Ex 35 - Chuj San Sebastian Bible

Sleyl sc'ul 'iljelal

¹ 'Ix ya'n Moisés syam sb'a smasnil eb' israel cha, xyaln 'a eb' 'ixtic: A Jehová 'ix yac' jun tzo'n̈ checnb'il tic 'ayin, ax ticnec to 'oj eyicloc.

² Waque c'u tzex munlji, ax 'a yucl c'ual tzex 'ilji, yujto a jun c'u cha, yicn̈ej Jehová yaji, atn ta wach' eyi'n chan̈ sb'i. Tzann̈j mach tzmunlj 'a jun c'u cha, tojln̈ej schami.

³ Tzann̈j 'ajtil cajn ex 'eq'ui, caw wal matz tac' xon eya'n 'och e c'ac' 'a jun c'u cha, yujto sc'ul 'iljelal, xchi Moisés.

Ofrenda tzc'anx 'a scajnub' Dios

⁴ 'Ix yaln pax Moisés 'a eb' yit israelal chi 'ixtic: Atn jun tzo'n̈ tic 'ix yal Jehová 'ayin yic tzwaln 'ayex:

^5-9 To tzeyac' junc eyofrenda 'a Jehová, 'a'c wal 'a smasnil e c'ojol. E masnil ax tzeyac' eyofrenda cha, tztac' eyi'n cot jun tzo'n̈ tic: Oro, plata, bronce; te q'uic'mucnac ch'al, te púrpura, te chac, te lino caw wach', no xil chiwo ch'umb'il; no stz'umal calnelu chac yaj sb'o'i, no tz'um caw tzlab'b'i, te acacia, aceite tzc'anx 'a cantil, jun tzo'n̈ perjuma tz'at 'a scal aceite tzc'anlb'axi yic 'ay junc tas tz'ochcn yico'oc Dios; q'uen cornalina yet' jun tzo'n̈ xo q'uen q'uen wach' yilxi, yujto a eb' q'uen 'oj 'och 'a te efod, atn te camx chaleco, yet' te smacl yic sn̈i sc'ojl spichl win sat ya'mal 'och sti eb' 'anma 'a Dios.

Tzb'o syamc'ab'il scajnub' Dios

¹⁰ Smasnil eb' winc 'ay sjelnal sb'on junc tas wach' yilxi, cot cab' eb', ax sb'on eb' tas 'ix yal Jehová to tzb'o'i:

¹¹ Sb'o cab' eb' jun cajnub' chi yet' smantiadoal, tzb'on eb' yib'n̈ mantiado cha, tzb'on eb' slocnub'al, ya'nte'al, scan̈nub'al, yoyal yet' sb'achnub'al yaln̈ te 'oy cha.

¹² Tzb'on eb' scaxail trato yet' scan̈nub'al, tzb'on eb' smac yet' pax jun te cortina tz'och smacoc.

¹³ Tzb'on eb' te mexa yet' scan̈nub'al, yet' pax smasnil syamc'ab'il, tzb'on eb' 'ixm pan tz'och 'a yojltac Dios.

¹⁴ Tzb'on eb' jun yet'l cantil yet' smasnil syamc'ab'il, tzb'on pax eb' jun tzo'n̈ cantil cha, yet' pax aceite tz'em 'a yojol.

¹⁵ Tzb'on eb' jun yet'l xajmb'al yic incienso yet' scan̈nub'al, yet' perjuma tzc'anx 'a yic 'ay junc tas tz'ochcn yico'oc Dios. Tzb'on eb' jun incienso caw su'q'ui sjab', tzb'on eb' te cortina tz'och smacloc sti scajnub' Dios.

¹⁶ Tzb'on eb' jun yet'l xajmb'al 'aj tz'a jun tzo'n̈ xajmb'al, tzb'on eb' jun srejail nab'a bronce tz'aj yet' syamc'ab'il, tzb'on pax eb' sb'achnub'al, tzb'on eb' q'uen palagan yet' sb'achnub'al yalan̈.

¹⁷ Tzb'on pax eb' te cortina tz'och smacloc yamq'uil scajnub' Dios, tzb'on eb' yoyal yet' sb'achnub'al yalan̈, yet' te cortina tz'och smacloc sti jun 'amc' cha.

¹⁸ Tzb'on eb' yistacail scajnub' Dios yet' pax yic jun yamq'uil cha, tzb'on pax eb' sch'an̈l sti jun cajnub' cha.

¹⁹ Tzb'on eb' te pichl to jalb'il 'oj ya'ch Aarón yic tzya'n 'och sti eb' 'anma 'a Dios, atn te caw wach' yilxi, yet' pax te spichl eb' yunnal chi 'oj ya'chi yic tz'och eb' 'a yopiso cha, xchi Moisés.

Xyij cot eb' chon̈b' yofrenda

²⁰ Smasnil eb' 'anma cha, 'ix laj yal sb'a eb' s'at 'a Moisés.

²¹ Xlajw cha, 'ay eb' caw 'ix tzalj chan̈ spixn yuj jun tzo'n̈ paxti cha, 'ix laj yi'noc cot eb' yofrenda chi 'a Jehová yuj sb'omb'il jun scajnub' Dios, atn 'aj tzchaj sb'a yet' eb' 'anma'. 'Ix yij cot eb' smasnil tas tzc'anxi, yet' pax yic te pichl wach' yilx cha.

²² Xlaj jaw eb' winac yet' eb' 'ix 'ix yet' yofrenda chi 'a Moisés, caw wal tzalj eb'. 'Ix laj yi' cot eb' q'uen yelwnub'l pichul, q'uen colc'ab', q'uen yumchiquin, q'uen ton̈ yet' smasnil q'uen q'uen to nab'a oro 'aych 'a 'a, atn chi 'ix yac' eb' 'a Jehová.

²³ Smasnil eb' 'aj 'ay te q'uic'mucnac ch'al, te púrpura, te chac, te lino caw wach', no xil chiwo ch'umb'il, no stz'umal calnelu chac yaj sb'o'i, yet' no tz'um tzlab'b'i yaj sb'o'i, smasnil jun tzo'n̈ cha, 'ix yij cot eb'.

²⁴ 'Ay pax mach 'ix 'el wal 'a sc'ojl yi'n cot q'uen plata, yet' q'uen bronce ofrendail 'a Jehová. 'Ay pax eb' 'ix 'i'n cot te acacia, yujto 'oj c'anlb'axc te'.

²⁵ 'Ay pax eb' 'ix 'ix tztac' sch'alwi, 'ix yij cot eb' 'ix te q'uic'mucnac ch'al, te púrpura, te chac yet' te lino caw wach'.

²⁶ 'Ay pax wal eb' 'ix 'ix chi caw jelan, 'ix ya'ch eb' 'a sc'ojl sch'umn 'och yip xil no chiwo 'icha te ch'al cha.

²⁷ Ax pax eb' yichm wincal chon̈ab', 'ix yij cot eb' q'uen cornalina yet' jun tzo'n̈ xo q'uen q'uen wach' yilxi, sec a eb' q'uen tz'och yelwnub'loc te camx chaleco yet' te smacl sn̈i sc'ojl te spichl win sat ya'mal 'och sti eb' 'anma chi 'a Dios.

²⁸ Xlaj yi'noc cot eb' perjuma yet' aceite yic te olivo tzc'anx 'a cantil, yet' perjuma tzc'anlb'ax 'a yic 'ay junc tas tz'ochcn yico'oc Dios, yet' pax incienso caw su'q'ui sjab'.

²⁹ Smasnil eb' israel cha, yet' wal smasnil sc'ojl eb' xcolwj eb' 'a jun munljel xyac' Jehová b'o'oc, eb' winac yet' eb' 'ix 'ix, xcolwj eb' smasnil. Yuj cha, c'uxn 'ix yac' eb' yofrenda chi smasnil 'a Jehová.

Eb' xb'on scajnub' Dios

³⁰ 'Ix yaln pax Moisés 'a smasnil eb' yit israelal chi 'ixtic: 'Iltec, a 'a scal eb' yin̈tl Judá, ata 'ix sic' 'elt Jehová win Bezaleel yunnal Uri, yixchicn Hur.

³¹ A Dios 'ix 'a'n 'och Yespíritu 'a 'a, yic 'ay sjelnal, 'ay snab'en, sec 'ay tas tztac' sb'oni,

³² x'ajx sjelnal sb'on jun tzo'n̈ tas tzb'o 'a oro, 'a plata mto bronce.

³³ 'Oj sb'o jun tzo'n̈ q'uen wach' yilxi, ax ya'n 'och yelwnub'al, ax sb'on pax te te caw wach' tz'ajch yelwnub'al.

³⁴ 'Ix 'ajx sjelnal yet' Aholiab win yunnal Ahisamac yin̈tl Dan, sec a eb' tzcuywj 'a jun tzo'n̈ xo eb' 'oj colwjoc yet'oc.

³⁵ 'Ix 'ajx sjelnal eb', yic tzb'on eb' smasnil tas wach' yilxi, sec wach' tzlaj yutc 'och eb' yechel, mto yelwnub'l jun chi yet' te q'uic'mucnac ch'al, te púrpura, te chac yet' te lino caw wach', jeln eb' sjalw nip, mto jeln eb' sch'oxn yechl junc xo munljel.