Ex 23 - Chuj San Sebastian Bible

Ley yuj tas tz'aj sb'o yaj owal

¹ Man̈ eya'ch e b'a eyaln speclal eyit 'anma'il, man̈ eya'ch e b'a yet' junc mach tu snab'en, yic tzeya'n 'och e b'a testigoal 'a tas man̈ yeloc.

² Man̈ eya'ch e b'a yet' eb' tzb'on maysch'olnil. A yic 'ay junc tas tz'ajx eyala', tojln̈ej tzeyutj eyalni, man̈ eya'ch e b'a 'a tas tzyal smasnil eb' tu cha.

³ Toxn̈ej to meb'a junc 'anma' wan sb'onyaj eb' yajal, man̈ eya'ch e b'a e colni.

⁴ Q'uinloc a junc 'ajc'ojl yajch 'ayex, 'ay junc swacax, mto junc sb'uru satnac, toto tz'ilchj eyu'uj, tze ch'ox 'a 'a.

⁵ Yowlal tzex colwj 'a eb' tzchichn 'och 'ayex. Q'uinloc tzeyil stelw sb'uru junc eb' 'a yaln̈ yicatz, yowlal tzex colwj eyi'n chan̈ no yet'oc.

⁶ A junc meb'a 'anma tznib'j to tze b'oyaji, toto tojl tas tzyala, man̈ e tenc' tas tzc'an cha.

⁷ Man̈ eya'ch e b'a eya'n 'och 'es 'a yib'n̈ junc 'anma'. Man̈ eya'ch pax chaml 'a yib'n̈ junc 'anma may smul, yujto an 'oj wac' syailal eb' 'ixta tzb'o cha.

⁸ Man̈ e cha q'uen c'ultac tumin yic tze b'onyaj junc owal. Yuj q'uen tumn cha, 'icha to may snab'en jun tzb'onyaj junc owl cha, ax 'a yib'n̈ jun may smul cha, ata tzya'cn 'ochi.

⁹ Man̈ eyixtc eb' 'anma chuc schon̈ab', yujto ax tic najtl 'e'nc ex cajn 'a Egipto, tox 'ix eyila chajtlto yet' yailal ex 'aj eyec' cajn 'a chuc chon̈b'al.

Yowlal tz'ilj lum lu'um

¹⁰ Munljan̈c 'a sat lum lu'um, tze moln chan̈ tas tzyac' lum 'a waque ab'il.

¹¹ Palta ax 'a yucl ab'il, man̈x eyawc lu'um, 'a'c 'iljoc lu'um. A smasnil tas tzq'uib' 'a sat lu'um, yic eb' meb'a tz'aji, eb' 'ayc' 'a yol e chon̈ab'. A pax jun tzo'n̈ chi 'oj sc'ux no calte'al noc'. 'Ixta pax tzeyutj te uva yet' te olivo.

¹² Waquen̈ej c'u tzex munlji, ax 'a yucl c'ual tzex 'ilji, sec tz'ilj pax no e wacx tzmunlji, e b'uru, eb' e moso, yet' eb' chuc chon̈b'al cajn 'ec' eyet'oc.

¹³ Yicljec smasnil tas 'ix wal 'ayx tic. Man̈ eyal e b'a 'a jun tzo'n̈ tzalx 'och diosal, man̈ e b'inoc sb'i eb'.

A 'oxe niwc q'uin̈

¹⁴ Tze na 'oxe niwc q'uin̈ tic 'a yol junjn ab'il, yic tzeyi'n chan̈ in b'i.

¹⁵ A 'a jun 'uj Abib sb'i, ata tze na sq'uin̈l 'ixm pan may yich, 'icha wutjnac waln 'ayex. Uque c'u tze waj 'ixm pan may yich, yujto a 'a yic jun 'ujl cha, ata ex 'elt 'a Egipto. May cab' junc mach tzsat sc'ojl yi'n cot yofrenda 'a wojltac.

¹⁶ Tze nan pax sq'uin̈l yic tz'el-l sb'ab'l sat smasnil tas 'awb'il eyuj 'a jun ab'il cha. An̈jtona', tze nan pax sq'uin̈l yic tzlajw e moln chan̈ sat smasnil tas 'awb'il eyuj cha.

¹⁷ An Jehová in, an tzwala, to yowlal 'ox 'ejm tzjaw smasnil eb' winc 'a wojltac, atn 'a yic tze nan 'oxe q'uin̈ tic 'a junjn ab'il.

¹⁸ A yic tzeya'n no xajmb'al 'ayin, man̈ eyac' no schiq'uil yet' 'ixm pan 'ay yich, man̈ e molcn xepual no xajmb'al chi yico'oc junc xo c'u.

¹⁹ A wal sb'ab'l sat eyawb'en wach' tz'el-l 'a sat lum lu'um, a tzeyij cot 'a watut an Jehová e Diosal in tic. Man̈ e tz'an̈ no cotc chiwo 'a scal yal yim no snun.

Jun yángel Jehová

²⁰ 'Oj in checb't jun wángel eyet'oc yic tzex stan̈wni 'a yol b'e, ax ex yi'n 'at 'a jun lugar 'ajtil wach'x yaj wu'uj.

²¹ Man̈ eyi'l e b'a 'a stz'ey jun ángel cha, man̈ e pitc e b'a 'a 'a, caw tzeyiclj tas 'oj yala', yujto a tzmunlj in jeloc. A jun cha, ma'oj yac' lajwc e mul 'a eyib'an̈.

²² Palta toto 'oj eyiclc tas 'oj yala', ax eyiclni smasnil tas 'ix wal 'ayex, toto 'ixta', 'oj woch 'ajc'ojlal 'a mach 'ajc'ojl 'oj 'ajch 'ayex, 'oj woch lin̈n 'a yojltac mach 'oj cob' ste'wtzoc sb'a 'a eyojltac.

²³ 'Oj b'ab'ljoc jun wángel chi eyu'uj, ax ex yi'n 'at 'a lum slum eb' amorreo, eb' hitita, eb' ferezeo, eb' cananeo, eb' heveo yet' eb' jebuseo; 'oj in satl eb' 'a jun 'ejmn̈ej.

²⁴ Man̈ e b'eylb'oc sb'eyb'al jun tzo'n̈ 'anma cha, man̈ ex 'em cumn 'a yojltac sdiosal eb'; man̈ eyal e b'a 'a 'a. A jun tas tze b'o'o, to tze mac' poj smasnil sdiosal eb' cha, yet' q'uen q'uen 'aj tzleslwi eb'.

²⁵ Cojn 'ayn Jehová e Diosal in tic, an̈j 'ayn tzeyal e b'a. Toto 'ixta', 'oj wac' in yaxilal 'a yib'n̈ tas tze c'uxu, yet' 'a yib'n̈ tas tze yuq'uej. 'Oj wi'l smasnil yab'il 'a e cal.

²⁶ 'Oj wac' najtxb'oc e q'uinal. Ax 'a yol e chon̈b' cha, may junc 'ix 'ix ton̈j 'oj 'ec' yune', may pax junc 'ix ma'oj 'unewoc.

²⁷ 'Oj in xib'tc eb' 'anma tzchichn 'och 'ayex, ax wa'n somchjoc 'el eb' tzeyac' owl yet'oc. Smasnil eb' 'ajc'ojl yajch 'ayx 'a junjn chon̈b' 'aj 'oj eyeq'ui, an 'oj wac' 'at eb' 'elc 'ayex.

²⁸ A yic mantzac ex c'och 'a lum lum cha, ax wa'n somchjoc 'el snab'en eb' 'ajc'ojl cha, ax s'at eb' 'elc eyu'uj, atn eb' heveo, eb' hitita yet' eb' cananeo.

²⁹ Man̈ junn̈joc ab'il 'oj wi'l eb' mu'c 'a sat lum lum cha, sec wach' ma'oj juwc lu'um, yujto 'ay smay sniwtj sb'isl no calte'al noc', ax tz'aji tzex yixtn pax e no'.

³⁰ C'ojnc'ojnil 'oj wutc wi'n 'el eb' 'anma chi 'a lum lum cha, masnto yic 'oj niwtjoc e b'isul, ax sb'ut'j 'el sat lum lum chi eyu'uj.

³¹ Tox 'ix wac' 'ejm smon̈jonal 'ajtil 'oj 'ec' lum e lum cha: tz'el yich lum 'a a Chac Mar, masnto tzc'och lum 'a a Éufrates, tz'ec' pax lum 'a a Mar Mediterráneo 'a 'aj 'ayc' eb' filisteo, masnto tzc'och lum 'a cusltac lu'um. 'Oj wa'ch eb' cajn 'a jun lugar chi 'a yol e c'ab', ax xo 'oj e pechl eb' 'a sat lum lum cha.

³² Man̈ e b'o junc e trato yet' eb', man̈ ex 'och 'emmquilal pax 'a sdiosal eb' cha.

³³ May cab' eb' tzcan eyet' 'a yol e chon̈ab', sec wach' ma'oj ex sjucb'tzoc eb' 'a tas maysch'olnil 'a in sat. Palta toto tzeyac' servil sdiosal eb' cha, wal yel mun wal ax tzeyixtj 'el e b'a, xchi Dios 'a Moisés.