Ex 26 - Chuj San Sebastian Bible

A scajnub' Dios tzcuch pax Mantiado

¹ 'Ix yaln pax Jehová 'ixtic: Tza'n b'o in cajnub' yet' lajn̈e te cortina. A te lino ch'al ch'umb'il sat tz'och 'a 'a. Tza' b'o yet' te q'uic'mucnac ch'al, te púrpura yet' te chac. Tzlajw cha, tza'n tz'isxoc 'och yechl eb' querubín 'a eb' te'. A junc mach jeln stz'iswi, a tz'isn 'ochi.

² Smasnil te cortina cha, lajnn̈ej tz'aj yechl eb' te', nan̈l yoxlajn̈il metro tz'aj snajtil yoc, chab' metro tz'aj slewnal sat.

³ Tza'n tz'isxoc syam sb'a o'e te cortina cha, an̈jtona', 'ixta pax tz'aj o'e xo te'.

⁴ Tza'n 'ajxoc 'och scolc'ab'il sti junjn c'aj te', a te q'uic'mucnac ch'al 'aj tzb'o'i. 'Icha tz'aj te b'ab'l cha, 'ixta pax tz'aj eb' te schac'ajil cha.

⁵ Yowlal tz'och 50 scolc'ab'il sti junjn c'aj te', 'icha yic te b'ab'l cha, 'ixta pax yic te schac'ajil. 50 scolc'ab'il sti junjn eb' te', sec wach' tz'aj schan sb'a eb' te schab'il.

⁶ Tza'n b'o pax 50 slocnub'al te nab'a oro tz'aji, sec wach' tz'aj schan sb'a te 'a schac'ajil, jun jen̈nn̈ej tz'ajch te 'a in cajnub'.

⁷ Tza'n b'o pax uxlche cortina yet' xil no chiwo ch'alb'il, sec a 'oj q'ue 'a yib'n̈ in cajnub'.

⁸ Smasnil jun tzo'n̈ cortina cha, lajnn̈ej tz'aj yechel, nan̈lschan̈lajn̈il metro tz'aj snajtil yoc, ax slewnal sat, chab' metro tz'aji.

⁹ Tza'n tz'isxoc syam sb'a o'e'oc cortina cha, jun jen̈n tz'aj yo'il. Tza'n tz'isxoc syam sb'a waque xo, a jun swacl cortina cha, chapacn̈ tz'aji, ata tz'emt pacn c'axp xo chi 'a sat 'och Mantiado, atn in cajnub' cha.

¹⁰ Tzlajw cha, tza'n 'ajxoc 'och 50 scolc'ab'il sti jun pac' cortina cha, 'icha yic jun b'ab'l cha. 'Ixta pax yic jun schac'ajil cha, 50 scolc'ab'il sti junjn c'aj cortina cha, sec wach' schan sb'a 'a schac'ajil.

¹¹ Tza'n b'o pax 50 slocnub'al nab'a bronce tz'aji, sec wach' schan sb'a 'a schab'il. Jun jen̈n tz'ajq'ue smasnil 'a yib'n̈ in cajnub'.

¹² Yujto najt yoc jun tzo'n̈ cortina cha, yuj cha, tz'emcn pacn c'axp xo 'a junjn spac'b'il 'a spatquil 'eli, 'icha 'a sat 'och cha.

¹³ 'Ixta 'oj 'aj smacchj 'el in cajnub' yuj jun tzo'n̈ cortina cha. 'Oj 'em pacn eb' 'a junjn spac'b'il, 45 centímetro 'oj 'em pacn 'a junjn spac'b'il.

¹⁴ Tza'n b'o no stz'umal calnelu chac tz'aj yoch yan̈il, yet' no tz'um caw lab'b'i, sec a tzq'ue smacloc yib'n̈ Mantiado cha.

¹⁵ Tza'n b'o te 'a'nte 'a te acacia, yujto a te 'oj 'och 'a in cajnub'. Wach' tzotj a'n b'o te'.

¹⁶ A junjn te 'a'nte cha, nan̈l yol metro tz'aj snajtil yoc, ax slewnal sat, 65 centímetro tz'aji.

¹⁷ Tzcan pax chab'oc yim eb' te 'a yoctac, sec to wach' 'oj ecxoc scha sb'a te yet' sb'achnub'al yalan̈. 'Ixtan̈ej tz'aj sb'o smasnil te 'a'nte tz'och 'a in cajnub' cha.

¹⁸ A yic tzb'o te', junc'l 'a'nte tz'och 'a in cajnub' 'a spac'b'il 'a stojlal sur.

¹⁹ Tza'n b'o pax chawinc sb'achnub'al yaln̈ eb' te', nab'a plata tz'aji. Tzyal 'el'chi, cha'chb' sb'achnub'al yaln̈ junjn te 'a'nte chi 'aj tzcolx 'ejm te yim cha.

²⁰ Ax 'a junx spac'b'il in cajnub' 'a stojlal norte, junc'l pax 'a'nte chi tz'och 'a 'a.

²¹ Tza'n b'o pax chawinc sb'achnub'al yalan̈, nab'a plata tz'aji, tzyal 'el'chi, cha'chb' sb'achnub'al yaln̈ junjn 'a'nte cha.

²² Ax 'a junx spac'b'il 'a stojlal 'aj tz'em c'u, waque pax 'a'nte tz'och 'a 'a.

²³ Tza'n b'o cha'chb' xo 'a'nte 'oj 'och 'a junjn yisquinyoal 'a spatc 'eli.

²⁴ A jun tzo'n̈ 'a'nte cha, tzecx scha sb'a eb' te 'a yich, masnto tzq'ue'ch 'a 'aj tz'och q'uen argoya. 'Ixta wal tz'aj cha'chb' xo te 'a'nte chi tz'och 'a yisquinyoal cha.

²⁵ Yuj cha'chb' xo te cha, yuj cha, wajxque to te 'a'nte chi 'a smasnil. Waclajn̈e to pax sb'achnub'al yaln̈ te nab'a plata, tzyal 'el'chi cha'chb' sb'achnub'al yaln̈ junjn 'a'nte'.

²⁶ Tza'n b'o o'e te can̈nub' 'a te acacia, sec ata 'oj 'och eb' te 'a'nte chi 'oj 'och 'a spac'b'il in cajnub' cha.

²⁷ O'e pax can̈nub' yic eb' te 'a'nte chi tz'och 'a junx spac'b'il, o'e to pax can̈nub' yic te 'a'nte tz'och 'a jun spac'b'il schicn 'a spatc 'eli, atn jun tzcan 'a stojlal 'aj tz'em c'u.

²⁸ Ax te scan̈nub'al yic snan̈al, junn̈j te', masnto tz'el'ch te 'a junjn schiquin, 'icha spacl jun 'a'nte', 'ixta te tz'el 'a schicn cha.

²⁹ Tzlajw cha, tza'n 'ajxoc 'och oro 'a eb' te 'a'nte cha, tza'n pax 'ajxoc 'och argoya nab'a oro 'a eb' te', sec ax eb' te can̈nub' 'ayx 'och oro 'a spatquil, wach' 'oj 'aj eb' te yec' 'a yojl eb' q'ue'en.

³⁰ A yic tz'acw 'el'ch smasnil, tza b'on chan̈ in cajnub' 'icha wal tzwutj in ch'oxn yechl 'aych 'a sjolm lum witz tic.

³¹ Tzlajw cha, tza'n b'o junx te cortina yet' te q'uic'mucnac ch'al, te púrpura, te chac yet' te lino ch'umb'il, tza'n tz'isxoc 'och yechl eb' querubín 'a te'.

³² Tzlajw sb'o'i, tza'n 'och slocnub'al te nab'a oro. Tza locnq'ue te 'a chan̈e te 'oy acacia. Ax te 'oy cha, tz'och oro 'a eb' te', tza'nq'ue eb' te 'a yib'n̈ chan̈e sb'achnub'al yalan̈, to nab'a plata.

³³ Tzlajw cha, tza locnq'ue te cortina chi 'a yaln̈ 'aj 'aych eb' q'uen slocnub'al te nab'a oro, ax 'a spatquil 'och te cortina cha, ata tza'ch scaxail in trato, sec a te cortina chi tzpojn snan̈l jun Lugar wic yaji, yet' jun Lugar to cojn in 'ay wico'.

³⁴ Tzlajw cha, tza'n q'ue smac te scaxail in trato, te tzcan 'a jun Lugar to cojn in 'ay wic cha.

³⁵ Tza'n pax 'och te mexa 'a yojltac 'elt te cortina cha, 'a spac'b'il in cajnub' 'a stojlal norte. Ax pax jun yet'l cantil, ata tzcan 'a stojlal sur, 'a yojltac 'elt te mexa.

³⁶ Tza'n b'o junx te cortina tz'och smacloc sti Mantiado, tzb'o yet' te q'uic'mucnac ch'al, te púrpura, te chac yet' te lino ch'umb'il, wach' tz'aj yoch yelwnub'l yuj mach tzb'oni.

³⁷ Tza'n b'o o'e yoyl te cortina chi 'a te acacia, tz'och oro 'a eb' te'. Tza'n b'o slocnub'al eb' te', nab'a oro tz'aji. Tza'n b'o pax o'e sb'achnub'al yaln̈ eb' te 'oy chi 'a q'uen bronce, xchi Dios.