Ex 6 - Chuj San Sebastian Bible

¹ 'Ix ta'w Jehová 'a Moisés 'ixtic: —'Ojt el wal nab'an tas 'oj wutc win sreyl Egipto tic yet' in poder. Teb'il 'oj ex ya'l 'a yol schon̈b' tic, palta caw a win 'oj alnoc ax eyeli, xchi.

'Ix 'awtx pax Moisés yuj Jehová

² 'Ix yaln pax Jehová 'ixtc 'a Moisés: —An tic Jehová in.

³ An in ch'oxjnac in b'a 'a Abraham, 'a Isaac yet' 'a Jacob, Dios in, tztac' wuj smasnil. Cojn to ma'ix wac' yojcoc 'el eb' in b'i tic: TO AN JEHOVÁ IN.

⁴ 'Ix in b'o jun in trato yet' eb', xwac' in ti wa'n lum Canaán 'a eb', lum 'aj 'e'nc eb' 'a pecti'.

⁵ A ticnec, 'ix wab'i to caw 'oltac tz'aj eb' et israelal 'a Egipto tic, caw wal tz'ixtx eb' 'a munljel yuj eb' yajl munljel. Yuj cha, 'ix in nan coti, to 'ay in trato can yet' eb' e mam eyicham.

⁶ A ticnec jun, 'at al 'a eb' et israelal cha, to an Jehová in, an tzwal 'ixtic: 'Oj ex in col-l 'a 'aj 'ayx 'och mosoal tic, 'aj 'oltac tzex 'aj yuj munljel. 'Oj in ch'ox in poder 'a eb' 'aj Egipto tic, to 'oj wa'ch niwc yailal 'a yib'n̈ eb'. 'Ixta 'oj ex wutc ex in coln 'el 'a yol sc'ab' jun chon̈b' tic.

⁷ 'Oj ex wi'ch in chon̈b'oc, ax woch e Diosaloc. 'Ixta 'oj eyutc eyojcan 'eli to an ton Jehová in, e Diosal in. An tzex in col-l 'a yol sc'ab' eb' 'aj Egipto tic.

⁸ 'Oj ex wi't 'a sat lum lum 'aj wa'jnac in ti wa'n 'a Abraham, 'a Isaac, yet' 'a Jacob. An Jehová in tic, an 'oj wac' lum 'ayex, to caw eyic 'oj 'aj lu'um, xchi Jehová, xa chi 'a eb', xchi Dios.

⁹ A smasnil tas 'ix yal Jehová, a 'ix yal Moisés 'a eb' yit israelal, palta matz chaj eb' yab'i', yujto caw 'ay somc'ojlal eb', caw 'aych eb' 'a syal munljel.

¹⁰ Yuj cha, xyaln pax Jehová 'ixtc 'a Moisés:

¹¹ —'Ixic, 'at al 'a win rey cha, to tzex ya'l win 'a libre 'a sat slum tic, xchi.

¹² Palta 'ix yaln Moisés 'ixtc 'a Jehová: —'Intax matz chaj eb' wit israelal chi yab' tas tzwala, ocxom wal win rey cha, ¿tom 'oj scha win yab' tas 'oj wala'? 'In to matz tac' wal pax in paxtini, xchi Moisés.

¹³ Yuj cha, 'ix schecn 'at Jehová Moisés yet' Aarón paxtinc 'a eb' yit israelal, yet' 'a win sreyl Egipto cha. Alb'ilx 'a eb', to yowlal a eb' tz'i'n 'elt eb' yit chon̈b' chi 'a Egipto cha.

A smam yichm Moisés yet' Aarón

¹⁴ Atn stzol-l eb' yajl yaj 'a junjn macn̈il eb' israel tic: Rubén, win sb'ab'l 'unnal Israel, eb' yunnal winac, atn eb' tic: Hanoc, Falú, Hezrón yet' Carmi; a eb' tic yajl yaj 'a scal eb' yin̈tl Rubén cha.

¹⁵ Eb' yunnal Simeón, atn eb' tic: Jemuel, Jamín, Ohad, Jaquín, Zohar yet' Saúl yune can jun 'ix 'aj Canaán; atn eb' tic yajl yaj 'a scal eb' yin̈tl can Simeón.

¹⁶ A Leví 137 ab'il 'ix yila. Ax eb' yunnal, atn eb' tic: Gersón, Coat, yet' Merari.

¹⁷ Eb' yunnal Gersón, atn Libni, yet' Simei; til wal pax yunnal eb' x'elxi.

¹⁸ A win Coat cha, 133 ab'il 'ix yila. Ax eb' yunnal, atn eb' tic: Amram, Izhar, Hebrón, yet' Uziel.

¹⁹ Eb' yunnal Merari, atn Mahli yet' Musi. A eb' tic yajl yaj 'a scal eb' yin̈tl can Leví, yet' yunnal junjn eb'.

²⁰ A win Amram cha, 'ix yij sb'a yet' jun 'ix yanb' smam, Jocabed sb'i 'ix; atn eb' tic 'ay yunnal 'a Aarón yet' Moisés. 127 ab'il 'ix yil Amram cha, 'ix chami.

²¹ Eb' yunnal Izhar, atn Coré, Nefeg yet' Zicri.

²² Eb' yunnal Uziel, atn Misael, Elzafán yet' Sitri.

²³ Ax Aarón 'ix yij sb'a yet' 'ix Elisabet, yisl Aminadab yanb' Naasón, xlajw cha, 'ix 'alj yunnal eb', atn Nadab, Abiú, Eleazar yet' Itamar.

²⁴ Eb' yunnal Coré, atn Asir, Elcana yet' Abiasaf. A eb' tic yin̈tl Coré eb'.

²⁵ A Eleazar yunnal Aarón, 'ix yij sb'a yet' 'ix yisl win Futiel, atn snun Finees, a eb' tic yajl yaj 'a junjn macn̈ eb' yin̈tl Leví.

²⁶ Ax Aarón yet' Moisés, eb' tzb'inax 'a jun lista tic, atn 'a eb' 'aj 'ix yal Jehová, to a eb' tz'i'n 'elt smasnil eb' yin̈tl Israel 'a yol yic Egipto, 'a 'icha wal stzolil.

²⁷ A eb' xit'c paxtinc yet' win sreyl Egipto, atn Moisés yet' Aarón. A eb' xit' c'annoc 'elt eb' chon̈b' Israel 'a libre.

'Awtxnac Moisés yet' Aarón yuj Dios

²⁸ A yic xpaxtin Jehová yet' Moisés 'a Egipto, ata xyal 'ixtic:

²⁹ —An tic Jehová in. Al 'a win sreyl Egipto yuj smasnil tas tzwal 'aych tic, xchi Dios.

³⁰ 'Ix ta'w Moisés 'ixtc 'a Jehová: —Mamin, caw wal matz tac' in paxtini ¿Tas wal 'oj yutc win rey chi yab'n tas 'oj wala'? xchi Moisés.