Ex 8 - Chuj San Sebastian Bible

¹ 'ix yaln pax Jehová chi 'a Moisés 'ixtic: —'At 'ilt win rey cha, tzaln 'ixtc 'a winac: A Jehová a tzaln 'aych 'ixtic: Chaj 'at eb' in chon̈b' tic, yic tz'at ya'nc eb' 'emmquilal 'ayin.

² Toto matz a chaj 'at eb', 'oj wa'ch yailal 'a eb'an̈, 'oj wac' pitzwc e no pajtza 'a yol smasnil a nacion̈ tic.

³ 'Oj wac' pitzwc no 'a yol a a smasnil: c'uxn 'oj c'och no 'a yol a despacho, 'a 'aj tzach wayi, 'a sat a ch'at, 'a yol yatut eb' 'aych yajlil et'oc, 'a yol yatut smasnil 'anma', 'a yol jorna 'aj tzb'o 'ixm pan tza wa'aj, yet' pax 'a sat te 'a'nte 'aj tzcalx 'ixim.

⁴ 'Oj laj 'ec' no 'a eb'an̈, 'a yib'n̈ eb' 'aych yajlil et'oc, yet' 'a yib'n̈ smasnil 'anma', xchi Jehová, xa chi 'a 'a, xchi Dios.

⁵ 'Ix yaln pax Jehová 'ixtc 'a Moisés: —Al 'a Aarón to tzya't sc'occh 'a yib'n̈ smasnil a niwn a', a cotc b'eymal a', yet' 'a yib'n̈ smasnil a niwc pam a', sec ata 'oj q'uelc no pajtza', ax sb'ut'j 'el yol yic Egipto tic yuj no', xchi.

⁶ Xlajw cha, 'ix ya'n 'at Aarón sc'occh 'a yib'n̈ smasnil a a 'ay 'a yol yic Egipto. Yajn̈j wal cha, 'ix q'uel tzicn̈joc no pajtza', 'ix laj pucb't no 'a smasnil yol yic Egipto cha.

⁷ 'Ixta 'ix yutj pax eb' tzyal jelnal sb'a chi yet' tas cuyb'il yu'uj, 'ix yij cot eb' no pajtza 'a yol yic Egipto.

⁸ X'ec' jaye c'u, xlajw cha, 'ix 'awtx 'at Moisés yet' Aarón yuj win rey cha, 'ix yaln win 'a eb' 'ixtic: —Leslwan̈c 'a Jehová, to tzyij 'el e no pajtza tic 'ayn yet' eb' wit chon̈b' tic, sec tzex wa'l 'a libre, yic tz'at eya'nc e xajmb'al 'a Jehová cha, xchi.

⁹ 'Ix yaln Moisés 'a win rey chi 'ixtic: —Al 'an, b'a'n̈ tzin leslwi 'a Jehová eyu'uj, yic tzyi'n 'el no pajtza tic 'ayex, yet' 'a yojl a despacho tic, sec cojxn 'a yojl a a tzcan e no', xchi Moisés.

¹⁰ —¡Q'uic'an! xchi win rey cha. Xlajw cha, 'ix yaln Moisés: —B'o cab' 'icha tzotj aln cha, sec 'oj ojcoc 'eli, to may junc xo mach lajn spoder 'icha Jehová qui Diosal on̈.

¹¹ 'Ixta 'oj 'aj yel no pajtza tic 'a a despacho, 'a yatut eb' 'aych yajlil et'oc yet' pax 'a scal smasnil 'anma'; cojxn̈ej no 'ay 'a yojl eb' a a 'oj canoc, xchi Moisés.

¹² Xlajw xoj cha, 'ix 'el paxt Moisés yet' Aarón 'a yojltac win rey cha, 'ix sc'ann Moisés 'a Jehová to tz'el smasnil no pajtza chi 'a win rey.

¹³ 'Ix yab' Jehová tas 'ix sc'an cha, yuj cha, 'ix cham smasnil no pajtza 'a yoltc n̈a, 'a 'amac', yet' 'a calte'.

¹⁴ 'Ix laj si'nc syam sb'a eb' 'anma chi smasnil no chamnc pajtza cha, b'ulctac xlaj yutc can eb' no 'a smasnil lugar, caw wal tu x'ec' sjab' no'.

¹⁵ Cojn wal yic 'ix yiln win rey chajtlto man̈x 'a jun yailal cha, 'ix ya'n win pitb'oc pax 'el snab'en jun 'ejm xo, 'icha wal xyutj Jehová yalni. Ma'ix schaj win yab' tas xyal Moisés yet' Aarón.

'Ix pitzw chan̈ no 'us

¹⁶ Yuj cha, 'ix yaln Jehová 'ixtc 'a Moisés: —Al 'a Aarón to tzyij chan̈ sc'ococh, tzma'n 'ejm 'a yib'n̈ spoccal lum lum tic, sec tz'och lum pocc chi 'usal. 'Oj pitzwc no 'us chi 'a smasnil yol yic Egipto tic, xchi.

¹⁷ Yajn̈j wal cha, 'ix sma'n 'ejm Aarón chi sc'occh 'a yib'n̈ lum pococ cha, ax smasnil lum pococ 'ay 'a yol yic Egipto, 'ix 'och lum 'usal, syamn 'och no schin eb' 'anma', yet' smasnil no noc'.

¹⁸ 'Ixta pax 'ix yutj eb' tzyal jelnal sb'a chi yet' cob' yico', sb'on eb' yic 'icha 'ix yutj Aarón cha. Snib'j eb' x'och lum pococ chi 'usal, palta man̈x 'ic stac' yuj eb'. Ax no 'us cha, caw tzchi no eb' 'anma', yet' smasnil no noc'.

¹⁹ Xlajw cha, 'ix yaln eb' tzyal jelnal sb'a chi 'a win rey chi 'ixtic: —A jun tic, smunljel Dios, xchi ewinac. Palta an̈j 'ijnoc 'ix pitb' 'el snab'en win rey, 'icha wal yutjnac Jehová yalni. Ma'ix chaj win yab' tas 'ix yal Moisés yet' Aarón.

'Ix pitzw chan̈ no tzac'

²⁰ 'Ix yaln pax Jehová 'a Moisés 'ixtic: —A yic q'uic'an 'a caw sq'uin̈b'il to, 'oj 'at win rey 'a sti a niwn a'. Yuj cha, tzach caw seb' q'ue wa'an, tz'at alnc 'a winac to an Jehová in, an tzwal 'ixtic: Chaj 'at eb' in chon̈b' tic yic tz'at ya'nc eb' 'emmquilal 'ayin.

²¹ Palta toto ma'oj a'l eb' in chon̈b' tic, man̈x jantcoc no tzac' 'oj wa' cot 'a eb'an̈, 'a yib'n̈ smasnil eb' 'aych yajlil et'oc, yet' 'a yib'n̈ smasnil 'anma 'a sat lum lum tic.

²² A yic 'oj ujc jun cha, may junc no tzac' chi 'oj 'ec' 'a yol yic Gosén, 'a 'aj 'ayc' eb' in chon̈ab'. 'Ixta wal 'oj 'aj ojcan 'eli to an Jehová in, to 'aynn̈ej 'ec' 'a smasnil yolyib'n̈q'uinl tic.

²³ A eb' in chon̈b' tic, chuc yel eb' 'a yib'n̈ eb' a chon̈ab', man̈ lajnoc yilx eb' 'a in sat. Q'uic'an tz'ec' can no tzac' cha, xchi Jehová, xa chi 'a win rey cha, xchi Dios.

²⁴ 'Ix 'el'ch 'icha wal 'ix yutj Jehová yalni, 'icha wal 'asun, 'ixta yec' no tzac' yic 'ix c'och no 'a yol sdespacho win rey, 'a yol yatut eb' 'aych yajlil yet' winac, yet' 'a smasnil yol yic Egipto cha. Caw 'ix juw 'el yol chon̈b' chi yuj no'.

²⁵ Yuj cha, 'ix yawtn cot win rey chi Moisés yet' Aarón, 'ix yaln win 'a eb' 'ixtic: —'Ixquec 'at 'a'c e xajmb'al 'a e Diosal cha, palta matz ex 'el 'a yol yic Egipto tic, xchi winac.

²⁶ 'Ix ta'w Moisés, xyaln 'ixtic: —Matz tac' 'ixta', yujto a no noc' tzcac' xajmb'al-l 'a Jehová qui Diosal on̈, niwn yel'ch no 'a e sat ax 'aj Egipto ex tic. Yuj cha, toto tzyil eb' 'anma qui ma'n cham no noc' chi 'on̈, wal yel tzon̈ sjulq'uenej eb' on̈.

²⁷ Yuj cha, yowlal tzon̈ 'at 'a cusltac lum on̈, ata 'oj 'at cac' qui xajmb'al 'a Jehová qui Diosal on̈, 'icha yutjnac yalni. 'Oxe c'u ste'nb'il jun lugar 'aj tzon̈ 'at chi 'on̈, xchi Moisés.

²⁸ 'Ix yaln pax win rey chi 'ixtic: —Tztac' e 'at 'a lum cusltac lum cha, yic tz'at eya'nc e xajmb'al 'a Jehová e Diosal cha, cojn toto man̈ najtoc tzex 'ati. Tzex leslwi pax 'a Dios chi wu'uj, xchi win rey cha.

²⁹ 'Ix ta'w pax Moisés 'ixtc 'a winac: —Cojn wal tzin 'el 'a tic, ax in tew 'a Jehová to tz'el no tzac' tic q'uic'an. 'Oj 'el e no 'a tic, 'a 'aj 'ay eb' 'aych yajlil et'oc, yet' 'a smasnil 'anma 'a jun nacion̈ tic. Palta b'i'an, man̈x on̈ extc on̈, man̈x 'a cab' tas tzal 'ayn̈ on̈ yic 'oj 'at ca'nc qui xajmb'al chi 'a qui Diosal chi 'on̈, xchi Moisés.

³⁰ 'Ix 'elt Moisés 'a yol sdespacho win rey cha, xleslwi 'a Jehová.

³¹ Xyab'n Jehová tas 'ix sc'an Moisés, yuj cha, 'ix 'el no tzac' chi 'a 'aj 'ayc' win rey, 'a 'aj 'ayc' eb' 'aych yajlil yet' winac, yet' 'a smasnil 'anma', man̈x 'a junc no 'ix cani.

³² Palta 'ix pitb' 'el pax snab'en win rey chi jun 'ejm xo, ma'ix schaj 'elt win eb' israel cha.