Ex 25 - Chuj San Sebastian Bible

Ofrenda tz'ajx yuj scajnub' Dios

¹ 'Ix yaln pax Jehová 'a Moisés 'ixtic:

² Al jun tic 'a eb' et israelal, to tzyac' eb' junc yofrenda 'ayin. A jun ofrenda cha, 'oj q'ue wan 'a scal smasnil eb' to tz'el 'a sc'ojl ya'ni.

^3-7 A tas 'oj yac' eb' cha, atn jun tzo'n̈ tic: q'uen oro, q'uen plata, q'uen bronce, te q'uic'mucnac ch'al, te púrpura, te chac, te lino caw wach', no xil chiwo, stz'umal calnelu chac yaj sb'o'i, no tz'um caw tzlab'b'i, te acacia, aceite yic te olivo tzc'anx 'a cantil, perjuma tzc'anx 'a junc tas tz'ochcn wico'oc, incienso su'q'ui sjab', eb' q'uen cornalina yet' jun tzo'n̈ xo eb' q'uen q'uen wach' yilxi, atn eb' q'uen tz'och yelwnub'loc te camx tzcuch efod 'icha chaleco yet' te smacl sn̈i sc'ojl win sat ya'mal 'och sti eb' 'anma 'ayin.

⁸ Tze b'on junc in cajnub', sec wach' tzin can cajn 'a e cal.

⁹ Palta a jun lugar 'aj tzin 'aj cajn cha, smasnil tas 'oj c'anxoc 'a yojol, lajnn̈ej tz'aj sb'o'i, 'icha wal yaj yechl 'oj in ch'ox 'ayach, xchi Dios.

Te scaxail strato Dios

¹⁰ 'Ix yaln pax Jehová 'ixtic: Tzac' b'o junc caxa 'a te 'a'nte acacia, jun metro yet' lajn̈e xo centímetro tz'aj spac'b'il, 65 centímetro tz'aj schiquin, 65 centímetro pax tz'aj ste'il.

¹¹ Tzlajw cha, tz'och oro 'a yojol, yet' 'a spatquil, tza'n 'ajxc 'och junc yelwnub'l stitac.

¹² Tza'n b'o chan̈e'oc q'uen argoya nab'a oro tz'aji, tzlajw cha, tza'n 'ajxoc 'och 'a eb' te yoc chi schan̈il, cha'chb' 'a junjn spac'b'il.

¹³ Tza'n b'o pax te can̈nub' 'a te acacia, tz'och pax oro 'a eb' te'.

¹⁴ Tzlajw cha, tza'n 'ec' eb' te 'a yojl eb' q'uen argoya, eb' q'uen 'ay 'a yoc te caxa cha, sec wach' sb'achx chan̈ te'.

¹⁵ Palta man̈x e'li, tzcann̈j cab' eb' te 'a yojl eb' q'uen argoya 'aych 'a yoc te caxa cha.

¹⁶ Tzlajw cha, tza'n 'ejm eb' q'uen q'uen 'aj tz'ib'b'il 'och in checnb'il 'a yojl te caxa cha, atn eb' q'uen 'oj wac' 'aych tic.

¹⁷ Tza'n b'o pax smacl sti', nab'a oro tz'aji, jun metro yet' lajn̈e xo centímetro tz'aj spac'b'il, 65 centímetro tz'aj schiquin.

¹⁸ Tza'n b'o yechl chawn̈ querubín nab'a oro tz'aji, tztenx b'o yet' martillo, sec tz'och 'a yib'n̈ sti schicn smac te caxa cha.

¹⁹ Junn̈j tz'aj sb'o smacl te chi yet' yechl chawn̈ querubín cha; junjn tzcan 'a yib'n̈ sti smac jun caxa chi 'a schiquin.

²⁰ Q'uelc'mb'a tz'aj sat eb' querubín cha, tz'at t'an̈n sat eb' chi 'a yib'n̈ smac te' caxa cha, ax sc'axl eb', tz'ec' jen̈n 'a yib'n̈ smac te cha.

²¹ Tzlajw cha, tza'n q'ue smac te caxa cha, palta tza'cn 'ejm eb' q'uen q'uen 'aj 'aych in checnb'il 'a yojl te', atn eb' q'uen 'oj wac' 'aych tic.

²² A 'a yib'n̈ smac te caxa cha, ata 'oj in ch'ox in b'a 'ayach, 'a snan̈l yechl chawn̈ querubín 'aych 'a yib'n̈ sti smac te scaxail trato, ata 'oj wac' ojcoc 'el smasnil in checnb'il 'a eyib'n̈ ax israel ex tic, xchi Dios.

Te smexail 'ixm pan 'a yojltac Jehová

²³ 'Ix yaln Jehová 'ixtic: Tza'n b'o junc mexa 'a te 'a'nte acacia, 90 centímetro tz'aj spac'b'il, 45 centímetro sat, 65 centímetro tz'aj ste'il.

²⁴ Tza'n 'ajxoc 'och oro 'a te', tz'och junc yelwnub'l sti'.

²⁵ Tza'n 'ajxoc 'och junc smacl sti te mexa cha, nab'a oro tz'aji, tzq'ue wan tzeln 'a sti te', uque centímetro tz'aj slewnal sat.

²⁶ Tza'n b'o chan̈e argoya nab'a oro, tzlajw cha, tza'n 'ajxoc 'och 'a junjn yisquinyoal 'aj 'aych eb' te yoc cha,

²⁷ sec wach' junn̈j tzcan yet' 'aj tzeln chan̈ smacl sti cha. Axta 'oj 'ec' eb' te can̈nub' chi 'a yojl eb' q'ue'en, sec wach' 'oj b'achxoc b'ey te mexa cha.

²⁸ Tza'n b'o eb' te scan̈nub'l chi 'a te acacia, eb' te 'oj 'och sb'achnub'alc te mexa cha, tza'n 'ajxoc 'och oro 'a eb' te'.

²⁹ Tza'n b'o yuc'b'al, scucharail, xalual yet' svasoal 'aj tzchax ofrenda to yalil yaji. Oron̈ej tz'aj smasnil.

³⁰ Tza'n b'o 'ejm 'ixm pan 'a sat te mexa chi 'a wojltac, yujto a 'ixm pan cha, wicn̈ej yaj 'ixim, xchi Dios.

Jun yet'l cantil nab'a oro

³¹ 'Ix yaln pax Jehová 'ixtic: Tza'n b'o junc yet'l cantil nab'a oro tz'aji. A yet' q'uen martillo tztenx b'o'oc, atn tic: yich 'aj tz'em b'achan, ste'il, sc'ab', svasoal 'icha snich tz'ajchi. A jun tzo'n̈ cha, junn̈j tz'aj sb'o 'a smasnil.

³² Ax 'a spenc ste'il, ata tz'elt waque sc'ab', 'oxe 'a junjn spac'b'il.

³³ A junjn sc'ab' tz'elt 'a spenc stel cha, yowlal tz'och 'oxe svasoal 'icha yilx snich te almendro, junn̈j tz'aj yet' yib' cha.

³⁴ An̈jtona pax jun stel spenc cha, yowlal tz'och pax chan̈e svasoal 'icha yilx snich te almendro.

³⁵ A 'a yaln̈ 'aj 'ay 'elt cha'chb' sc'ab' cha, a pax ta tz'och junjn snich.

³⁶ A jun tzo'n̈ snich, yet' jun tzo'n̈ sc'ab' cha, junn̈j tz'aj sb'o yet' jun yib' cha. A jun cha, oron̈ej tz'aji. A yet' q'uen martillo tztenx b'o'oc.

³⁷ Tza'n b'o pax uque scantilal. Tza tojlb'tzan 'och 'a yet'l cha, sec tzyac' sacq'uinlal 'a yojltac.

³⁸ Ax sluchlab'il 'el stan̈il mecha, yet' yuc'b'al 'aj tz'em stan̈il c'ac' cha, nab'a oro tz'aji.

³⁹ Tza c'an 72 libra q'uen oro yuj sb'omb'il jun yet'l cantil cha, yet' pax yuj smasnil syamc'ab'il.

⁴⁰ Tzcham wal eln tas tz'aj sb'o'i, 'icha wal tzwutj in ch'oxn yechl 'aych 'a sjolm lum witz tic, 'ixta wal tzotj a'n b'o'oc, xchi Dios 'a Moisés.