Ex 17 - Chuj San Sebastian Bible

'Ix 'elt a a', 'a sat q'uen q'ue'en

¹ 'Ix 'elt eb' israel 'a lum Sin, c'ojnc'ojnil sb'ey eb' 'icha xyutj Jehová yalni. 'Ix jaw eb' 'a lum Refidim, palta may pax a a ta'.

² 'Ix cotx yowl eb' 'anma chi 'a Moisés, xyaln pax eb' 'ixtic: —A ticnec b'i'an, 'a' cot cal tzcuq'uej, xchi eb'. —¿Tas yuj tzex 'awj 'och 'ayin? ¿Tas yuj tzeyac' prowal Jehová? xchi Moisés chi 'a eb'.

³ Caw wal 'ay stacn̈til eb' chon̈b' cha, yuj cha, tz'awj chan̈ eb' 'a Moisés, tzyaln eb' 'ixtic: —¿Tas yuj on̈ eyij 'elt 'a Egipto? ¿Tom yuj qui cham yuj tacn̈til yet' eb' cunnal yet' pax qui cajb'en noc', yuj cha tzon̈ eyi'n 'elta? xchi eb'.

⁴ Caw 'ix tac sc'ojl Moisés yuj eb', 'ix tew pax 'a Jehová, xyaln 'ixtic: —¿Tas tzwutj eb' 'anma tic? Caw 'ijn tzin sjulq'uenej eb', xchi Moisés.

⁵ 'Ix ta'w Jehová 'ixtc 'a Moisés: —A ticnec, b'ab'ljan̈ yuj eb' 'anma tic, tze'n 'at jaywn̈oc eb' yichm wincal chon̈b' Israel tic et'oc. Tze'n 'at pax te a c'occh 'ix a mac' 'ejm 'a yib'n̈ a a'.

⁶ 'Oj ach in tan̈wc 'a sjolm q'uen tenm 'a lum tzaln Horeb. Ax yic tzach c'ochi, tza ma'n 'och te a c'occh chi 'a sat q'ue'en, ax yel-l a a chi 'a sat q'uen q'uen cha, 'ixta 'oj 'aj yu'n eb' 'anma tic a', xchi Dios. 'Ixta 'ix yutj Moisés sb'on 'a yojltac ewin yichm wincal chon̈b' Israel cha.

⁷ Meriba xya'cn scuch jun lugar cha, yujto ata tu 'ix yal eb' 'anma 'a Moisés. Xya'n pax scuch Masah, yujto xyac' prowal eb' Jehová, yic xyaln eb' 'ixtic: ¿Yel am wali 'ayc' Jehová 'a qui calc tic, mto ma'ay? xchi eb'.

'Ix 'och owl yet' eb' amalecita

⁸ A yic 'ayc' eb' israel 'a lum Refidim, 'ix c'och eb' amalecita yac' owl yet' eb'.

⁹ Yuj cha, xyaln Moisés 'ixtc 'a Josué: —Si'l jaywn̈oc eb' israel yic tz'at eya'nc owl yet' eb' amalecita cha. 'Oj in 'at 'a lum jolm tzaln chi 'a caw sq'uin̈b'il to q'uic'an, 'oj wic' te c'occh tzc'anlb'ej Dios wet'oc, xchi.

¹⁰ Syiclni Josué tas 'ix yal Moisés, 'ix 'at ya'nc owl yet' eb' amalecita cha. Ya' sb'a cha, ax Moisés yet' Aarón, yet' pax Hur, 'ix 'at eb' 'a lum jolm tzaln cha.

¹¹ Ax 'ix 'aji, a yic tzyi'n chan̈ Moisés sc'ab' 'a cha'an̈, caw tzyac' ganar eb' israel chi eb' amalecita cha. A yic tzyi'n 'ejm Moisés sc'ab', ax eb' amalecita chi tz'a'n pax ganar eb' israel cha.

¹² Caw wal tzc'unb' sc'ab' Moisés yi'n cha'an̈, yuj cha, sayn eb' jun q'ue'en, sec ata tz'em wocan. Ax Aarón yet' Hur, a eb' xyamn chan̈ sc'ab' Moisés cha, junjn eb' 'a junjn sc'ab', masnto x'em c'u.

¹³ 'Ixta 'ix yutj Josué ya'n ganar eb' amalecita 'a owal.

¹⁴ Xlajw cha, xyaln Jehová 'ixtc 'a Moisés: —Tz'ib'j can jun tzo'n̈ tic 'a junc u'un̈, sec 'oj naxoc coti. Al 'a Josué chajtlto an 'oj in satl eb' amalecita 'a jun 'ejmn̈ej; man̈x 'a b'a'n̈ 'oj alxoc cot eb', xchi Dios.

¹⁵ 'Ix sb'on Moisés jun yet'l xajmb'al, xya'n 'och sb'i: A Jehová in bandera yaji, xchi.

¹⁶ 'Ix yaln pax Moisés chi 'ixtic: Yujto 'ix yij chan̈ Amalec sc'ab' yic xya'n owl yet' Jehová, yuj cha, a Jehová 'oj ya'n̈j owl yet' Amalec 'a smasnil tiempo, xchi Moisés.