Ex 18 - Chuj San Sebastian Bible

Xit' Jetro yil Moisés

¹ A win Jetro ya'mal 'och sti eb' 'anma yaj 'a sdiosal eb' 'aj Madián, sn̈i pax Moisés, 'ix yab' win smasnil tas sb'o Jehová yet' Moisés, yet' pax eb' schon̈ab', yic xyi'n 'elt eb' 'a Egipto.

² A win Jetro cha, 'ix yij pax 'at win 'ix Séfora 'a Moisés, yet' chawn̈ yunnal eb', yujto meltzjnacx 'ix yuj Moisés cha.

³ A win b'ab'el, Gersón sb'i winac, yujto yaljnac Moisés chi 'ixtic: 'E'lb'a wa'jc 'a scal eb' chuc chon̈b'al tic, xchi.

⁴ Ax win schab'l cha, Eliezer sb'i winac, yujto 'ix yal pax Moisés 'ixtic: A sDiosal in mam, a in coln 'el 'a q'uen yespada win sreyl Egipto, xchi.

⁵ A yic xyab'n win Jetro cha, to a 'a lum cusltac lu'um, ata 'ay scamplamento Moisés yet' eb' yit chon̈b' 'a lum tzaln 'aj tzch'ox sb'a Dios, yuj cha, 'ix 'at Jetro chi yila', ajun 'ix yistzil Moisés chi yet'oc, yet' chawn̈ ewin yunnal eb' cha.

⁶ 'Ix ya'n Jetro alxoc 'ixtc 'a Moisés: —An Jetro in tic, a n̈i 'in, tzin jaw ach wul wila', ajun 'unx estzil wet'oc, yet' pax chawn̈ eco eyunnal, xchi.

⁷ Yajn̈j wal cha, 'ix 'elt Moisés 'a yol smantiado 'at scha sn̈i', 'ix 'em n̈ojn sc'och 'a yojltac sn̈i cha, stz'ub'n 'elt sti'. Ax yic xlajw sc'anb'lan eb' sc'ojol, 'ix 'och eb' 'a yol smantiado Moisés.

⁸ Xyaln Moisés 'a sn̈i cha tas x'aj win sreyl Egipto yet' smasnil eb' 'anma yuj Jehová, yic xcolchj 'elt eb' israel yu'uj. 'Ix yaln paxi, jantc wal syal 'ix laj yil eb' 'a yol b'e yet' tas xyutj colwjoc sb'a Jehová yet' eb'.

⁹ Caw 'ix tzalj Jetro chi yab'ni to 'ix colwj Dios yet' eb' israel cha, yic xcolx 'elt eb' 'a yol sc'ab' eb' 'aj Egipto.

¹⁰ Yuj cha, 'ix yaln Jetro chi 'ixtic: —Alx cab' wach' paxti 'a Jehová, yujto a ex coln 'elt 'a yol sc'ab' eb' 'aj Egipto, yet' sreyal.

¹¹ A ticnec, caw wal xwojquej 'eli to a Jehová, yel xo wal 'ec'b'al 'a yib'n̈ jun tzo'n̈ tzalx 'och diosal, yujto ex colx 'elt 'a yol sc'ab' eb' 'aj Egipto yu'uj, wach'xam niwquil cob' xyutj sb'a eb' 'a yojltac Jehová, xchi Jetro cha.

¹² Xlajwn̈ej cha, xya'n win Jetro chi jun xajmb'al yuj yaln wach' paxti 'a Dios; 'ay jun tzo'n̈ xo xajmb'al xyac'a. 'Ix c'och pax Aarón yet' eb' yichm wincal chon̈b' Israel 'a winac, 'ix mol wa eb' 'a yojltac Jehová yet' win sn̈i Moisés cha.

Sic'b'il 'elt eb' juez yuj Moisés

¹³ Ax 'a junx c'u, x'em wocn Moisés yic tzb'on yaj yowl eb' yit chon̈b' cha; smasnil c'u 'aych eb' 'a yojltac Moisés.

¹⁴ A yic xyiln Jetro tas tzyutj Moisés sb'onyaj eb' 'anma cha, 'ix yaln 'a 'ixtic: —¿Tas yuj 'ixta tzotj eb' 'anma tic? ¿Tas yuj achn̈ej tza b'oyaj eb'?. 'Ay eb' ton̈j tz'ec' c'u yuj 'a tic, xchi Jetro cha.

¹⁵ 'Ix ta'w Moisés 'ixtc 'a win sn̈i cha: —Tzjaw eb' 'anma tic 'ayin, yujto an tzwal 'a Dios yuj tastc tzlaj sb'o eb'.

¹⁶ Tzlaj jaw eb' 'ayn yuj owl tzq'ue wan 'a scal, an xo tzin b'oyaj eb'. Tzlajw cha, tzwaln schecnb'il Dios yab' eb', xchi Moisés.

¹⁷ Xlajw cha, xyaln win sn̈i chi 'a 'ixtic: —Man̈ wach'c 'icha tzotj tic.

¹⁸ Caw wal tzach c'unb'i, tzc'unb' pax eb' 'anma tic, yel xo wal tz'ec' 'a yib'n̈ a munlji, ma'oj a tza'wni a b'on yaj eb' a ch'ocoj.

¹⁹ 'Ab' tas 'oj wala', a Dios 'oj colwjoc et'oc. Ach tzach 'och 'a yojltac Dios yuj eb' 'anma tic, tzaln 'a Dios yuj tas tz'el sb'on eb'.

²⁰ Wach' tza cuy eb' 'a sley Dios, tzaln pax 'a eb' tas tzyutj eb' yi'n b'ey sb'a.

²¹ A jun tas 'oj a b'o ach tic, sic' 'elt jaywn̈oc eb' winc to 'ay xiwc'ojlal 'a Dios 'a scal eb' et israelal tic, eb' caw tojl snab'en, eb' man̈ comnoc tztecl tumn 'a eb' 'anma', tza'n 'och yopiso eb' yiln eb' 'anma tic. 'Ay eb' tza'ch yajlil 'a junc mil 'anma', 'ay pax eb' tza'ch yajlil 'a junc ciente, 'ay pax eb' 'a junc cincuenta, 'ay pax eb' cojn junc lajn̈wan̈ 'aj tza'ch yajlil,

²² sec a ewin tzb'onyaj yowl eb' 'anma 'a tzann̈j yorail. Toto mayn̈ej wal yel'chi, a ewin tzb'onyaji, palta toto niwquil junc owl cha, toto 'ixta', tzyi'n cot eb' 'a ojltac. 'Oj colwjoc eb' yiln jun munljel tic et'oc.

²³ Toto tza yiclj a b'on jun tic, tzyaln pax sc'ojl Dios to 'ixta tz'aji, to 'ixta', 'oj techjoc o'oj, an̈jtona eb' 'anma tic, 'oj meltzjoc eb' 'a tzaljc'ojlal 'a yet'ul, xchi Jetro cha.

²⁴ Syiclni Moisés sb'on tas xyal sn̈i cha.

²⁵ Yuj cha, si'n 'elt Moisés ewin caw 'ay snab'en, ewin jeln 'a scal eb' yit israelal. 'Ix ya'n 'och yopiso ewin yil junjn mil 'anma', 'ay eb' 'a jun ciente, 'ay eb' 'a cincuenta, 'ay pax eb' 'a lajn̈wa'an̈.

²⁶ A ewin tzb'on yaj eb' 'anma chi 'a tzann̈j yorail. Ax pax junc owl to niwquil yel'chi, yowlal tzyij 'at eb' 'a Moisés; ax tas may wal yel'chi, a ewin tzb'onyaji.

²⁷ Xlajw cha, xyaln can sb'a win sn̈i Moisés chi 'a 'a, 'ix paxx can win Jetro chi 'a schon̈ab'.