Ez 1 - Chuj San Sebastian Bible

Yiljnac Ezequiel stzictznil Dios

^1-3 An Ezequiel in tic, yunnaln win Buzi, an xin tz'ib'j jun libro tic. Ya'mal 'och sti eb' 'anma waj 'a Dios. Ata 'ayn 'ec' 'a sti jun a a tzcuch Quebar 'a yol yic Babilonia. 'Ayn 'och 'a scal eb' 'aj Judá 'ijxnac cot 'icha presoal. A 'a yic yol c'u yoch schan̈l 'uj yic ab'il 30, atn 'a yic tox 'ix 'ec' o'e ab'il yijx cot win rey Joaquín 'icha presoal, ata 'ix wil jun tic, 'icha to 'ix jacw satcha'an̈, 'ix sch'oxn sb'a Jehová Dios 'ayin, xya'n jawc spoder 'a wib'an̈.

⁴ Xlajw cha, xwiln scot jun niwquil 'ic' yet' jun niwquil 'asn 'a stojlal norte. A 'a scal cha, ata 'aych pax jun c'ac' caw tzn̈iln̈ni sc'aq'uil, jub'lji yec' sletz'lomal. Ax 'a scal jun c'ac' cha, ata 'aych jun tas caw tzictzni, lajn wal stzictznil yilx 'icha q'uen bronce.

⁵ Ax 'a spacl cha, ata 'aych chan̈wn̈ eb' ángel querubín sb'i, lajn yilx eb' 'icha 'anma',

⁶ palta to chan̈chn̈ sat junjn eb', chan̈chn̈ pax sc'axl eb'.

⁷ Tojln̈ej yaj 'ejm jiln yoc eb', ax samil yoc eb' cha, lajn yilx 'icha yoc wacax, caw tzictzni yilx 'icha q'uen bronce n̈icb'il 'el slumal.

⁸ A sat eb' yet' sc'axl eb' cha, 'ay 'a junjn pac', ax 'a yaln̈ junjn sc'axl eb' cha, ata 'ay 'elt sc'ab' eb' 'icha sc'ab' 'anma'.

⁹ Tzchaj sb'a sn̈i sc'axl eb' 'a yic tzb'ey eb'. Tojln̈ej yajb't q'ueln eb' 'a yojltac, matz meltzj xon eb' 'a yet'l cha.

¹⁰ A sat eb' 'a yojltac, lajn yilx 'icha sat 'anma'. A 'a swach' c'ab' eb', lajn yilx 'icha sat no león. A 'a surito eb', lajn yilx 'icha sat no wacax, ax 'a spatquil eb', lajn yilx 'icha sat no salt'iw. 'Ixtnta wal yilx sat eb' cha.

¹¹ Chab' sc'axl eb' chi tzjen̈li yic tzchan sb'a yet' yic junjn xo eb' cha, ax cha'chb' xo tzmacn sniwnal eb' cha.

¹² A yic tzb'ey eb', tojln̈ej sb'ey't eb' 'a yojltac, a 'aj tz'ijx 'at eb' yuj spoder Dios, matz meltzj xon eb' 'a yet'l cha.

¹³ A 'a scal eb' querubín cha, ata 'ay jun tas caw tzxexni 'icha stzac'ac', 'icha pax yilx junc tziclab'il taj tzn̈iln̈ni, 'ixta jun c'ac' cha, ax 'a scal, ata tzlaj 'elt letz'lo'om.

¹⁴ A eb' querubín cha, a yic tzb'ey eb' mto yic tzmeltzj pax eb', caw lajn yec' eb' 'icha letz'lom cha.

¹⁵ Ya' sb'a wanto wiln eb' querubín cha, ax xwilni to a 'a smoch junjn eb', ata 'ayc' junjn setet 'a sat lu'um.

¹⁶ A chan̈e setet cha, lajnn̈ej yaj eb' sb'o'i, 'icha yilx q'uen crisólito, 'ixta yilx eb'. Colcnb'a yaj eb' schan̈il.

¹⁷ A yic tzb'ey eb', tzta'n̈j sb'ey eb' 'a schan̈paq'uil, man̈ yowlalc tzmeltzj eb' 'a yet'l cha.

¹⁸ 'Ix wilni, to a chan̈e setet cha, caw niwc eb', caw wal 'ay smay yilxi, nab'a yolsat sb'a 'a stitac.

¹⁹ A yic tzb'ey eb' querubín cha, tzb'ey pax jun tzo'n̈ setet chi yet' eb', ax yic tzq'ue wan eb' querubín chi 'a sat lu'um, tzq'ue wan pax jun tzo'n̈ setet chi yet' eb'.

²⁰ Tzann̈j 'ajtil tz'ijx 'at eb' querubín chi yuj spoder Dios, ata tz'at eb', tz'at pax jun tzo'n̈ setet chi 'a spatc eb', yujto a 'a jun tzo'n̈ setet cha, ata 'ay spixn jun tzo'n̈ querubín cha.

²¹ A yic tzb'ey eb' querubín cha, tzb'ey pax jun tzo'n̈ setet cha, ax yic tz'och wan eb', tz'och pax wan jun tzo'n̈ setet chi 'a spatc eb'. A yic tzq'ue wan eb' 'a sat lu'um, tzq'ue pax wan jun tzo'n̈ setet chi yet' eb', yujto a 'a jun tzo'n̈ setet chi 'ay spixn eb' querubín cha.

²² Ax 'a yib'n̈ sjolm eb', ata pachn q'ue jun samq'uen 'icha yilx cristal, satjub'tac yilx yaj q'ue 'a sjolm eb' cha.

²³ A 'a yaln̈ jun pachn q'ue 'a sjolm eb' cha, ata tojl yajl jen̈n sc'axl eb' cha, tzchan sb'a yet' yic junjn eb'. Ax cha'chb' xo sc'axl eb' chi tzmacn 'el sniwnal.

²⁴ 'Ix wab'n sc'an̈ sc'axl eb' yic tz'at jen̈n̈oc eb'; lajn wal sc'an̈ 'icha sc'an̈ a 'elmal a', 'icha wal yol sjaj Dios jun tztac' yuj smasnil, 'icha pax sc'an̈ sb'ey nan̈loc eb' soldado. A yic tz'och wan eb', tzyi'n 'ejm eb' sc'axl cha.

²⁵ A yic tzyi'n 'ejm eb' sc'axl cha, 'ix wab'n yoch jun paxti 'a yib'n̈ jun jen̈n 'ec' 'a yib'n̈ sjolm eb' cha.

²⁶ A 'a yib'n̈ jun jen̈n 'ec' cha, ata b'achn q'ue jun despacho caw wach' yilx 'icha q'uen zafiro, ax 'a jun despacho cha, ata wocn 'ejm jun 'icha yilx junc winac.

²⁷ 'Ix wilni, a yib'n̈ q'uet snan̈al, lajn wal yilx 'icha q'uen bronce tzictzni yilxi. Caw tzn̈ilchj sc'aq'uil, ax 'a yaln̈ 'emt snan̈l cha, lajn wal yilx 'icha c'ac'. Tzictzni yilx 'a stitc cha,

²⁸ 'icha yilx chacpan 'a scal 'asun yic tzya'n n̈ab', 'ixta yilx sc'ac'l jun chi 'a stitac. 'Ixta wal xwutj wiln stzictznil Jehová. A yic xwiln cha, in 'em n̈ojn 'a sat lu'um, axn cha, 'ix wab'n spaxtin 'ayin.