Ex 5 - Chuj San Sebastian Bible

Paxtinac Moisés yet' Aarón 'a win rey

¹ 'Ix 'e'cn jun tzo'n̈ cha, 'ix 'at Moisés yet' Aarón paxtinc yet' win rey, 'ix yaln ewin 'ixtc 'a winac: —'Ixtc wal yaln Jehová qui Diosal an̈ israel on̈ tic on̈: To tza chaj 'at eb' in chon̈b' tic 'a lum cusltac lu'um, yic tzyi'n chan̈ eb' in b'i yet' junc q'uin̈, xchi Dios, xchi eb' 'a winac.

² 'Ix ta'w win rey chi 'a eb' 'ixtic: —¿Mach jun Jehová tzeyal cha? Alc jac wab'i', sec 'oj in yiclc tas 'oj yala', ax ex in chan 'ati. An tic man̈ wojcoc xon jun Jehová tzeyal cha. Yuj cha, toc 'ayx wan ex in chan 'ati, xchi winac.

³ 'Ix yaln pax eb' 'ixtc 'a winac: —A qui Diosal an̈ israel on̈ tic on̈, 'ix sch'ox sb'a 'ayn̈ on̈, yuj cha, to tzon̈ a chaj 'at 'a lum cusltac lum chi 'on̈, yic tz'at ca'nc qui xajmb'al 'a Jehová qui Diosal on̈, 'oxe c'u ste'nb'il jun lugar cha. Toto matz on̈ 'at on̈, axta laj x'aji, on̈ chamt yuj junc yab'il on̈, mto 'oj qui xicx cham yet' q'uen espada on̈, xchi eb' 'a win rey cha.

⁴ Xlajw cha, 'ix yaln win rey cha: —Ach tic Moisés yet' ach Aarón, ¿tas yuj tzeyij 'ec' stiempo ewin eyit chon̈b' tic 'a smunljel? 'Ixquec munljoc.

⁵ ¿Tom matz eyila to til xo wal eb' eyit chon̈b' chi 'a yol yic Egipto tic? Tzlajw cha, tzeyi'n 'ec' stiempo eb' 'a smunljel, xchi winac.

⁶ Atn 'a yic jun c'u cha, 'ix ya'n win rey jun ley 'a eb' 'aj Egipto syajlil eb' 'ilm munljel cha, 'ix yaln win 'ixtc 'a eb'.

⁷ —Man̈x eyac' te 'ac scalc sb'i'ch ewin israel tic, 'icha xon tzeyac'a, mun 'oj 'at say ewin yico'.

⁸ Palta an̈ja sb'isl lum xamit chi 'oj sb'o ewin 'icha xon 'a junjn 'ejem, matz tac' ya'n palta junc xamit. 'Isjal tz'i'n ewinac, yuj cha, tzcob' yalnc ewin to tz'at yac' xajmb'al 'a sDiosal.

⁹ 'A'c munljoc wal eb' si'mb'il, sec wach' man̈x 'a stiempo ewin yab'n jun tzo'n̈ 'es paxti cha, xchi win rey cha.

¹⁰ Yuj cha, 'ix 'at ewin syajlil eb' 'ilm munljel 'a junjn c'aj eb' israel cha, 'ix 'at yalnc ewin 'a eb' 'ixtic: —'Ix yal win rey, chajtlto man̈x 'oj 'ajxoc te 'ac 'ayex.

¹¹ A ticnec, mun xoj 'oj 'at e say eyic junjn ex, palta an̈j 'ijnoc sb'isl lum xamit 'oj e b'o', xchi ewin 'a eb'.

¹² Xlajw cha, sactzicnac s'at eb' israel chi 'a smasnil yol yic Egipto sayj yoc trigo, sec a tzya'ch eb' sjelc te 'ac chi 'a scal lum b'i'ch cha.

¹³ Junjn c'u tzalx 'a eb' to tz'acn tzb'o eb' lum xamit cha, 'icha xon tzyac' 'a yic tz'ajx te 'ac 'a eb', yuj cha tz'acnn̈ej tzyutj ewin schan lum xamit chi 'a junjn c'u 'a eb' israel cha.

¹⁴ Ax eb' israel 'ilm munljel cha, caw wal tzma'x eb' yuj ewin 'aj Egipto 'aych yopiso yuj win rey cha, tzyaln ewin 'ixtc 'a eb': —¿Tas yuj man̈ tz'acnoc e b'o lum e xamit 'ewi, yet' pax ticnec, 'icha xon e b'on lu'um? xchi ewin syajlil eb' cha.

¹⁵ Ax eb' israel 'ilm munljel cha, x'at yalnc sb'a eb' 'a win rey 'ixtic: —¿Tas yuj caw 'oltac tzon̈ otj an̈ a checb' on̈ tic mamin rey?

¹⁶ Man̈xtzac 'ajx te 'ac 'ayn̈ on̈, yic tzca'n 'at 'a scal lum xamit tzqui b'o on̈, tolab' tz'acn pax tzqui b'o lum 'icha xon 'a yic yalan̈. Caw tzon̈ ma'x pax on̈, toc wal an̈ 'ay pax qui mul on̈, palta a eb' a checb' 'ay smul, xchi eb'.

¹⁷ 'Ix ta'w win rey chi 'a eb' 'ixtic: —Ax tic, 'isjal tzex 'i'ni, yuj cha, tzeyalni to 'oj 'at eyac' e xajmb'al 'a Jehová.

¹⁸ 'Ixquec munljoc, wach'xam to ax tze say te 'ac cha, te tzeya'ch 'a scal lum xamit tze b'o cha, cojn to tz'acn tze b'o lu'um, xchi win rey chi 'a eb'.

¹⁹ Ax eb' israel 'aych yilmalc munljel cha, caw wal 'ix tac sc'ojl eb', yujto 'ix alx 'a eb', to an̈j 'ijnoc sb'isl lum xamit 'oj sb'o eb' 'a junjn c'u.

²⁰ Ax yic 'ix 'elt eb' 'a yol sdespacho win rey cha, 'ix schan sb'a eb' yet' Moisés yet' pax Aarón, yujto tan̈b'il eb' yuj eb'.

²¹ 'Ix yaln eb' 'a eb' 'ixtic: —'Ojxam yil Jehová tas 'oj ex yutoc, yujto ax ab' 'ay e mul, yuj cha, a win rey yet' eb' 'aych yajlil yet'oc, caw wal tzon̈ yixtj eb' ticnec on̈; 'icha to ax xeyac' q'uen espada 'a eb', yic tzon̈ smiln cham eb' on̈, xchi eb'.

A slesl Moisés

²² Yuj cha, 'ix leslwi Moisés 'a Jehová 'ixtic: —Mamin Jehová, ¿tas wal yuj caw ya tz'ec' eb' a chon̈b' tic? ¿Tas yuj in a chec coti?

²³ Yictax in jaw paxtinc yet' win rey tic o'oj, yel xo wal 'oltac tz'aj eb' a chon̈b' tic yuj winac, palta mantzac ach colwj xon jab'oc, xchi Moisés.