Ex 37 - Chuj San Sebastian Bible

'Ix b'o scaxail strato Dios

¹ 'Ix sb'on Bezaleel te scaxail trato 'a te 'a'nte acacia, jun metro yet' lajn̈e xo centímetro x'aj spac'b'il, 65 centímetro x'aj schiquin, 65 centímetro pax x'aj ste'il.

² Xya'n 'och oro 'a yojol yet' 'a spatquil, xya'n pax 'och jun yelwnub'l sti', nab'a oro x'aji.

³ Sb'on pax chan̈e argoya to oro, x'och 'a eb' te yoc chi schan̈il, tzyal 'el'chi cha'chb' 'a junjn pac'.

⁴ 'Ix sb'on pax chab' te scan̈nub'al 'a te acacia. Xlajw cha, xya'n 'och oro 'a eb' te'.

⁵ 'Ix ya'n 'ec' 'a yojl eb' q'uen argoya, eb' q'uen 'aych 'a spac'b'il te caxa cha, sec wach' sb'achx b'ey te'.

⁶ Sb'on pax smacl sti te caxa cha, oro 'ix 'aji. Jun metro yet' lajn̈e centímetro x'aj spac'b'il, 65 centímetro x'aj schiquin.

⁷ Sb'on 'och yechl chawn̈ querubín 'a yib'n̈ sti smac cha, nab'a oro jun tzo'n̈ yechl cha, tenb'il b'o eb' yet' q'uen martillo.

⁸ A jun smac chi 'aj 'ix 'och yechl eb' querubín cha, junn̈j x'aj sb'o'i, junjn eb' 'a yib'n̈ stitc smac cha.

⁹ Q'uelc'mb'a x'aj sat eb', t'an̈n 'at sat junjn eb' 'a yib'n̈ smac te caxa cha, jen̈n 'ec' sc'axl eb' 'a yib'n̈ smacl scaxail trato, 'icha to yen̈l yib'n̈ 'ix 'aji.

'Ix b'o smexail 'ixm pan*r* tz'och 'a yojltac Dios

¹⁰ 'Ix ya'n b'o Bezaleel te mexa 'a te 'a'nte acacia, 90 centímetro x'aj spac'b'il, 45 centímetro x'aj slewnal sat, 65 centímetro x'aj ste'il.

¹¹ Xya'n 'ajxoc 'och oro 'a te', xya'n b'o yelwnub'l sti', nab'a oro x'aji.

¹² Xya'n b'o chan̈ tzeln smacl sti te mexa cha, uque centímetro x'aj slewnal sat. Xlajw cha, xya'n 'ajxoc 'och oro 'a jun yelwnub'l sti yib'n̈ cha.

¹³ Xya'n b'o chan̈e q'uen argoya nab'a oro, xya'n 'ajxoc 'och 'a yisquinyoal te mexa cha, 'a 'aj 'aych te yoc chi schan̈il,

¹⁴ sec wach' junn̈j tz'aj scan 'a yaln̈ sti 'aj 'aych te smacl sti cha. Ax 'a yojl eb' q'uen tz'ec' te scan̈nub'al, sec wach' sb'achx b'ey te mexa cha.

¹⁵ A eb' te scan̈nub'al te mexa cha, 'ix b'o eb' te 'a te acacia, xlajw cha, 'ix 'och oro 'a eb' te'.

¹⁶ An̈jtona', xya'n b'o pax smasnil syamc'ab'il jun mexa cha, nab'a oro x'aji, atn yuc'b'al, scucharail, xalual yet' svasoal 'aj tzchax ofrenda to yalil yaji.

Xb'o jun yet'l cantil nab'a oro

¹⁷ Xya'n Bezaleel b'o jun yet'l cantil nab'a oro, tztenx b'o yet' q'uen martillo, xya'n b'o yich 'aj tz'em b'achan, ste'il, sc'ab', yet' jun tzo'n̈ svasoal tz'och 'a sjolom. 'Icha snich x'ajchi, junn̈j x'aj sb'o 'a smasnil.

¹⁸ A 'a smo'och, ata x'elt waque sc'ab', 'oxe 'a junjn pac'.

¹⁹ A 'a junjn sc'ab' cha, ata 'aych pax 'oxe svasoal 'icha yilx snich te almendro, junn̈j yajch 'a sc'ab' cha.

²⁰ A jun stel spenc cha, 'aych pax chan̈e svasoal 'icha yilx snich te almendro, junn̈j yajch 'a stel cha.

²¹ A 'a yaln̈ 'aj 'ay cha'chb' sc'ab' cha, a pax ta 'aych junjn snich.

²² A snich 'a sc'ab' cha, junn̈j yaj sb'o yet' jun yet'l cantil cha; oron̈ej smasnil, tenb'il b'o yet' q'uen martillo.

²³ An̈jtona', xya'n b'o uque cantil nab'a oro x'och 'a jun yet'l cantil cha, xya'n b'o sluchlab'il 'el stan̈il mecha, yet' yuc'b'al.

²⁴ A yic sb'on eb' jun yet'l cantil cha, 72 libra q'uen oro sc'an eb' yic xb'o 'el'ch yet' smasnil syamc'ab'il.

Xb'o yet'l xajmb'al yic incienso

²⁵ Xya'n b'o Bezaleel jun yet'l xajmb'al yic incienso 'a te 'a'nte acacia. Lajn x'aj spac'b'il schan̈il, 45 centímetro x'aj spac'b'il, 45 centímetro x'aj slewnal sat, 90 centímetro x'aj ste'il. X'och pax sch'a'ac, junn̈j x'aj sb'o yet' jun yet'l xajmb'al cha.

²⁶ Xlajw cha, xya'n 'ajxoc 'och oro 'a yib'an̈, 'a spac'b'il schan̈il, yet' 'a eb' te sch'ac cha. Xya'n pax 'ajxoc 'och jun yelwnub'l sti 'a spatquil smasnil.

²⁷ An̈jtona', xya'n 'ajxoc 'och chan̈e q'uen argoya 'a yaln̈ sti 'aj 'aych jun yelwnub'l sti te', tzyal 'el'chi cha'chb' 'a junjn pac', yujto a 'a yojl eb' q'uen tz'ec' te scan̈nub'al, sec wach' sb'achx b'ey jun yet'l xajmb'al cha.

²⁸ A eb' te scan̈nub'al cha, 'ix b'o eb' te 'a te acacia. Xlajw cha, 'ix 'och oro 'a eb' te'.

Xb'o perjuma tzc'anxi

²⁹ Xya'n pax Bezaleel b'o jun perjuma yicn̈ej Jehová yaji, yet' pax jun incienso caw wal wach' sjab', caw wach' x'aj sb'o 'icha tzyutj junc mach sb'on perjuma cha.