Ex 27 - Chuj San Sebastian Bible

Jun yet'l xajmb'al nab'a bronce

¹ 'Ix yaln pax Jehová 'ixtic: Tza'n b'o pax junc yet'l xajmb'al to lajn tz'aj spac'b'il 'a schan̈il. A te 'a'nte acacia tz'och 'a 'a. Chab' metro yet' o'e schawinc centímetro tz'aj junjn spac'b'il, jun metro yet' o'eschawinc centímetro tz'aj ste'il.

² Tza'n 'ajxoc 'och sch'ac 'a junjn yisquinyoal. A jun tzo'n̈ sch'ac cha, junn̈j tz'aj sb'o yet' jun yet'l xajmb'al cha. Tzlajw cha, tza'n 'ajxoc 'och bronce 'a 'a.

³ Smasnil syamc'ab'il jun yet'l xajmb'al cha, broncen̈ej tz'aji: atn 'aj tz'em stan̈il c'ac', sluchlab'il, yuc'b'al, syamlab'il yet' 'aj tz'em stzac'ac'.

⁴ Tza'n b'o pax junc srejail, nab'a bronce tz'aji. Tza'n 'och chan̈e q'uen argoya bronce 'a 'a, jun 'a junjn yisquinyoal jun reja cha.

⁵ Tza'n 'och 'a yaln̈ stitc jun yet'l xajmb'al cha, cojn 'a spacl snan̈l tzq'ue'ch q'uen reja cha.

⁶ Tza'n b'o pax scan̈nub'al jun yet'l xajmb'al chi 'a te acacia, tzlajw cha, tz'och bronce 'a spatquil te can̈nub' cha.

⁷ A te can̈nub' cha, yowlal tz'ec' eb' te 'a yojl eb' q'uen argoya 'a schicn jun yet'l xajmb'al cha, sec wach' sb'achx b'eyoc.

⁸ Tzcan̈cni tz'aj yojl jun yet'l xajmb'al cha, yujto 'a'nte tz'och 'a 'a, 'icha wal yechl tzel 'a sjolm lum witz tic, xchi Dios 'a Moisés.

Yamq'uil scajnub' Dios

⁹ 'Ix yaln pax Jehová 'ixtic: Tza'n b'o pax yamq'uil spatquil in cajnub'. A 'a spac'b'il 'a stojlal sur, ata tz'och te cortina lino ch'umb'il sat, 45 metro tz'aj 'aj tz'och te'.

¹⁰ Junc'l yoyl tz'ejmi, junc'l pax sb'achnub'al yalan̈, to nab'a bronce, ax slocnub'al yet' smacl sjolm eb' te 'oy cha, platan̈ej tz'aji.

¹¹ 'Ixta pax 'a spac'b'il 'a stojlal norte, yowlal tz'och 45 metro te cortina chi 'a 'a, junc'l yoyal, junc'l pax sb'achnub'al yalan̈, to nab'a bronce, ax pax slocnub'al yet' smacl sjolm eb' te 'oy cha, platan̈ej.

¹² Ax pax 'a junx spac'b'il jun 'amc' chi 'a stojlal 'aj tz'em c'u, nan̈l yoxlschawinc metro te cortina tz'och 'a 'a, lajn̈e yoyal yet' lajn̈e sb'achnub'al yalan̈.

¹³ Ax 'a junx spac'b'il 'a stojlal 'aj tzq'uel c'u, nan̈l yoxlschawinc metro te cortina tz'och pax 'a 'a.

¹⁴ A jun sti 'aj tzcan smac, uque metro tz'aj te cortina tz'och smacloc cha, 'oxe yoyal yet' pax 'oxe sb'achnub'al yaln̈ te 'oy cha.

¹⁵ 'Ixta pax 'a junx spac'b'il, tz'och uque'oc metro te cortina smacloc sti smac cha, 'oxe yoyal yet' 'oxe sb'achnub'l yalan̈.

¹⁶ An̈jtona pax 'aj tzon̈ 'och 'a jun 'amc' cha, yowlal tz'och pax junx te cortina smacloc sti'. B'aln̈e metro tz'aj te', tzb'o te 'a te q'uic'mucnac ch'al, te púrpura, te chac yet' te lino ch'umb'il. Wach' tz'aj yoch yelwnub'l yuj mach tzb'oni. Tz'em pax chan̈e yoyal, chan̈e pax sb'achnub'al yalan̈.

¹⁷ Smasnil eb' te 'oy 'a stitc 'amc' cha, platan̈ej smacl sjolm eb' te tzq'ue'i, ax slocnub'al eb' te' yet' sb'achnub'al yalan̈, platan̈ej paxi.

¹⁸ A jun 'amc' cha, 45 metro spac'b'il, nan̈l yoxlschawinc metro schiquin. Chab' metro yet' o'eschawinc centímetro stel eb' te cortina chi tz'och 'a jun 'amc' cha. A te cortina cha, linon̈ej tz'aj eb' te sb'o'i, ax jun tzo'n̈ sb'achnub'al yaln̈ te 'oy cha, broncen̈ej tz'aji.

¹⁹ Smasnil tas 'oj c'anxoc 'a in cajnub', broncen̈ej tz'aji, 'ixta pax tz'aj yistacail, yet' pax yistacail sti 'el 'amc' cha, xchi Dios.

Aceite tzc'anx 'a cantil

²⁰ 'Ix yaln pax Jehová 'ixtic: Al 'a eb' et israelal to tzyij cot eb' yalil sat te olivo, yujto a 'oj c'anxoc 'a jun tzo'n̈ cantil, sec wach' 'ayn̈j 'och sc'a'l 'a smasnil tiempo.

²¹ Ax Aarón yet' eb' yunnal, a eb' tz'och 'ajcuentail ya'n 'och sc'a'l jun tzo'n̈ cantil cha, sec 'ayn̈j 'och sc'a'l 'a wojltac an Jehová in tic yic tz'ec' 'ac'wl 'a yojl in Mantiado, atn 'a yojltac 'elt te cortina 'aych yen̈loc scaxail in trato. A jun tic, ley tz'ajcn 'ayx yet' 'a eb' eyin̈tl b'aq'uin̈, xchi Dios.