Ex 9 - Chuj San Sebastian Bible

Yab'il 'a e no cajb'en noc'

¹ Xlajw cha, xyaln Jehová 'ixtc 'a Moisés: —'Ixc 'at 'ilt pax win rey cha, tzaln 'a 'ixtic: A Jehová qui Diosal an̈ israel on̈ tic on̈, a tzaln 'ixtc 'ayach: Chaj 'at eb' in chon̈b' tic, yic tz'at ya'nc eb' 'emmquilal 'ayin.

² Toto matz a chaj 'at eb', an̈ja tza yamch wan eb',

³ 'oj cot wowal, ax wa'n cot syab'il e cajb'en noc' ax 'aj Egipto ex tic. 'Oj cham smasnil no chej, no wacax, no cameyo, no b'uru, no calnelu yet' no chiwo.

⁴ Cojn no e cajb'en noc' chi 'oj chamoc, ax pax no scajb'en noc' eb' israel, may junc no 'oj chamoc, xchi Jehová, xa chi, xchi Dios.

⁵ 'Ix yaln can pax Jehová tas c'ul 'oj jawc jun yab'il cha, xyaln 'ixtic: —Q'uic'an tzwa' cot jun yab'il cha, xchi.

⁶ Ax 'a junx c'u cha, 'ix ya'n cot Jehová jun yab'il chi 'a yib'an̈ no cajb'en noc' cha. Til wal no scajb'en noc' eb' 'aj Egipto chi xchami; ax pax no yic eb' israel, may junc no yic eb' chi xchami.

⁷ Xlajw cha, 'ix ya'n win rey 'ilxoc, toto yel may junc scajb'en noc' eb' israel chi xchami. 'Ixta 'ix uji, palta an̈ja 'ix pitb' 'el snab'en win rey chi jun 'ejm xo, ma'ix chaj 'elt win eb' israel cha.

'Ix pitzw chan̈ yaxc'a yab'il

⁸ Xlajw cha, 'ix yaln Jehová 'a Moisés yet' 'a Aarón 'ixtic: —'At 'ijec cot jun jopoc stan̈il c'ac' 'a junc jorna, ach xo ach Moisés ach tic, ach tza tzic chan̈ jun stan̈il c'ac' chi 'a yojltac win rey.

⁹ 'Oj 'och jun tan̈ chi poccal, 'oj pucb't 'a yol smasnil smacb'en Egipto tic, ax spitzw chan̈ yab'il 'a smasnil 'anma', yet' 'a no noc' yuj q'uen tan̈ cha, xchi.

¹⁰ Xlajw yab'n Moisés yet' Aarón jun cha, 'ix 'at eb' 'a jun jorna 'at yi' cot q'uen tan̈ cha. Xlajw cha, 'ix 'atx eb' 'at yil win rey cha. Ax yic 'ix c'och eb' 'a winac, 'ix stzicn chan̈ Moisés q'uen stan̈il c'ac' chi 'a yojltac win rey cha. Yajn̈j wal cha, 'ix 'el-l yaxc'a yab'il 'a sniwnal smasnil 'anma', yet' 'a smasnil no noc'.

¹¹ Ax ewin tzyal jelnal sb'a cha, man̈x 'ic sch'ox ewin yic 'a Moisés, yujto ya'ay ewin yuj yab'il, yet' smasnil 'anma 'a Egipto cha.

¹² Palta 'ix pitb' 'el pax snab'en win rey jun 'ejm xo yuj Jehová, 'icha wal yutjnac Jehová yalni. Ma'ix schaj win yab' tas 'ix yal Moisés yet' Aarón.

Yailal yuj q'uen sacb'at

¹³ Xlajw cha, 'ix yaln pax Jehová 'ixtc 'a Moisés: —Tzach seb' q'ue wan q'uic'an, tzach 'at paxtinc yet' win rey cha, tzaln 'a 'ixtic: A Jehová qui Diosal an̈ israel on̈ tic, a tzaln 'ixtc 'ayach: Chaj 'at eb' in chon̈b' tic, yic tz'at ya'nc eb' 'emmquilal 'ayin.

¹⁴ A 'a yic jun tiempoal tic, 'oj wa' cot jun tzo'n̈ yailal 'a eb'an̈, 'a yib'n̈ eb' 'aych yajlil et'oc, yet' 'a yib'n̈ smasnil 'anma'. A yuj jun yailal cha, ax ojcan 'eli, to may junc xo mach tztac' slajb'tzan sb'a wet' 'a yolyib'n̈q'uinal.

¹⁵ Toto tzyal in c'ojol, tztac' in ch'oxn in poder 'ayach, tzwa'ch yailal 'a eb'an̈, yet' 'a yib'n̈ smasnil 'anma 'a jun nacion̈ tic, tztac' tzex in satl 'a sat lum lum tic.

¹⁶ Palta mantzac ach in satli, sec wach' 'oj checljoc 'el in poder yuj tas 'oj ach wutoc. Ax eb' 'anma 'a yolyib'n̈q'uinl tic, c'uxn 'oj laj yab' eb', to caw niwn wel'chi.

¹⁷ Wach'xam til wal jun tzo'n̈ yailal tzin ch'ox ela', palta an̈j 'ijnoc tza pitb'tzej a b'a, matz a chaj 'at eb' in chon̈b' tic.

¹⁸ Yuj cha, q'uic'an yab'n wal 'icha hora tic, ax wa'n 'ejm q'uen sacb'at 'a yib'n̈ jun chon̈b' tic, jun niwquil sacb'at to mant 'a 'aj tzyac' xon 'a yictax yel yich sb'o chon̈b' Egipto tic.

¹⁹ Yuj cha, 'a'c 'och smasnil no e cajb'en noc' 'a yol yet'ul, yet' smasnil tas 'ay 'a scal e munljel. 'A'c molxoc, yujto a yic 'oj jawc q'uen niwc sacb'at cha, smasnil no noc', smasnil 'anma', toto ma'oj 'och 'a yol yet'ul, 'oj cham yuj q'ue'en, xchi Dios.

²⁰ Ax ewin 'aych yajlil yet' win rey cha, caw wal xiw chan̈ eb', yic xyab'n eb' tas xyal Jehová. Yuj cha, 'ix laj ya'nq'ue eb' yen̈l scajb'en noc' cha, yet' smasnil eb' smoso eb', 'ix laj 'ochcn eb' 'a yol n̈a.

²¹ Palta 'ay pax jun tzo'n̈ xo eb' ma'ix schaj yab' tas xyal Jehová, ma'ix smol eb' scajb'en noc', yet' eb' smoso eb', ma'ix smol sb'a eb'.

²² Xlajw cha, xyaln Jehová 'ixtc 'a Moisés: —'Ij chan̈ a c'ab' 'a satcha'an̈, sec 'oj cot niwc sacb'at 'a yib'n̈ smasnil 'anma', 'a yib'n̈ smasnil no noc', yet' 'a yib'n̈ smasnil 'awb'en 'ay 'a yol yic Egipto tic, xchi Dios.

²³ Xlajw xoj cha, xyi'n chan̈ Moisés sc'ab' 'a satcha'an̈, ax Jehová 'ix 'a'n c'an̈ c'u, 'ix laj 'ec' letz'lo'om, 'ix 'em niwc sacb'at 'a sat smasnil lum lum 'a yol yic Egipto.

²⁴ Man̈xtzac 'och wan sma'n sb'a c'u, man̈x yalnb'ilc q'uen sacb'at chi tz'ejmi, coplji yec' letz'lo'om, mant 'a 'aj tzb'inax jun 'ejmoc q'uen sacb'at chi 'a yol yic Egipto, 'icha jun 'ix yac' cha.

²⁵ Smasnil tas c'uxn 'ix juw yuj q'uen sacb'at cha. A eb' 'anma ma'ix scol sb'a yet' scajb'en noc', c'uxn 'ix cham eb' yet' smasnil tas 'aycn yuj 'a scal smunljel. 'Ix laj lo'chj can pax te te yuj q'ue'en, c'uxn 'ix lajw smasnil.

²⁶ Palta ax 'a lum Gosén, 'a 'aj cajn eb' israel cha, may xon jun c'otc q'uen sacb'at chi 'ix 'ejm ta'.

²⁷ Yuj cha, xya'n win rey chi 'awtxoc cot Moisés yet' Aarón, xyaln win 'ixtc 'a eb': —'Ix nachj 'el wuj ticnec, chajtlto an 'ay in mul yet' eb' wit chon̈b' tic, al Jehová caw wal tojl yet' tas tzb'o'o.

²⁸ 'In caw wal tz'ec' 'a yib'n̈ sma'n sb'a c'u, yet' yejm q'uen sacb'at tic. Yuj cha, man̈x 'oj wi'c tiempo 'ayex, tztac' e 'at 'a 'ajtil tzeyal cha. Leslwan̈c 'a Jehová, sec tzyij 'el jun yailal tic 'a quib'n̈ on̈, xchi winac.

²⁹ 'Ix ta'w Moisés 'a win rey chi 'ixtic: —Cojn wal tzin 'el 'a yol chon̈b' tic, ax in mojnq'ue in c'ab' in leslwi 'a Jehová. Ax in c'ann 'a 'a, sec 'oj 'och wan ya'n q'uen sacb'at tic, man̈x 'oj smac' sb'a c'u. 'Ixta 'oj 'aj snachj 'el 'oj ach tic, chajtlto a Jehová yajl yaj 'a smasnil yolyib'n̈q'uinl tic.

³⁰ Palta wojc wal si'mb'il, chajtlto ach tic yet' eb' 'aych yajlil et'oc, mant 'a jac e xiwc'ojlal 'a Jehová Dios, xchi Moisés 'a win rey cha.

^31-33 A yic xlajw spaxtin Moisés yet' win rey cha, 'ix 'elt 'a sti 'elt chon̈b' cha, smojnq'ue sc'ab' 'a satcha'an̈, 'ix leslwi 'a Jehová. Yajn̈j wal cha, 'ix 'och wan q'uen sacb'at, 'ix 'och wan yem n̈ab', xyactn sma'n sb'a c'u. A smasnil te lino 'ayx snich yet' 'ixm cebada 'ayx sat, c'uxn 'ix lajw jun tzo'n̈ cha; ax 'ixm trigo yet' te centeno, may wal tas 'ix 'i'ni, yujto tza'n to tz'el-l jun tzo'n̈ cha.

³⁴ Ax yic 'ix yiln win rey to man̈x 'a n̈ab', man̈x 'a pax q'uen sacb'at, man̈x 'a c'u tzc'an̈i, yuj cha, 'ix 'ochx smul win jun 'ejm xo. Xpitb' pax 'el snab'en win yet' eb' 'aych yajlil chi yet'oc.

³⁵ Ma'ix schaj 'elt win eb' israel cha, yujto 'ix pitb' 'el snab'en win 'icha wal xyutj Jehová yalni.