Ex 7 - Chuj San Sebastian Bible

¹ Xlajw cha, 'ix yaln pax Jehová 'a Moisés 'ixtic: —'Ilto, ach tzach 'och 'a yojltac win rey chi in jeloc, ax o'tac Aarón cha, a 'oj paxtinc a jeloc.

² A smasnil tas tzwac' ala', al 'a o'tac chi smasnil, ax 'oj alnoc 'a win rey cha, sec 'oj ex ya'l win 'a Egipto tic.

³ An xo 'oj wac' pitb'oc snab'en win rey cha, sec 'oj ste'wtzoc sb'a, ya' sb'a cha, til wal jun tzo'n̈ tas satjub'tac 'oj in ch'ox 'ilxoc 'a Egipto tic.

⁴ A win rey cha, ma'oj scha win yab' tas 'oj eyala', palta 'oj in ch'ox in poder yil win rey cha, yic tzwa'n cot yailal 'a yib'n̈ eb' 'aj Egipto tic, 'ixta 'oj wutc ex wi'n 'elta.

⁵ A yic tox xin ch'ox in poder yet' 'a yic tox ex wij 'elt 'a jun nacion̈ tic, 'ixta to b'i'an, ax snachj 'el yuj eb' 'aj Egipto tic, to an ton Jehová in, xchi Dios 'a Moisés.

⁶ Syiclj Moisés yet' Aarón sb'on 'icha tas 'ix yal Jehová.

⁷ A Moisés 'ay 80 ab'il sq'uinal, ax win Aarón 'ay 83 ab'il sq'uinal yic xpaxtin eb' yet' win sreyl Egipto cha.

Te sc'occh Aarón

⁸ 'Ix yaln pax Jehová 'a Moisés yet' 'a Aarón 'ixtic:

⁹ —Toto tzc'an win rey chi yil junc milagro 'ayex, tzal 'a Aarón tic, to tzjul 'ejm sc'occh chi 'a sat lum 'a yojltac win rey cha, yajn̈j wal cha, ax yoch te c'occh chi chanil, xchi Dios.

¹⁰ Xlajw cha, 'ix 'at Moisés yet' Aarón 'a yojltac win rey cha, sb'on eb' 'icha xyutj Jehová yalni: 'Ix sjuln 'at Aarón te sc'occh chi 'a yojltac win rey yet' smasnil ewin 'aych yajlil yet' winac, yajn̈j wal cha, 'ix 'och te c'occh chi chanil.

¹¹ Yuj cha, 'ix yawtn cot win rey chi ewin jelan, yet' ewin 'ay tas tztac' yu'uj, 'ix sb'on pax ewin yic 'icha xyutj Aarón yic cha.

¹² Sjuln pax 'ejm eb' sc'occh chi 'a sat lu'um, yajn̈ej 'ix 'och pax chanil. Palta 'ix sb'uc' 'ejm te sc'occh Aarón chi te yic ewin jeln cha.

¹³ Palta ma'ix schaj xon win rey chi yab' tas xyal eb' chawn̈ cha, 'icha 'ix yutj Jehová yalni. 'Ix yac' pitb'oc 'el snab'en win rey cha.

'Ix 'och a a chic'al

¹⁴ Xlajw cha, 'ix yaln Jehová 'a Moisés 'ixtic: —'Ix pitb' 'el snab'en win rey cha, matz yal sc'ojl win tzex ya'l 'a libre.

¹⁵ A q'ui'n 'a caw sq'uin̈b'il to, tzach 'at el win rey chi 'a sti a niwn a Nilo. Tza tan̈wni sc'och win ta', tze'n 'at te 'a c'occh chi et'oc, te 'ochnc chanil.

¹⁶ Ata tzal 'ixtc 'a winac: A Jehová qui Diosal an̈ israel on̈ tic on̈, a tzin checn cot 'ayach; to tza'l eb' wit chon̈b' tic 'a libre yic tz'at ca'nc 'emmquilal 'a qui Diosal 'a lum cusltac lum chi 'on̈; palta 'in an̈ja matz a chaj ab'i'.

¹⁷ Yuj wal cha, xyaln Jehová oj 'ixtic: A ticnec, yuj tas 'oj in ch'ox ela', ax ojcan 'eli chajtlto an Jehová in. A yic 'oj in ma'nc 'ejm in c'occh 'a yib'n̈ a a tic, yajn̈ej ax yoch a a tic chic'al.

¹⁸ Smasnil no chay 'ay 'a yojl a Nilo tic 'oj chamoc, ax yaj sjab' a', man̈x 'a junc eb' 'aj Egipto 'oj stac' yu'n a', xchi Dios, xchi Moisés.

¹⁹ An̈jtona', 'ix yaln pax Jehová 'a Moisés 'ixtic: —Al 'a Aarón to tzya't sc'ab' yet' sc'occh 'a yib'n̈ smasnil a a 'a yol yic Egipto tic: a spac'b'a', a cotc a', a ton̈j pan̈n 'eq'ui, a 'ay 'a yol q'ue'en yet' a 'ay 'a yol jucub', 'oj 'och eb' a chic'al. An̈jtona a molb'il 'a yol b'el, 'a yol tzu, 'a yol q'uen ch'ub', c'uxn 'oj 'och a chic'al, xchi.

²⁰ 'Icha wal 'ix yutj Jehová yaln cha, 'ixta 'ix yutj Moisés yet' Aarón. 'Ix yi'n chan̈ Aarón te sc'occh cha, 'ix sma'n 'ejm 'a yib'n̈ a Nilo 'a yojltac win rey, yet' 'a sat smasnil eb' 'aych yajlil yet'oc. Yajn̈j wal cha, 'ix 'och a a chic'al.

²¹ Smasnil no chay 'ay 'a yojl a Nilo cha, 'ix cham no', caw wal 'ix 'aj sjab' a', man̈x 'a mach tztac' yu'n a', chic'xn̈ej x'aj a smasnil 'a yol yic Egipto.

²² Palta 'ixta pax 'ix yutj ewin tzyal jelnal sb'a chi yet' yico', ewin 'ay tas cuyb'il yuj 'a yol yic Egipto cha. 'Ix pitb' pax 'el snab'en win rey chi jun 'ejm xo, 'icha 'ix yutj Jehová yalni. Ma'ix schaj win yab' tas xyal Moisés yet' Aarón.

²³ May xon jac yel'ch jun chi 'a win rey cha, 'ix paxx win 'a sdespacho.

²⁴ Ax smasnil eb' 'anma 'a yol yic Egipto cha, 'ix sb'o eb' yuc'b'il a 'a sti a niwn a cha, yujto a smasnil a a 'a yol yic Egipto, man̈xtzac stac' yu'x a'.

'Ix pitzw no pajtza 'a yojl eb' a a'

²⁵ Yucb'ixial xo yoch a a chi chic'l yuj Jehová,