Ex 22 - Chuj San Sebastian Bible

Ley 'a eb' tz'och smul 'a junc tas

¹ Q'uinloc 'ay mach tz'elc'n junc wacax, mto junc calnelu yic tzmilni mto tzchon̈li, palta toto tz'ilchj yuj yelc'mal cha, toto 'ixta', 'own̈ xo tzyutj sjeln no wacx cha, toto calnelu, chan̈wn̈ xo tzyutj sjelni.

² Toto 'ay junc mach wan yoch 'elc'l 'a junc n̈a, ax tz'aji tzyamchji; q'uinloc tzlajwi, mto tzcham yuj yelc'mal cha, toto 'ac'wal, may mach tztac' ya'n yowlal.

³ Palta toto c'ul tzyamchji, ax tz'aji tzmilxi, to 'ixta', 'ay pax yowlal schami. A junc 'elc'm tzyamchji, yowlal tztoj tas 'ix yel'j cha, palta toto may stumin, tztac' schon̈x 'eli, sec tztac' stojn tas tzyel'j cha.

⁴ Q'uinloc 'ay junc 'elc'um tzyamchj yet' junc no cajb'il noc', toto pitzn to no', cha'ejm tzyutj stojni, toxn̈ej wacax, b'uru, mto calnelu.

⁵ Q'uinloc 'ay mach tz'at yac' wa scajb'en noc' 'a sat slum junc xo mach, mto 'a scal smunljel junc cha, yowlal tzjel 'a jun 'aj tz'och smul cha. A wal smunljel caw wach' tzyac' sjeloc.

⁶ Q'uinloc 'ay mach tzcomn 'a'n 'och c'ac' 'a sat slum junc xo mach, mto tz'ec' c'ac' yu'uj, ax tz'aji tz'a nan̈loc smunljel junc xo mach yu'uj. A jun tz'a'n 'ec' c'ac' cha, yowlal tztoj smasnil tas chi tz'a yuj cha.

⁷ Q'uinloc 'ay mach tzyac' molxoc stumn yuj junc xo mach, palta ax tz'aji tz'el'x 'elt q'uen 'a yol yatut jun moljnac cha. Toto tz'ilchj jun 'elc'm cha, yowlal cha'ejm tzyutj sjeln jun tumn cha.

⁸ Palta toto matz 'ilchj jun 'elc'm cha, tz'ijx 'at jun 'ajn̈a chi 'a sat eb' juez, yic tzsayx 'ilxoc toto man̈oc jun 'ajn̈a chi tzc'ub'n 'el jun tumn cha.

⁹ Q'uinloc 'ay mach tzyalch junc tas yico'oc, 'icha junc wacax, calnelu, b'uru, pichul mto junc xo tas tzsati, tzyaln jun chi yico'oc junc cha, a eb' chawn̈ cha, tz'ijx 'at eb' 'a sat eb' juez. A mach tz'a'n 'es, yowlal cha'ejm tzyutj sjeln jun chi 'a mach 'ay yico'.

¹⁰ Q'uinloc 'ay mach ton̈j tzchaj can yil junc b'uru, junc wacax, junc calnelu, mto junc xo tzann̈j noc'al, ax tz'aji, tzcham no 'a 'a, mto ton̈j tzlajw no', mto tz'at no yuj 'elc'um, toto may pax mach tz'ilni,

¹¹ ax ya'n jun 'anma chi sti 'a mach 'ay yic no noc' chi 'a wojltac an Jehová in, chajtlto man̈oc tz'och smul 'a no'. Toto a mach 'ay yic no noc' cha, tzchaj yab' tas tzyal jun cha, to 'ixta', matz tojx no'.

¹² Palta toto q'ueln 'och jun tztan̈wni no cha, yic tz'at no yuj 'elc'um, yowlal tztoj 'a mach 'ay yic no cha.

¹³ Q'uinloc a junc no calte'al noc' tzchin no', yowlal tz'at sch'ox jun tztan̈wni no chi jac tas tzcan 'a no 'a mach 'ay yic no cha, sec matz tojx no'.

¹⁴ Q'uinloc 'ay mach tzmajnan junc no munljum noc', chej, mto wacax, ax tz'aji tzcham no', toto matz yil win 'ay yic no cha, yowlal tztoj win tzmajnan no cha.

¹⁵ Palta toto 'ayc' win 'ay yic no cha, yic tzcham no', matz toj win tzmajnan no cha, yujto ton̈j tzmajnj win no', cojn smajnub'l no tzyac' winac.

Ley 'a eb' 'anma yuj tas tzb'o'o

¹⁶ Q'uinloc 'ay junc winc tzcomn yamn cot junc 'ix cob's 'ix, mant 'aj 'ay strato 'ix yet' junc xo winac yic tznupni, tzyecn pural win 'ix smuln yet'oc. Toto 'ixta', yowlal tzyac' win q'uen tumn yic 'ijb'a 'a smam snun 'ix, 'icha xon b'eyb'al, tzlajw cha, tzyi'n can sb'a win yet' 'ix.

¹⁷ Toto matz yal sc'ojl smam 'ix tzyij sb'a 'ix yet' winac, palta yowlal tzyac' win jun tumn 'a smam snun 'ix, 'icha xon sb'eyb'al eb' 'anma', yic tz'och yichmil junc 'ix cob'es.

¹⁸ Smasnil eb' 'ix b'alum, yowlal tzcham eb' 'ix.

¹⁹ Toto 'ay mach tzmuln yet' no noc', yowlal tzchami.

²⁰ Toto 'ay mach tzyac' xajmb'al 'a tas tzalx 'och diosal, to man̈oc 'ayn an Jehová in tzyac'a, yowlal tzchami.

²¹ Man̈ eyixtc eb' 'anma chuc schon̈b' cajn 'a e cal, yujto 'e'nc ex pax cajn 'a scal eb' 'anma man̈ eyit chon̈b'oc 'a Egipto.

²² Man̈ eyixtc eb' 'ix 'ix chamnc yichmil, yet' pax eb' meb'a 'unn chamnc smam.

²³ Toto tzeyixtj eb', ax yaln sb'a eb' 'ayin, an xo 'oj in colwj yet' eb'.

²⁴ Caw 'oj cot wowl 'ayex, ax ex in miln cham yet' q'uen espada. 'Oj can eyistl 'a man̈x 'a yichmil, ax scan pax eyunnal 'a man̈x 'a smam.

²⁵ Toto tzeyac' e tumn majnil 'a junc meb'a 'anma', mto 'a junc eyit chon̈b' 'ayc' eyet'oc, man̈ e c'an yune 'e tumn cha.

²⁶ Toto a jun 'anma cha, tzya'cn junc spichl 'ayx yuj smajn tumn cha, a yic mantzac 'em c'u, tzeya'n can pax meltzjoc 'a 'a,

²⁷ toq'ue cojn jun spichl chi tzya'ch yuj si'ic. Lemb'il may tas tzyac'q'ue 'a yib'an̈ yic tzwayi. Yuj cha, toto tzyal sb'a 'ayin, 'oj in colwj yet'oc, yujto an tic, caw tz'o'ch in c'ojl 'a eb' 'anma'.

²⁸ Man̈ eyal tu paxti 'a yib'n̈ eb' juez, mto 'a yib'n̈ eb' yajl yaj 'a yol e chon̈ab'.

²⁹ Man̈ e tench wan e b'a eya'n eyofrenda 'ayin: Atn ofrenda yic smasnil sb'ab'l sat eyawb'en. A eb' e b'ab'l winc 'unin, yowlal tzeyac' eb' 'ayin,

³⁰ 'ixta pax sb'ab'l 'une e wacax, mto e calnelu. Tztac' tzcan no uque'oc c'u yet' snun, ax 'a yic swajxq'uejial xo yalj no', tzeya'n no 'ayin.

³¹ Ax tic caw yel wic eyaji. Man̈ e chi schib'jal junc no noc' tzcham yuj no calte'al noc', a cab' no tz'i tzeyac' chinoc.