Ex 20 - Chuj San Sebastian Bible

A lajn̈e checnb'il

¹ 'Ix paxtin Jehová, xyaln smasnil jun tzo'n̈ checnb'il tic 'ixtic:

² An ton Jehová e Diosal in, an ex wij 'elt 'a yol yic Egipto 'a 'ajtil 'ayx 'och mosoal, 'aj man̈ eyico'oc e b'a.

³ May cab' junc xo e diosal 'aj tzeyac' 'ejm e b'a, palta cojn 'ayin.

⁴ Man̈ e b'o yechl junc tas e diosaloc: junc tas 'ay 'a satcha'an̈, junc tas 'ay 'a sat lum tic, mto junc tas 'ay 'a yojl eb' a mar.

⁵ Man̈ ex 'em n̈ojn 'a 'a, man̈ eyac' 'ejm e b'a 'a junc yechl cha, yujto an Jehová e Diosal in, caw tzcot wowl 'ayex toto tzeyac' 'ejm e b'a 'a junc eb' cha. 'Oj wa'ch eyailal ax mamb'il ex toto may wel'ch 'a e sat, ax wa'n jawc yailal 'a yib'n̈ eyunnal, yet' smasnil eyin̈til.

⁶ Ax pax eb' tzin chamc'ojlani, eb' tzyiclni in checnb'il, 'oj in chamc'ojloc eb' yet' yin̈tl b'aq'uin̈.

⁷ An Jehová e Diosal in tic, man̈ e comn locc in b'i 'a nab'an̈ej, yujto 'oj wac' syailal eb' tzcomn locn in b'i.

⁸ Niwn cab' yel'ch sc'ul 'iljelal 'a e sat. A 'a jun c'u cha, ata smoj eyi'n chan̈ in b'i an Jehová in.

⁹ Waquen̈ej c'u tzex munlji, yic tze b'on smasnil e munljel;

¹⁰ ax 'a yucl c'ual tzex 'ilji, yujto sc'ul 'iljelal. Matz tac' e munlj 'a jun c'u cha, yujto wicn̈ej yaji. Matz tac' smunlj eb' eyunnal, eb' eyisil, ewin e moso, eb' 'ix eya'mal servil, e cajb'en noc', mto eb' 'anma chuc chon̈b'al ton̈j 'ayc' eyet'oc.

¹¹ Yujto an Jehová in, waquen̈ej c'u in munlji yic xin b'on satcha'an̈, lum lu'um, a mar yet' smasnil tas 'ay 'a 'a, ax 'a yucl c'ual, in 'ilji. Yuj cha, a jun yucl c'u cha, wic yaji, niwn yel'ch cab' 'ayex.

¹² 'Ay cab' yel'ch e mam e nun 'a e sat, sec wach' 'oj najtxb'oc e q'uinl 'a sat lum lum tzwac' 'ayex.

¹³ Man̈ ex milwoc cham 'anma'.

¹⁴ Man̈ e b'o 'ajmulal 'a yol sc'ab' eyitb'eym junjn ex.

¹⁵ Man̈ ex 'elc'woc.

¹⁶ Man̈ eya'ch 'es 'a yib'n̈ eyit 'anma'il.

¹⁷ Man̈ e nib'c 'och yatut junc eyit 'anma'il, man̈ e nib'c 'och yistzil junc win winac, mto yichmil junc 'ix 'ix. Man̈ e nib'c 'och ewin smoso, eb' 'ix ya'mal servil, swacax, sb'uru, mto junc xo tas 'ay 'a 'a, xchi Dios.

Caw xiw eb' israel 'a Dios

¹⁸ Smasnil eb' israel cha, 'ix yab' eb' sma'n sb'a c'u, x'oc' q'uen trompeta, xyiln eb' yec' letz'lo'om, xyiln eb' sq'ue stab'l sjolm lum witz Sinaí. 'Ix xiw chan̈ eb', yuj cha, snitzn 'el'ch sb'a eb'.

¹⁹ 'Ix yaln eb' 'a Moisés 'ixtic: —Ach tzach paxtin cab' 'ayon̈, 'oj qui yiclc tas 'oj yal Dios 'ayach, man̈xoc cab' 'ayn̈ tzpaxtini, toto ma'ay, 'oj qui cham yu'uj, xchi eb' 'anma cha.

²⁰ 'Ix ta'w Moisés 'ixtc 'a eb': —Man̈ ex xiwoc, ton̈j tzwul ex yac' prowal Dios, yic wach' 'ay e xiwc'ojlal 'a 'a, sec ma'oj laj 'och e mul, xchi.

²¹ Ya' sb'a najt yajl eb' chon̈b' cha, ax Moisés 'ix c'och 'a stz'ey jun q'uic' 'asn 'a 'aj 'ayc' Dios.

Sleyl jun yet'l xajmb'al

²² 'Ix yaln Jehová 'a Moisés 'ixtic: Al smasnil jun tzo'n̈ paxti tic 'a eb' et israelal, to an Jehová in, an tzwal 'ixtic: 'Ix eyila tas xwutj paxtinc 'emt in b'a 'ayx 'a satcha'an̈.

²³ Man̈ e b'o junc e diosal to oro mto plata yic tzcob' eyaln e b'a 'a 'a, tzeyaln pax e b'a 'ayin.

²⁴ B'oc junc yet'l e xajmb'al; lum tzeya'ch 'a 'a, junc to wicn̈ej tz'aji. Ata 'oj eyac' tz'a no calnelu, mto no wacx tzeyac' xajmb'al-l 'ayin. Ata 'oj eyac' tz'a ofrenda yic junc'ojlal. A 'ajtil 'oj wala' to tzeyal e b'a 'ayin, ata 'oj in jawi, ax wa'n yaxilal 'a eyib'an̈.

²⁵ Palta toto tze b'o junc yet'l xajmb'al 'a q'uen q'ue'en, man̈ eya'ch q'uen tzeyb'il, yujto a yic tzeyx q'uen yet' jun tzo'n̈ q'uen yamc'ab', man̈x smojc yoch yet'l xajmb'alil.

²⁶ A jun yet'l xajmb'al 'oj e b'o cha, man̈ latz'quixtacc tzeyutj 'icha c'o'och, yic wach' a yic tzex q'ue 'a yib'an̈, matz 'ilx e niwnal, xchi Dios, xchi Moisés.