Ez 10 - Chuj San Sebastian Bible

Yijnac 'el Dios stzictznial 'a yatut

¹ Ax xwilni, a 'a yib'n̈ jun 'icha samq'uen pachn q'ue 'a yib'n̈ sjolm eb' querubín cha, ata 'ix checlj chan̈ jun 'icha yilx junc despacho, lajn wal yilx 'icha q'uen zafiro.

² 'Ix yaln Jehová 'a win lino spichl chi 'ixtic: 'Ochn̈ 'a snan̈l jun tzo'n̈ setet 'aych 'a yaln̈ eb' querubín tic, tze'n 'elt jun jopoc stzac'ac' 'a' scal eb' cha, tza tzicn 'at 'a scal chon̈ab', xchi. Q'ueln in 'och 'a jun winc cha, 'ix 'ochcn 'a jun cha.

³ Ax eb' querubín cha, ata 'ayc' eb' 'a spac'b'il yatut Dios 'a stojlal sur. 'Ix 'eml 'asun, xb'ut'j 'el yojl 'och sti yamq'uil yatut Dios cha.

⁴ Xlajw cha, ax Jehová yet' stzictznial, 'ix q'ue wan 'a yib'n̈ yechl eb' querubín cha, axta xq'ue'ch 'a yib'n̈ sjolm puerta. 'Ix sacb'chan̈ jun 'amc' chi yuj stzictznil Jehová, 'ix 'em t'ocn jun 'asn chi 'a yol scajnub' cha.

⁵ Ax eb' querubín cha, checl sc'an̈ sc'axl eb' chi 'a jun 'amc' 'a sti 'elt yatut Dios, lajn wal sc'an̈ 'icha yol sjaj Dios tztac' yuj smasnil yic tzpaxtini.

⁶ 'Ix yaln pax 'a win lino spichl chi 'ixtic: 'Ij 'elt te c'ac' chi 'a scal jun tzo'n̈ setet 'a yaln̈ eb' querubín cha, xchi. 'Ix 'at jun winc cha, axta xc'och lin̈n 'a stz'ey jun setet cha.

^7-8 A eb' querubín cha, a 'a yaln̈ sc'axl eb' ata 'ay 'elt sc'ab' junjn eb', lajn sc'ab' eb' chi 'icha sc'ab' 'anma'. Ax 'a scal eb', ata 'ay jun sjilb't sc'ab' chi 'a jun c'ac' cha. 'Ix yi'n cot jab' te c'ac' cha, xya'n 'ejm 'a yol sc'ab' win lino spichl cha, xlajw cha, 'ix 'at winac.

⁹ Ax xwilni, 'ayc' chan̈e setet chi yet' eb' querubín cha, junjn yic junjn eb'. A jun tzo'n̈ setet cha, lajn stzictznil yilx eb' 'icha q'uen crisólito.

¹⁰ Lajnn̈ej yaj jun tzo'n̈ setet chi sb'o'i. A junjn setet cha, cha'chb' yaji, colcnb'a yaj eb'.

¹¹ A yic tzb'ey eb' querubín chi 'a jun pac'oc, ata tz'at pax jun tzo'n̈ setet cha. Matz meltzj eb'. Tojln̈ej s'at eb' 'a yojltac, yaln̈ej 'aja junc pac' 'aj tzb'ey eb'.

¹² A sniwnal eb' querubín, yich spatquil eb', sc'ab' eb', sc'axl eb' yet' jun tzo'n̈ setet cha, nab'a yol sat sb'a.

¹³ Xwab'n yalx 'ixtc 'a jun tzo'n̈ setet cha, sulsni eyeq'ui, xchi.

¹⁴ A junjn eb' querubín cha, chan̈chn̈ sat junjn eb'. A jun sb'ab'l sat eb' cha, lajn yilx 'icha sat junc querube cha. Jun schab'il, lajn yilx 'icha sat 'anma'. Jun yoxil, lajn yilx 'icha sat no león, ax jun schan̈il, lajn yilx 'icha sat no salt'iw.

¹⁵ Xlajw cha, 'ix q'ue wan eb' querubín cha, atn eb' wiljnac 'a sti a niwn a Quebar.

¹⁶ A yic tzb'ey eb', tzb'ey pax jun tzo'n̈ setet chi yet' eb'. Ax yic tzq'ue wan eb' querubín chi 'a sat lu'um, tzjen̈l eb' sc'axl cha, tzq'ue pax wan jun tzo'n̈ setet chi yet' eb'.

¹⁷ A yic tz'och wan eb', tz'och wan pax jun tzo'n̈ setet cha, ax yic tzq'ue wan eb', tzq'ue wan pax jun tzo'n̈ setet cha, yujto ata 'ay spixn eb' querubín cha.

¹⁸ Xlajw cha, 'ix 'elx stzictznil Jehová 'a yib'n̈ sjolm puerta, 'ix c'ochx can 'a yib'n̈ sjolm eb' querubín cha.

¹⁹ Q'ueln in 'och 'a eb', 'ix yi'n chan̈ eb' sc'axil yic xq'ue wan eb' 'a sat lu'um, xq'ue wan pax jun tzo'n̈ setet chi yet' eb'. Axta 'ix 'och wan eb' 'a sti spuertail yatut Jehová 'a stojlal 'aj tzq'uel c'u, ax stzictznil sDiosal chon̈b' Israel, a 'ayc' 'a yib'n̈ eb'.

²⁰ Atn eb' querubín tic wiljnac 'a stz'ey qui Diosalec an̈ israel on̈c tic yic 'ayn 'ec' 'a sti a niwn a Quebar. Ata xwojquej can 'el eb', chajtlto querubín eb'.

²¹ A eb' querubín cha, chan̈chn̈ sat eb', chan̈chn̈ pax sc'axl eb', ax 'a yaln̈ sc'axl eb' chi 'ay 'elt sc'ab', lajn yilx 'icha sc'ab' 'anma'.

²² Lajn wal yilx sat eb' chi yet' eb' wiljnac yic 'ayn 'ec' 'a sti a niwn a Quebar. Junjn eb', tojln̈ej yajb't q'ueln eb' 'a yojltac yic tzb'ey eb'.