Ex 28 - Chuj San Sebastian Bible

Te spichl*r* eb' ya'mal 'och sti eb' 'anma 'a Dios

¹ 'Ix yaln pax Jehová 'ixtic: 'Awtj cot o'tac Aarón yet' eb' yunnal, atn Nadab, Abiú, Eleazar yet' Itamar. Sic' 'elt eb' 'a scal eb' eyit israelal sec a eb' 'oj 'och ya'malc 'och sti eb' 'anma 'ayin.

² Tza'n b'o spichl o'tac Aarón. A te pichl to tzictzni yilxi, te yel xo wach', a te tzac' b'o'oc.

³ Al 'a smasnil eb' 'ay sjelnal, eb' xwac' sjelnal snab'en sjalw nip, sec a eb' 'oj b'onc spichl Aarón yic tz'och ya'malc 'och sti eb' 'anma 'ayin.

⁴ A te pichl 'oj sb'o eb' cha, atn eb' te tic: Te smacl sn̈i sc'ojol, te camx efod sb'i 'icha chaleco, te spotl to jucan, te sc'oxl sjolom yet' te sjal-l yic snan̈al. Tzb'o jun tzo'n̈ pichl chi yet' te ch'al to nab'a lino, wach' pax tz'ajch yelwnub'al. 'Ixta wal 'oj 'aj sb'o spichl o'tac Aarón yet' eb' yunnal, yujto 'oj 'och eb' ya'malc 'och sti eb' 'anma 'ayin.

⁵ A eb' 'oj b'onc jun tzo'n̈ pichl cha, 'oj sc'anlb'oc eb' oro, te q'uic'mucnac ch'al, te púrpura, te chac yet' te lino ch'umb'il.

Te camx Efod sb'i

⁶ A te camx 'icha chaleco cha, oro tz'aj te', tz'och te q'uic'mucnac ch'al 'a te', te púrpura, te chac yet' te lino ch'umb'il, wach' tz'ajch yelwnub'al.

⁷ Tzb'o chapachn̈ sc'ab' tz'ec' 'a squelab', sec a tzyamn te pichl chi 'a spatquil yet' te yic yojltac cha.

⁸ Tzb'o pax sjal-l snan̈l te camx cha, sec a te tzjaln 'och te', junn̈j tz'aj sb'o 'a te q'uic'mucnac ch'al, te púrpura, te chac yet' te lino ch'umb'il.

⁹ Tzlajw cha, tze'n cot chab'oc q'uen cotc pachmb'a cornalina, ax 'a eb' q'ue'en, ata tzac' 'och sb'i smasnil eb' yunnal Israel.

¹⁰ 'Icha stzol-l yaj eb' yalji, 'ixta wal tzotj can 'och sb'i eb' chi 'a eb' q'ue'en, wactcwan̈ tz'ajcn 'och sb'i eb' chi 'a junjn q'ue'en.

¹¹ A mach tz'a'n can 'och jun tzo'n̈ b'i chi 'a q'uen q'uen cha, a cab' junc mach yojc sb'on q'uen q'uen wach' yilxi. A tzb'on can 'och jun tzo'n̈ b'i cha, 'icha wal stz'ib'l junc seyo, 'ixta tz'ajcn 'ochi.

¹² Tzlajw cha, tza'n 'och eb' q'uen 'a te sc'ab' te pichl chi tz'ec' 'a squelb' te camx 'icha chaleco cha, tz'ochcn eb' q'uen snanb'ilc cot smasnil eb' yunnal Israel. Ax Aarón, 'oj yic b'ey jun tzo'n̈ b'i tic 'a squelab' yic tz'ochch 'a wojltac an Jehová in.

¹³ Ax syamnub'l q'uen 'aj 'oj 'ochoc, nab'a oron̈ej tz'aj sb'o'i.

¹⁴ Tza'n b'o jun q'uen cadena yet' chab' sch'an̈il, oro pax tz'aji, tzlajw cha, tza'n 'och 'a stitc syamnub'l cha.

Te smacl sn̈i sc'ojol

¹⁵ A te smacl sn̈i sc'ojl cha, yopiso te ya'n nachjc 'el yuj win sat ya'mal 'och sti eb' 'anma' tas in nib'b'en. Lajn wal tz'aj sb'o te 'icha te camx chaleco cha. Wach' tz'ajch yelwnub'al, tzb'o yet' oro, te q'uic'mucnac ch'al, te púrpura, te chac yet' te lino ch'umb'il.

¹⁶ Chapacn tz'aji, lajn pax tz'aj sat 'a schan̈ paq'uil, 22 centímetro tz'aj junjn stitc cha.

¹⁷ Tzlajw cha, tza'n 'ajxoc 'och chan̈ tzolc q'uen q'uen wach' yilx yelwnub'loc: a 'a jun b'ab'l tzol, tz'och jun q'uen rubí, jun q'uen crisólito yet' jun q'uen esmeralda.

¹⁸ 'A schab'l tzol, tz'och jun q'uen granate, jun q'uen zafiro yet' jun q'uen jade.

¹⁹ 'A yoxl tzol, tz'och jun q'uen jacinto, jun q'uen ágata yet' jun q'uen amatista.

²⁰ 'A schan̈l tzol, tz'och jun q'uen topacio, jun q'uen cornalina yet' jun q'uen jaspe. A smasnil jun tzo'n̈ q'uen cha, oron̈ej syamnub'l 'aj tz'ochi.

²¹ Lajchwe sb'isl eb' q'uen q'uen cha, yujto lajchwan̈ sb'isl eb' yunnal Israel, 'icha stz'ib'l junc seyo, 'ixta wal tz'ajcn 'och sb'i junjn 'in̈tal eb' 'a q'ue'en.

²² Tza'n b'o pax jun tzo'n̈ xo q'uen cadena ch'umb'il, oron̈ej tz'aji, tz'och 'a te smacl sn̈i sc'ojol.

²³ Tza'n b'o pax chab' q'uen argoya oro tz'aji, tzlajw cha, tza'n 'och 'a stitc te smacl sn̈i sc'ojl cha.

²⁴ Tza'n pax 'och chab' q'uen cotc cadena, to nab'a oro 'a eb' q'uen argoya 'aych 'a stitc te smacl sn̈i sc'ojol.

²⁵ Tza'n pax 'och sn̈i eb' q'uen cadena chi schab'il, 'a 'aj tz'och locn eb' te tz'ec' 'a squelb' te smacl sn̈i sc'ojl cha, sec wach' schan sb'a te 'a yojltac.

²⁶ Tza'n b'o pax chab' xo q'uen argoya nab'a oro, tzlajw cha, tza'n 'och q'uen 'a yib'n̈ yol sti sc'ab' te smacl sn̈i sc'ojol, sec junn̈j tz'aj schan sb'a te yet' te camx chaleco cha.

²⁷ Tza'n b'o chab' xo q'uen argoya to oro tz'aji, tza'n 'och 'a sn̈i te sc'ab' tz'ec' pachn 'a squelb' te smacl sn̈i sc'ojol, te tzcotcn 'a yojltac. Junn̈j tz'ajcn 'aj tz'em'ch stz'isl te cha, palta 'a yib'n̈ to q'uet 'aj tzjalx te smacl sn̈i sc'ojol.

²⁸ 'Ixta wal 'oj 'aj schan sb'a eb' q'uen argoya yic te smacl sn̈i sc'ojl cha, yet' q'uen yic te camx chaleco. Tzlajw cha, tz'ec' jun sch'an̈l 'a yojl eb' q'uen argoya cha, jun sch'an̈l b'ob'il yet' q'uic'mucnac ch'al, sec 'ixta 'oj 'aj scan q'uet te smacl sn̈i sc'ojl chi 'a yib'n̈ 'aj tzjalx te camx chaleco cha, sec wach' matz 'el xuynjoc te'.

²⁹ Ax yic tz'och Aarón 'a yojl in cajnub' 'a wojltac, 'aych jun pichl chi yu'uj, 'a 'aj 'aych eb' q'uen q'uen tzch'oxn 'el in nib'b'en. An̈jtona', a pax ta 'aych eb' q'uen q'uen 'aj 'aych sb'i eb' yunnal Israel, sec a yic tz'ochch 'a wojltac, tzin nan cot eb'.

³⁰ A 'a yojl te smacl sn̈i sc'ojl cha, ata tz'och chab' xo q'uen q'ue'en, q'uen tzcuch Urim yet' q'uen Tumim: A jun tzo'n̈ q'uen cha, yopiso eb' sch'oxn 'el in nib'b'en; yowlal 'aychn̈ej 'a sn̈i sc'ojl Aarón yic tz'ochch 'a wojltac. 'Ixta wal 'oj yutc Aarón yi'n b'ey jun tzo'n̈ q'uen chi 'a wojltac an Jehová in.

Spotl spichl*r* win ya'mal 'och sti eb' 'anma'

³¹ Tza'n b'o te spotl te camx chaleco cha, tzb'o te 'a te q'uic'mucnac ch'al.

³² Tzlajw cha, tza'n b'o yolnil sjaj te 'a spacl sjolom, a 'a te yolnil yic sjolm cha, wach' tz'aj stz'ulx te stitc cha, sec wach' matz comn jat te', wach' tz'aj stz'ulx 'icha yic no tz'um chaleco.

³³ Tza'n 'ajxoc 'och yelwnub'l sti yoctc te jucn pichl cha. Tzb'o yechl granada 'a te q'uic'mucnac ch'al, te púrpura, yet' chac, caln tz'aj yoch 'a stitc yoctc yet' eb' q'uen cotc campana to nab'a oro. Tz'och 'a te yoctc chi smasnil;

³⁴ tzyal 'el'chi, jun q'uen yune campana, jun pax te ch'al 'icha sat te granada cha. 'Ixtan̈ej tz'ajch 'a sti te yoctc chi smasnil.

³⁵ A yic 'oj yilnc Aarón yopiso, yowlal tzya'ch jun pichl cha, yic tzya'n 'och sti eb' 'anma 'ayin, sec a yic tz'ochch 'a yol in cajnub' mto 'a yic tz'el paxta, to checl cab' sc'an̈ eb' q'uen cotc campana chi 'a sti spichl cha, sec matz chami.

³⁶ Tza'n b'o pax junx q'uen placa nab'a oro tz'aji. Tza'n 'ajxoc 'och jun tzo'n̈ paxti tic 'a q'ue'en. Yicn̈ej Jehová yaji, xchi jun stz'ib'l cha. 'Icha wal junc seyo, 'ixta wal tz'aji.

³⁷ Tza'n jalxc 'och q'uen placa chi 'a te sc'oxl sjolm Aarón, 'a te yic snan̈l sat. Sin̈n̈i tz'aj sjalx 'och yet' sch'an̈l b'ob'il 'a te q'uic'mucnac ch'al.

³⁸ 'Ixta wal 'oj yutc Aarón yi'n b'ey jun chi 'a snan̈l sat, yujto a yic tzya'n eb' israel yofrenda 'ayin, wach'xam 'ay spaltail eb', palta yuj jun placa cha, tzin chan yofrenda eb' cha.

³⁹ Tza'n b'o junc xo te pichl yel xo jucan, a te lino ch'al tz'och 'a te'. An̈jtona lino pax te ch'al tz'och 'a te sc'oxl jolm cha. Ax te sjal-l snan̈al, wach' pax tz'aj yoch yelwnub'l yuj mach tzb'oni.

⁴⁰ Tza'n b'o pax sjucn pichl eb' yunnal Aarón. Tzb'o pax sjal-l snan̈l spichl eb', yet' pax sc'oxl sjolm eb'. Wach' tz'aj sb'o'i, sec wach' yilx eb' yet' spichl cha, niwn cab' pax yel'ch eb' 'a sat 'anma'.

⁴¹ 'Ixta wal 'oj otc a pichn o'tac Aarón yet' eb' yunnal. Tzlajw cha, tza secn can q'ue perjuma 'a sjolm eb'. 'Ixta tz'aj schan can eb' yopiso yic tzya'n 'och eb' sti eb' 'anma 'ayin.

⁴² Tza'n b'o pax scutin wex eb' tzya'chi. Tz'em'ch 'a xub' eb', tzq'ue'ch pax 'a snan̈l eb', wach' tz'aj sb'o yet' te lino ch'al.

⁴³ Yowlal tzya'ch Aarón jun tzo'n̈ pichl chi yet' eb' yunnal yic tz'ochch eb' 'a yol in cajnub' 'aj tzin chaj in b'a eyet'oc. Yowlal 'aych yuj eb' yic tz'ochch eb' 'a stz'ey yet'l xajmb'al yic tzyiln eb' yopiso, sec wach' ma'oj 'och smul eb', ma'oj comn cham eb'. A jun tic, ley tz'ajcn 'a Aarón yet' 'a eb' yin̈tl b'aq'uin̈, xchi Dios 'a Moisés.