Ex 33 - Chuj San Sebastian Bible

Yaljnac Dios to ma'oj 'at yet' eb'

¹ 'Ix yaln pax Jehová 'a Moisés 'ixtic: —A ticnec, 'eln̈ yet' eb' 'anma chi 'a tic, eb' 'ix ej 'elt 'a Egipto cha. 'Ixc yet' eb' 'a lum lum 'aj wa'jnac in ti wa'n 'a Abraham, 'a Isaac yet' 'a Jacob, atn lum wa'jnac in ti wa'n 'a yin̈tl eb'.

² An 'oj wac' b'ab'ljoc jun wángel eyu'uj, a 'oj e jucb'tzani. 'Oj wi'l eb' 'anma 'ay 'a sat lum lum cha, atn eb' cananeo, eb' amorreo, eb' hitita, eb' ferezeo, eb' heveo yet' eb' jebuseo.

³ 'Ixquec 'a lum lum caw wal 'ay syaxil sat cha, palta an tic, ma'oj in 'at eyet'oc, yujto caw pit eb' 'anma tic. 'Ay smay ex in satn can 'el 'a yol b'e, xchi Dios.

⁴ A yic 'ix yab'n eb' chon̈b' jun tzo'n̈ paxti cha, caw wal 'ix cus chan̈ eb' smasnil, man̈x 'a eb' xya'ch syumchiquin yet' ston̈.

⁵ Yujto alb'il can 'a Moisés yuj Jehová 'ixtic: —Al 'a eb' et israelal to an tzwal 'ixtic: Ax tic caw wal pit ex. Q'uinloc tzin c'och 'a e cal, yajn̈j am wal cha tzex in satn 'eli. A ticnec, 'ijec 'el smasnil eyumchiquin yet' e ton̈ chan̈ stojol, ax wilni tas 'oj wutc in b'a eyet'oc, xchi Dios, xchi Moisés cha.

⁶ Yuj cha, a yic 'ix 'atx eb' 'a lum yich witz Sinaí, man̈x 'a junc eb' xya'ch syumchiquin yet' ston̈.

Jun Mantiado*r* 'aj tzchaj sb'a Dios yet' eb' 'anma'

⁷ 'Ix xuyn chan̈ Moisés jun Mantiado yic Jehová, najt 'ix yij 'el 'a stz'ey camplamento cha, ax 'a sti 'el chi sb'ox cha'an̈. 'Ix ya'n scuch Mantiado 'aj tzqui chaj qui b'a yet' Dios. Toto 'ay mach tznib'j c'umnoc Jehová, yowlal ata tz'at 'a jun Mantiado 'ay 'a sti 'el camplamento cha.

⁸ A yic tzxitc' Moisés 'a jun Mantiado cha, smasnil eb' 'anma', tz'elt can lin̈n eb' 'a yol sti smantiado, jun lajn tz'ajch q'ueln eb' 'a Moisés, masnto tz'och 'a yojl jun Mantiado cha.

⁹ Cojn wal yic tz'och Moisés 'a yojl cha, tz'eml jun topn̈ 'asn 'a yib'an̈, tz'och oyn 'a sti Mantiado cha, axn wal cha, tzpaxtin Jehová yet' Moisés.

¹⁰ A yic tzyiln eb' 'anma yeml jun topn̈ 'asn cha, tzlaj 'em cumn eb' 'a yol sti smantiado, yic tzya'n 'ejm sb'a eb' 'a yojltac Jehová.

¹¹ Q'uelc'mb'a wal tz'aj Jehová spaxtin yet' Moisés, 'icha wal spaxtin junc mach yet' junc swach'c'ojol, 'ixta tz'aj eb' spaxtini. Tzlajw cha, tzpaxt Moisés 'a camplamento. Palta ax Josué win yunnal Nun, win schecb' Moisés cha, matz 'elt xon win 'a yol Mantiado cha.

Sc'an Moisés yil stzictznil Dios

¹² 'Ix yaln Moisés 'ixtc 'a Jehová: —Mamin, ach 'ix al 'ayin to an tzin jucb'tzej jun chon̈b' tic, palta ma'ix al 'ayin mach tzcolwj wet'oc. 'Ix aln paxi chajtlto 'ojcab'iln o'oj, 'ay a tzaljc'ojlal wet' alni.

¹³ A ticnec, toto yel 'ixta', 'ac' wojcoc 'el a nab'en, sec wach' tzach wojquej 'eli, ax wa'nn̈ej tzaljoc a c'ojol. Ojc wal si'mb'il to a jun a chon̈b' tza'cn 'a yol in c'ab' tic, a chon̈b' yaji, xchi Moisés.

¹⁴ —An wal 'oj in 'at eyet'oc, ax e can 'a junc'ojlal 'a sat lum lum cha, xchi Dios 'a Moisés.

¹⁵ 'Ix ta'w pax Moisés 'ixtic: —Caw wach' toto tzach 'at quet' on̈ Mamin Jehová. Palta toto man̈oc ach tzach 'at quet' on̈, toto 'ixta', comnoc matz on̈ e'l 'a jun lugar tic.

¹⁶ Q'uinloc matz ach 'at quet' ticnec on̈, ¿tas wal 'oj 'aj scheclj 'eli, to tzach tzalj wet'oc, yet' 'a eb' a chon̈b' tic? Toto tzach 'at quet' on̈, 'ixtnta 'oj 'aj scheclj 'eli, to sic'b'iln 'el yet' eb' a chon̈b' tic oj 'a scal eb' chon̈b' 'a sat lum tic, xchi Moisés.

¹⁷ 'Ix yaln Jehová 'ixtc 'a Moisés: A jun tzo'n̈ paxti tzal tic, 'oj in b'o 'icha tzal cha, yujto caw tzach wa'ch yipc in c'ojol, caw wojc ach paxi, xchi Dios 'a Moisés.

¹⁸ —Mamin, ch'ox wal wil a tzictznil 'an, xchi Moisés cha.

¹⁹ 'Ix ta'w Dios 'a 'a: —Smasnil in wach'c'ojlal 'oj in ch'ox 'ayach, ax wal 'a ojltac ata 'oj walcn in b'i an Jehová in tic. 'Oj wac' in wach'c'ojlal 'a eb' 'aj tzyal in c'ojl tzwac'a, an̈jtona', 'oj 'o'ch pax in c'ojl 'a eb' 'aj tzyaln̈j in c'ojol.

²⁰ Palta tzwal 'ayach, ma'oj el xon in sat, yujto may xon junc 'anma tztac' yilni. Toto tzyila, yajn̈ej tzchami.

²¹ —'Ilto, a 'a in tz'ey tic, 'ay jun lugar wach', q'uen̈ te'n 'a yib'n̈ jun q'uen q'uen tic.

²² A yic 'oj 'ec' in may 'a tic, 'oj ach wa'cn 'och 'a sjatlil q'uen q'uen tic, 'oj ach in mac yet' in c'ab', sec 'ixta 'oj waj wec' 'a a tz'ey.

²³ 'Oj lajwc we'cni, ax wi'n pax 'el in c'ab', sec cojxn̈ej in patquil 'oj ela', al wal eln in sat, caw wal matz tac'a, xchi Dios.