israel tic eyico'oc.

¹⁸ 'Oj e meltzj paxt 'a e chon̈b' tic jun 'ejm xo, ax eyi'n 'el smasnil jun tzo'n̈ yechl comn dios yajb'entac yilx 'a e cal.

¹⁹ 'Oj wac' jun e nab'en caw wach', caw 'a'to, ax wi'n can 'el jun e nab'en to caw wal tzatz 'icha q'uen q'ue'en,

²⁰ sec 'oj e b'eylb'oc in checnb'il, ax eyiclni in ley. 'Oj eyoch in chon̈b'oc, ax woch e Diosaloc.

²¹ An Jehová in an tzwala. A eb' tznib'j to tzb'eylb'ej tas yajb'entac, an 'oj wac' syailal eb' yuj jun tzo'n̈ sb'eyb'al cha, xchi Dios 'ayin.

'Elnc stzictznil Dios 'a Jerusalén

²² Xlajw cha, sjen̈n 'el eb' querubín chi sc'axil, 'ix q'ue wan eb' yet' jun tzo'n̈ setet 'aych 'a yaln̈ cha. Ax stzictznil sDiosal chon̈b' Israel, a 'ay q'ue 'a yib'n̈ sjolm eb'.

²³ 'Ix yi'n 'el sb'a stzictznil Jehová 'a yib'n̈ chon̈b' Jerusalén, axta xc'ochcn b'achchoc 'a sjolm jun lum witz 'ay 'a sti 'el chon̈b' 'a stojlal 'aj tzq'uel c'u.

²⁴ Xlajw cha, in yi'n pax chan̈ Yespíritu Dios, in yi'n pax cot 'a scal eb' wit israelal 'icha preso yaj 'a Babilonia. A jun tic, 'icha wal waychil xwutj wiln yuj Yespíritu Dios, cojxn tic, man̈x 'a tas xwila.

²⁵ 'Ix in yamn 'och waln smasnil jun tzo'n̈ tic 'a eb' 'icha preso yaj cha, atn tas 'ix yac' Jehová wila'.