Ex 40 - Chuj San Sebastian Bible

Tz'ochcn yopiso scajnub' Dios

¹ 'Ix yaln pax Jehová 'a Moisés 'ixtic:

² A wal 'a b'ab'l c'u yic b'ab'l 'uj, ata tzac' b'o chan̈ in cajnub', atn jun Mantiado 'aj tzin chaj in b'a eyet'oc.

³ Tza'n 'ajxoc 'och te scaxail in trato 'a yojol, tzlajw cha, tz'och te cortina yen̈loc.

⁴ Tza'n 'ajxoc 'och te mexa 'a yojol, wach' tz'ajcn 'a yet'ul. Tza'n 'ajxoc 'och jun yet'l cantil 'a yojol. Wach' tz'ajch can scantilal chi 'a yet'ul.

⁵ Tza'n 'ajxoc 'och jun yet'l xajmb'al oro yic incienso 'a yojltac 'elt te scaxail trato, tz'och te cortina smacloc sti in cajnub' cha.

⁶ Tza'n 'ajxoc b'o 'ejm jun yet'l xajmb'al 'a yet'ul, atn 'aj 'oj tz'a no xajmb'al 'a sti 'elt Mantiado cha.

⁷ Tza'n 'ajxoc 'ejm q'uen niwquil palagan 'a snan̈l Mantiado yet' jun yet'l xajmb'al. Tza'n 'ajxoc b'ut'joc can yet' a a'.

⁸ Tza'n 'ajxoc 'och eb' te cortina 'a spatquil 'elt 'amac', tza'n locxocq'ue junx te cortina smacloc sti 'amc' cha.

⁹ Tzlajw cha, tze'n cot jun perjuma to wicn̈ej yaji, tza tzicn 'och 'a yib'n̈ in cajnub', tza tzicn 'och pax 'a yib'n̈ smasnil tas 'ay 'a yojol. 'Ixta wal tzotj a'n can 'och yopiso yet' smasnil syamc'ab'il, yujto wicn̈ej tz'ajcni.

¹⁰ Tza tzicch pax jun perjuma chi 'a yib'n̈ jun yet'l 'aj tz'a no xajmb'al, yet' pax 'a smasnil syamc'ab'il. 'Ixta tzotj a'n can 'och 'a yopiso, yujto wicn̈ej tz'ajcni.

¹¹ Tza tzicn 'och pax jun perjuma chi 'a q'uen niwquil palagan yet' 'a sb'achnub'al yalan̈, 'ixta tz'aj a'n can 'och q'uen 'a yopiso.

¹² Tze'n 'at Aarón yet' eb' yunnal 'a yol sti Mantiado cha, tzaln 'a eb', to tz'achn can eb' ta'.

¹³ Tzlajw yachn eb', tzya'n 'och Aarón te spichl yic yopiso caw wach', tza tzicn can 'och perjuma 'a 'a, sec 'ixta tz'aj yochcn ya'malc 'och sti eb' 'anma 'ayin.

¹⁴ Tzawtn cot pax eb' yunnal chi 'a a tz'ey, tza'n ya'ch eb' sjucn pichl yic yopiso.

¹⁵ Tzlajw cha, tza tzicn 'och perjuma 'a eb', 'icha wal tzotj Aarón cha. A jun perjuma tzicx can 'och 'a eb' cha, a tzch'oxn 'eli to tz'ochcn eb' 'a yopiso ya'n 'och eb' sti eb' 'anma 'ayn yet' yin̈tl 'a smasnil tiempo, xchi Dios.

¹⁶ A Moisés 'ix sb'o 'icha wal xyutj Jehová yaln 'a 'a.

¹⁷ A yic schan 'el yich schab'l ab'il yelt eb' israel 'a Egipto, 'a b'ab'l c'u yic b'ab'l 'uj yic junx ab'il cha, ata 'ix yac' b'o chan̈ scajnub' Dios.

^18-19 Xyac' 'ajxoc 'ejm sb'achnub'al yalan̈, xya'n 'ajxoc 'och ya'nte'al, xya'n 'ajxoc 'och scan̈nub'al, xya'n 'ajxoc 'ejm yoyal, xya'n lich'xoc 'at mantiado 'a yib'n̈ scajnub' Dios, 'icha wal yaj yaln Jehová 'a 'a.

^20-21 Xya'n 'ajxocq'ue junx slan̈l yib'n̈ mantiado cha. Xlajw cha xyi'n cot Moisés chi chapachn̈ q'uen q'uen 'aj tz'ib'b'il 'och lajn̈e checnb'il, xya'n 'ejm 'a yojl te scaxail trato. Xya'n 'och te can̈nub' tzb'achn b'ey jun caxa cha, xya'nq'ue smacl sti yib'an̈. Xlajw cha, xya'n 'ajxoc 'och 'a yojl scajnub' Dios, xya'n locxocq'ue te cortina tz'och yen̈loc te caxa cha, 'icha wal yaj yaln Jehová 'a 'a.

^22-23 Xya'n 'ajxoc 'och te mexa 'a yet'ul, atn 'a spac'b'il 'a stojlal norte, 'a yojltac 'elt te cortina cha. Xya'n 'ajxoc 'ejm 'ixm pan 'a sat te mexa 'a yojltac Jehová, 'icha wal yaj yaln Jehová 'a 'a.

^24-25 Xya'n 'ajxoc 'och jun yet'l cantil 'a yet'ul, 'a yojltac 'elt te mexa chi 'a spac'b'il 'a stojlal sur. Xya'n 'ajxoc 'och sc'a'l jun tzo'n̈ cantil 'a yojltac Jehová, 'icha wal yaj yaln Jehová 'a 'a.

^26-27 Xya'n 'ajxoc 'och jun yet'l xajmb'al nab'a oro 'a yet'ul, 'a yojltac 'elt te cortina. Xya'n tz'a incienso su'q'ui sjab' 'a yib'an̈, 'icha wal yaj yaln Jehová 'a 'a.

^28-29 Xlajw cha, xya'n Moisés 'ajxoc 'och eb' te cortina tz'och smacloc sti scajnub' Dios; xya'n b'o 'ejm jun yet'l 'aj tz'a no xajmb'al 'a sti 'elt Mantiado cha. Xya'n tz'a Moisés no xajmb'al 'a yib'an̈, yet' 'ixm harina tz'ajx ofrendail, 'icha wal yaj yaln Jehová 'a 'a.

^30-32 Xya'n 'ajxoc 'ejm q'uen niwquil palagan 'a yet'l 'a snan̈l Mantiado yet' jun yet'l xajmb'al. Xya'n 'ajxoc b'ut'joc can yet' a a', sec ata tzb'ic sc'ab' yet' yoc 'a jun a cha. A pax ta 'oj sb'ic Aarón yic yet' eb' yunnal, tzb'iccn sb'a eb' yic tz'och eb' 'a yol Mantiado yet' 'a yic tz'ochch eb' 'a stz'ey yet'l xajmb'al, 'icha wal yaj yaln Jehová 'a Moisés cha.

³³ 'A slajb' xo, 'ix ya'n b'o yamq'uil scajnub' Dios yet' yic yet'l xajmb'al. Xlajw cha, xya'n 'ajxoc 'och junx te cortina smacloc sti 'amc' cha. 'Ixta 'ix 'aj sb'o 'el'ch smasnil tas 'ix yal Jehová 'a Moisés.

'Emnc stzictznial Jehová*r* 'a yib'n̈ scajnub'

³⁴ Xlajw cha, 'ix 'eml jun 'asn 'a yib'n̈ Mantiado 'aj tzchaj sb'a Dios yet' eb' 'anma', 'ix macchj 'el yojl chi yuj stzictznil Jehová.

³⁵ Ax Moisés matz tac' yoch 'a yol Mantiado cha, yujto 'aych jun 'asn chi 'a yib'an̈, macchjnac 'el yojl chi yuj stzictznial.

³⁶ A jun 'asn cha, a yic tzq'ue wan 'a yib'n̈ scajnub' Dios, tzyi'n pax chan̈ eb' israel smantiado tzb'eyx eb' 'a yojltac.

³⁷ Palta toto matz q'ue wa'an, matz tac' pax yi'n chan̈ eb' 'anma chi smantiado; at yic tzq'ue wa'an, 'ixta to b'i'an tz'atx eb'.

³⁸ A yic 'aych eb' israel 'a yol b'e, a jun 'asn yic Jehová 'aych 'a yib'n̈ scajnub', a tzyil eb' 'a c'ual, ax 'a 'ac'wal, a sc'aq'uil, a tz'i'n b'ey eb'.