Ex 34 - Chuj San Sebastian Bible

A sjel chapachn̈ q'uen q'ue'en

¹ 'Ix yaln Jehová 'a Moisés 'ixtic: —A ticnec, ach xo 'oj a tzey chab'oc q'uen q'ue'en, 'icha wal q'uen 'ix wac' 'aych 'a b'ab'el. An xo 'oj in tz'ib'c pax q'uen 'icha eb' q'uen b'ab'l xa ma' pojoc.

² Tza'n lista a b'a 'a sq'uin̈b'il q'uic'an yic tzach jaw 'a wojltac 'a sjolm lum witz tic.

³ May junc xo mach tz'och tza'n o'oj, may junc mach tztac' yec' 'a stz'ey lum witz tic, matz tac' yec' no calnelu mto no wacx wac 'a yich lu'um, xchi Dios.

⁴ 'Ix stzeyn Moisés chapachn̈ q'ue'en, 'icha wal eb' q'uen 'ix schaj 'a b'ab'el. A 'a yic sq'uin̈b'il 'a junx c'u cha, 'ix yi'n 'at Moisés eb' q'uen q'uen cha, 'ix 'atx 'a sjolm lum witz Sinaí 'icha wal xyutj Jehová yaln 'a 'a.

⁵ Ax Jehová 'ix 'eml 'a scal jun 'asn 'a stz'ey Moisés 'a sjolm lum witz cha, atnta 'ix yal Jehová sb'i 'a winac.

⁶ 'Ix 'ec' Jehová 'a yojltac Moisés, caw 'ip 'ix yutj yalni: —An ton Jehová in, Jehová in b'i. Caw wach' in nab'en, tz'o'ch in c'ojl 'a eb' 'anma', caw 'ay in niwnc'ojlal 'a yib'n̈ eb', yujto caw yel 'ay in chamc'ojlal. Tzwac' 'el'choc tas tzwala.

⁷ Caw 'ay in chamc'ojlal 'a yib'n̈ smasnil 'anma'. 'Ay in niwnc'ojlal 'a yib'n̈ eb' yuj smaysch'olnilal. Niwn tzwutj in c'ojl 'a yib'n̈ eb' yuj smul tzlaj 'ochi, palta a eb' 'ay smul cha, matz cann̈j eb' 'ixta'. Yowlal 'oj jawc yailal 'a yib'n̈ eb' mamb'il yet' 'a yin̈tl eb' b'aq'uin̈, xchi Dios.

⁸ Yajn̈j wal cha, 'ix 'em n̈ojnjoc Moisés 'a yojltac Jehová, masnto squil 'ejm snan̈l sat 'a lu'um, 'ix yaln sb'a 'a 'ixtic:

⁹ —Mamin, ach Wajlil, toto caw yel 'ay a tzaljc'ojlal 'ayin, tzach 'at quet' on̈ 'an, yujto a eb' a chon̈b' tic caw wal pit eb', palta comnoc tzon̈ ac' niwnc'ojlal yuj qui mul on̈, yet' qui maysch'olnil tzlaj 'och 'a ojltac, sec tzon̈ a chaj 'och a chon̈b'oc on̈, xchi Moisés.

'Ix b'o jun trato jun 'ejm xo

¹⁰ 'Ix yaln Jehová 'ixtc 'a Moisés: Chaj ab' tas 'oj wala'. A ticnec tzin b'ocn jun in trato tic et' 'a sat smasnil eb' et chon̈b' tic. 'Oj in b'o jun tzo'n̈ tas satjub'tac yilxi, jun tzo'n̈ to mant 'a 'aj tzb'o 'a junc nacion̈ 'a sat lum lum tic. Ax smasnil eb' 'anma ajun et' tic, 'oj yil eb' smasnil tas 'oj in b'o', caw wal satjub'tac yilx tas 'oj in b'o 'a e cal.

¹¹ Yicljec smasnil tas 'ix wal 'ayx tic, sec an xo 'oj wi'l eb' 'anma chi 'aj 'oj e c'och cha, atn eb' amorreo, eb' cananeo, eb' hitita, eb' ferezeo, eb' heveo yet' eb' jebuseo.

¹² A yic tzex c'och 'a sat lum lum cha, may junc trato wach' e b'on yet' eb' 'anma chi ta', sec wach' ma'oj ex yixtc eb'.

¹³ A jun tze b'o'o, to 'oj e ma'cn poj yet'l xajmb'al eb', yet' jun tzo'n̈ q'uen 'aj tzlaj leslwi eb', yet' pax jun te sch'oxnb'il comn dios tzcuch Asherá.

¹⁴ Man̈ ex leslwoc 'a jun tzo'n̈ comn dios, yujto an Jehová in, caw wal own yuj jun tzo'n̈ cha.

¹⁵ Yuj cha, may wal junc trato tztac' e b'on yet' eb' 'anma cajn 'a sat lum lum cha. A yic tzlaj ya'noc 'ejm sb'a eb' 'a sdiosal cha, yic tzlaj ya'nc eb' xajmb'al chi 'a 'a, toq'ue tzex yawtj eb' yic tze c'uxn jun tzo'n̈ xajmb'al chi yet' eb', caw man̈ e cha'.

¹⁶ Man̈ eyac' yi' sb'a eb' eyunnal yet' yisl eb', yujto a yic tzlaj ya'noc 'ejm sb'a eb' 'ix 'a sdiosal cha, yic tzleslwi eb' 'a 'a, ax eb' 'ix tz'a'n yac' 'ejm sb'a eb' eyunnal chi 'a jun tzo'n̈ comn dios cha, sec tzleslwi eb' 'a jun xo.

¹⁷ May b'a'n̈ tze b'o junc q'uen q'uen e diosaloc, yic tzeyaln e b'a 'a 'a.

Q'uin̈ tz'ec' 'a junjn ab'il

¹⁸ Tze na sq'uin̈l 'ixm pan may yich, tze b'on 'icha wal tzwutj waln 'ayx tic: uque c'u tze waj 'ixm pan may yich cha, checl yaj sc'ul 'aj tzwax 'ixim, atn 'a jun 'uj tzcuch Abib, yujto a 'a jun 'uj chi 'aj 'elnc ext 'a Egipto.

¹⁹ Smasnil eb' e b'ab'l winc 'unin, wic yaj eb'. An̈jtona' 'ixta pax yuj sb'ab'l 'une e wacax, e calnelu mto e chiwo. Toto smam no 'unn cha, wic yaj no'.

²⁰ Ax pax yuj sb'ab'l 'une no 'axna jun, tztac' yajx junc no yune calnelu mto junc no yune chiwo sjelc no', palta toto may no wach' yajx sjelc no', tze c'uychtej sjaj no yune b'uru cha. An̈jtona yuj pax eb' e b'ab'l 'unnal cha, tztac' eya'n junc no yune calnelu sjeloc. May cab' junc mach tzsat sc'ojl yi'n cot yofrenda 'ayin.

²¹ Waque c'u tzex munlji, ax 'a yucl c'u tzex 'ilji, wach'xam to stiempoal 'awnub', mto stiempoal jach'oj, yowlal tzex 'ilji.

²² Tze na pax jun q'uin̈ yic tzlajw uque seman yic snanb'il cot eyel 'a libre, yet' sq'uin̈l 'ixm trigo tzb'ab'l c'anb'i. Tze na junx q'uin̈ 'a yic tzlajw chan̈ 'ixm trigo chi 'a yic tzlajw ab'il.

²³ An Jehová in an tzwala. Yowlal 'ox 'ejm tzjaw smasnil eb' winc 'a wojltac, atn 'a yic tze nan 'oxe q'uin̈ chi 'a junjn ab'il.

²⁴ An 'oj wi'l jun tzo'n̈ 'anma 'aych 'a sat lum lum cha, ax sniwnb'i can e lum cha, may mach tzaln 'ica'anc lu'um, ya' sb'a tzex jaw 'a wojltac an e Diosal in tic.

²⁵ A yic tzeya'n no noc' xajmb'al-l 'ayin, man̈ eyac' no schiq'uil, yet' 'ixm pan 'ay yich. A no xajmb'al yic snanb'il cot eyel 'a libre, toto matz lajw schix no', matz tac' smolx can no yico'oc junx c'u.

²⁶ Smasnil sb'ab'l sat 'awb'en tz'el 'a sat lum lum cha, yowlal tzeyij cot 'a watut an Jehová e Diosal in. Man̈ e tz'an̈ e no cotc chiwo 'a scal yal yim no snun, xchi Dios.

Stz'ib'jnac Moisés jun tzo'n̈ checnb'il

²⁷ 'Ix yaln Jehová 'ixtc 'a Moisés: Tz'ib'j smasnil jun tzo'n̈ paxti tic, yujto a eb' 'aych yipnub'alc in trato b'ob'il wuj et'oc, yet' pax eb' et israelal tic, xchi.

²⁸ Chawinc c'u chawinc 'ac'wl 'ix can Moisés yet' Jehová 'a sjolm lum witz cha. May xon jac tas sc'ux 'a yic jun tiempoal cha, may pax tas xyuq'uej. Atn 'a jun tiempoal cha, ata 'ix stz'ib'j can 'och jun trato 'a eb' q'uen q'uen cha, atn jun tzo'n̈ lajn̈e checnb'il.

²⁹ Xlajw xoj cha, 'ix pax 'emt Moisés 'a sjolm lum witz Sinaí, mec'b'il chapachn̈ q'uen q'uen chi yu'uj, atn q'uen 'ajtil tz'ib'b'il 'och jun tzo'n̈ checnb'il cha. A yic 'ix 'eml 'a yich lum witz cha, matz yila toto tzictzni 'ix 'aj sat yic xpaxtin yet' Jehová.

³⁰ Ax yic xyiln Aarón yet' smasnil eb' chon̈b' cha, to caw tzictzni yilx sat Moisés, caw wal xiw eb' yu'uj, man̈xtzac c'och eb' 'a stz'ey.

³¹ Yuj cha, 'ix yawtn cot Moisés chi eb' 'anma chi 'a stz'ey, 'ix snitzn 'ochch sb'a Aarón yet' eb' syajlil chon̈b' chi 'a stz'ey winac, 'ix paxtin eb' yet'oc.

³² Jab'jnal 'ix c'och eb' chon̈b' chi smasnil 'a stz'ey Moisés cha, 'ix syamn 'och yaln 'a eb' tas checnb'ilal 'ix yac' Jehová 'a 'a, yic 'ayc' 'a sjolm lum witz Sinaí cha.

³³ A yic xlajw spaxtin yet' eb' 'anma cha, smacn sat chi yet' jun nip.

³⁴ Ax yic tzc'ochc paxtinc yet' Jehová, tzyij 'el jun nip chi 'a sat; ax yic tz'el paxta, tzyaln 'a eb' chon̈b' cha tas checnb'ilal tz'ajx yal yuj Jehová chi 'a eb'.

³⁵ A yic wan spaxtin cha, tzyiln eb' 'anma cha to caw tzictzni yilx sat Moisés. Cojn tzlajw spaxtini, tzmacn can pax sat yet' jun nip cha, macnn̈ej sat cha, masnto 'a yic tz'ochx paxtinc yet' Jehová, tzyi'n to pax 'el jun nip cha.