Ex 21 - Chuj San Sebastian Bible

Ley 'a yib'n̈ eb' tz'och mosoal

¹ 'Ix yaln pax Jehová 'a Moisés 'ixtic: Atn jun tzo'n̈ checnb'il tic 'oj ac' c'anlb'axc 'a scal eb' et israelal.

² Toto 'ay junc win eyit chon̈b' tze mana, yic tz'och e mosooc, cojn waque ab'il tzmunlj 'ayex, ax 'a yucl ab'il tzyica'an sb'a, may tas tztojo yic tzyica'an pax sb'a cha.

³ Toto sch'ocj winac yic tzc'ochi, an̈jtona sch'ocj win tzpaxi. Toto ajun yistl win yet'oc, an̈jtona tzpax 'ix yistl win chi yet'oc.

⁴ Toto a spatron̈ win chi tz'a'n 'och yistzil, tz'alj pax yune 'ix, tzcan 'ix yet' yune 'a win patron̈ cha. Cojn win moso chi tzpax sch'ocoj.

⁵ Palta toto a win moso chi matz yal sc'ojl tzpaxi, yujto 'ay schamc'ojlal win 'a yistzil, 'a eb' yunnal, yet' 'a spatron̈,

⁶ toto 'ixta', ax win spatron̈ win cha, ax win tz'i'n 'at win 'a yojltac eb' juez. Tznitzx 'och win 'a stz'ey smarcoal smac sdespacho eb' juez cha, axta tzolx can schicn win yet' junc q'uen niwquil 'acxa', sch'oxnb'il yic tzcancn win yet' spatron̈ chi 'a jun 'ejmn̈ej.

⁷ Toto 'ay mach tzchon̈l yisil, yic tz'och 'ix ya'malc servil junc mach, matz tac' yel 'ix 'a libre 'icha eb' winac.

⁸ Q'uinloc 'ay strato 'ix yet' spatron̈ cha, to tz'och 'ix yistloc winac, ax tz'aji matz yij pax win 'ix yujto a win matz yal sc'ojol, tztac' ya'n meltzjoc win smam 'ix 'ix chi q'uen stumn win patron̈ cha. Toto may q'uen tumn chi yuj win smam 'ix cha, palta matz tac' schon̈x 'el 'ix yuj spatron̈ chi 'a junc xo chuc chon̈b'al.

⁹ Toto a junc yunnal win spatron̈ 'ix chi tz'i'n 'ix yistziloc, ax win patron̈ cha, 'icha wal cab' yisl win tzyutj 'ix.

¹⁰ Toto a win spatron̈ 'ix chi tz'i'n yistziloc, ax tz'aji, tzyi'n pax win junc xo 'ix, matz tac' scann̈j 'ix b'ab'l chi 'ixta'. Yowlal tzyac' win tas tzc'ux 'ix, spichl 'ix, 'ay pax yaln 'ix yic 'a winac, yujto yichmil 'ix winac.

¹¹ Palta toto matz yiclj win spatron̈ 'ix chi ya'n 'oxe tas tic, tztac' yel 'ix 'a libre, man̈x 'a tas tztac' stojn 'ix yic tz'el 'ix 'a libre cha.

Ley 'a yib'n̈ eb' tzcomn ma'wji

¹² A mach tzmiln cham junc 'anma', yowlal tzmilx pax chamoc.

¹³ Palta toto man̈ sc'anc sc'ojl tzmilwj cha, lemb'il to stiempoal xo scham pax junc 'anma cha. Toto 'ixta', an Dios in tic, an 'oj wala', 'ajtil 'oj 'at sc'ub'c 'el sb'a junc tzmilwj cha.

¹⁴ Palta a mach ton̈j tzcomn cot yowl 'a junc yit 'anma'il tzmiln chamoc, wach'xam tz'at sc'ub'c 'el sb'a 'a yet'l xajmb'al, palta yowlal tz'at sayxoc 'eq'ui, tzlajw yilchji, tzmilx chamoc.

¹⁵ A mach tzmac' smam snun, yowlal tzchami.

¹⁶ A mach tz'elc'n junc 'anma', toxn̈ej tox schon̈li, mto 'ayt 'ec' yet'oc, yowlal tzcham jun 'elc'm cha.

¹⁷ A mach tzb'aj smam snun, yowlal tzchami.

¹⁸ Q'uinloc 'ay chawn̈oc mach tzyac' owal, 'ay junc tzlajw yuj junc xo cha. Toto q'uen tzya'lb'ej mto sc'ab' tzya'lb'ej, palta tz'ec' t'ocn junc chi yab'n sya'l jaye'oc c'u.

¹⁹ Ax yic 'ayx sjayloc c'u sma'n sb'a eb' cha, tzb'eyx 'ec' win lajwnac chi yet' sc'ococh. Ax win xma'wj cha, tz'el win 'a libre, palta yowlal tztoj win sremel win tzlajw cha, yet' stojl sc'u winac.

²⁰ Q'uinloc 'ay mach tzc'anlb'ej te', yic tzma'n junc smoso, junc winac, mto junc 'ix ya'mal servil, toto tzcham yuj muc'uc, a jun tz'och smul cha, yowlal tzcham paxi.

²¹ Palta toto tzat 'ec' jun moso chi jaye'ocx c'ual, 'ixta to b'i'an tzchami, toto 'ixta', man̈xtzac 'ajx 'och chaml 'a yib'n̈ jun spatron̈ cha, yujto yic yaj jun smoso cha.

²² Q'uinloc 'ay chawn̈oc winc tzyac' owal: A yic wan ya'n eb' owl cha, tzyamchj c'och junc 'ix 'ix sma'n ewinac. Toto 'ayx tz'i'n pax 'ix, tz'ec' yune 'ix cha, palta may tas tzlajw 'a 'ix, ax win tz'och smul cha, yowlal tzyac' win smulta, a tzyal jantc tzc'an win yichmil 'ix 'ix cha. An̈jtona', a tzyal tas tzyutj eb' juez sb'on yaji.

²³ Palta toto tzlajw 'ix, 'icha tz'aj 'ix slajw cha, 'ixta pax tz'aj win tz'och smul cha. Toto tzcham 'ix, yowlal tzcham pax win jun xo.

^24-25 Q'uinloc tzjuw yol sat 'ix, ye 'ix, sc'ab' 'ix, yoc 'ix, mto tz'a 'ix, tzlajw 'ix, mto sma'xi, 'icha wal tz'aj 'ix cha, 'ixta pax tz'aj win tz'och smul cha.

²⁶ Q'uinloc 'ay mach tzma'n poj yol sat junc win smoso mto junc 'ix ya'mal servil, toto 'ixta', tz'ajx 'el jun chi 'a libre yuj sjelc jun yol sat tzpoj cha.

²⁷ Q'uinloc a junc ye tzma'x 'eli, an̈jtona tz'el 'a libre yuj sjelc jun ye cha.

Ley 'a yib'n̈ junc yax chamel

²⁸ Q'uinloc 'ay junc wacx tztecn cham junc winac mto junc 'ix, yowlal tzjulx cham pax no', palta matz chix schib'jal no', may pax tz'aj jun yajl no cha.

²⁹ Palta toto yojc xon yajl no cha, chajtlto ow xon no 'a 'anma', palta matz 'ilx no', tztecx cham junc 'anma chi yuj no', yowlal tzjulx cham no', tzcham pax yajl no cha.

³⁰ Toto a yajl no wacx cha, tztoj jun tzcham cha, a tzyal jantc tzc'an eb' 'aj tz'och jun chaml cha, toto 'ixta', man̈xtzac chami.

³¹ Atn jun checnb'il tic tz'och 'a yopiso, yic tztecx junc 'unnab'il, mto 'islab'il yuj no wacax.

³² Toto a junc win smoso, mto junc 'ix ya'mal servil junc mach tztecx cham yuj no wacax, yowlal tz'ajx lajn̈schawinc q'uen tumn plata 'a jun spatron̈ jun moso cha, lajchwe onza yalil, tzlajw cha, tzjulx can cham pax no wacx cha.

³³ Q'uinloc 'ay mach matz macn can sti junc jul tzb'o'o, ax tz'aji tz'at junc no wacax, mto junc no b'uru 'a yojol,

³⁴ a jun mach 'ay yic jun jul cha, yowlal tztoj jun noc' chi 'a mach 'ay yic no noc' cha, tzlajw cha, tzcan no tzcham chi 'a 'a.

³⁵ Q'uinloc 'a swacx junc mach tztecn cham swacx junc xo mach, yowlal tzchon̈x 'el no tztecwj cha, tzpojn 'ec' eb' stojl no chi 'a 'a, tzpojn pax eb' snan̈l no tzcham cha.

³⁶ Palta toto yojc xon mach 'ay yic no wacx cha, chajtlto ow xon no', matz 'ilx no', toto 'ixta', yowlal tzyac' win junc no wach' sjelc 'a mach tzcham yic cha, ax no tzcham chi tzcan 'a 'a.