Ex 16 - Chuj San Sebastian Bible

'Ix yac' Dios sc'ux eb' 'anma maná

¹ Xlajw cha, 'ix 'el paxt eb' israel 'a lum Elim, axta 'ix jaw eb' 'a lum cusltac lum yic Sin, lum 'ay 'a snan̈l Elim yet' Sinaí. Nan̈l xo schab'l 'uj yelt eb' 'a Egipto yic xjaw eb' ta'.

² A yic 'ayc' eb' ta', syamn 'och eb' yaln tu paxti 'a Moisés yet' 'a Aarón.

³ Xlaj yalnc eb' 'a 'ixtic: —Comnoc on̈ smilc can Jehová 'a Egipto, 'a 'aj caw wach' qui chinec chib'ej, 'aj caw tzon̈ b'ut'jec wal si'mb'il. Ocxo jun, ax on̈ eyij cot 'a lum cusltac lum tic; 'in a 'a tic 'oj qui chamc yuj wejl qui masnil, xchi eb'.

⁴ Yuj cha, xyaln Jehová 'a Moisés 'ixtic: —'Oj wa' cot tas 'oj sc'ux eb' 'anma tic 'a satcha'an̈. 'A junjn c'u, ax si'n eb' tas 'oj sc'ux cha, palta cojn tas 'ay tz'och yuj eb' 'a jun c'u cha, a chi 'oj sic' eb'. 'Ixta 'oj wutc wilni toto 'oj syiclc eb' in checnb'il mto ma'ay.

⁵ Ax 'a swacl c'u, 'oj si'cn eb' tas 'oj sc'ux 'a jun c'u cha; yet' pax tas 'oj sc'ux 'a junx c'u, tzyal 'el'chi chab' c'ul chi yamn tzsi'cn eb', xchi Dios.

⁶ Xlajw cha, xyaln Moisés yet' Aarón 'ixtc 'a eb' yit israelal eb' cha: —A 'a yic jun yemc'ul tic, 'oj eyojcoc 'eli to a Jehová a ex 'i'n 'elt 'a Egipto.

⁷ A 'a sq'uin̈b'il q'uic'an, ata 'oj eyila' chajtlto 'ay spoder Jehová, yujto xyab'i tas xeyutj paxtinc e b'a 'a 'a, palta an̈ xo tic on̈, toc 'ay quel'ch on̈, yuj cha, xcob' eyaln qui peclal on̈, xchi eb'.

⁸ 'Ix yaln pax Moisés chi 'ixtic: —A 'a yic yemc'ul tic, 'oj yac' Jehová e chi chib'ej, ax 'a sq'uin̈b'il q'uic'an, ax ex ya'n wa'oc. Yujto 'ix yab' eyaln tu paxti 'a 'a, tzcot pax eyowl 'ayn̈ on̈, palta wal yel a 'a Jehová tzcot eyowal, xchi Moisés cha.

⁹ Yajn̈j wal cha, 'ix yaln Moisés 'ixtc 'a Aarón: —Al 'a eb' 'anma tic smasnil, to tznitz 'ochch sb'a eb' 'a yojltac Jehová, yujto 'ix yab'i tas xyutj paxtinc sb'a eb' 'a 'a, xchi Moisés.

¹⁰ Wanto spaxtin Aarón 'a eb' 'anma cha, 'ix 'at q'ueln eb' smasnil 'a lum cusltac lu'um, axta sch'ox sb'a stzictznil Jehová 'a scal jun 'asun.

¹¹ 'Ix yaln Jehová 'a Moisés chi 'ixtic:

¹² —'Ix wab'i tas xyutj paxtinc sb'a eb' 'anma tic 'ayin, yuj cha, al 'a eb': To a 'a yemc'ul tic, 'oj wac' schi eb' chib'ej, ax 'a sq'uin̈b'il q'uic'an, ata 'oj wac' wa eb', masnto 'oj b'ut'joc sc'ojl eb'. 'Ixta 'oj yutc eb' yojcan 'eli, to an tic Jehová in, e Diosal in e masnil, xchi Dios.

¹³ A 'a yic jun yemc'ul cha, 'ix jaw tzicnjoc e no chilti'ich, caw xmacchj 'el stz'ey scamplamento eb' israel chi yuj e no', ax 'a sq'uin̈b'ial 'ix 'em chicb'cha'an̈.

¹⁴ A yic xtacj jun chicb'chan̈ cha, 'ay jun tzo'n̈ tas 'ix can 'a sat lum lum cha, 'icha wal q'uen che'ew, q'uentac yilx 'ochi.

¹⁵ Man̈ yojcoc xon eb' israel jun cha. A yic xyiln eb', 'ix laj yal-lanc eb' 'a 'ixtic: ¿tas laj jun tzo'n̈ tic? xchi eb'. Yuj cha, xyaln Moisés 'ixtc 'a eb': —Atn jun tic tzyac' Jehová e c'uxu'.

¹⁶ A jun checnb'il 'ix yac' Jehová, to tze molb'tzej jantcn̈ej tas 'oj e c'ux 'a junjn c'u, a tzyal jantc e b'isl 'a yol eyatut. 'Ijec chan̈ junjnoc 'uc'b' eyic junjn ex, xchi Moisés chi 'a eb'.

¹⁷ 'Icha xyutj Moisés chi yalni, 'ixta xyutj eb' israel chi smolb'tzan tas tzc'ux cha. 'Ay mach caw niwn smolb'tzej, 'ay pax mach jab' wal yico',

¹⁸ a tzyal yechl 'ix alx 'a eb'. 'Ay pax eb' cob' caw niwn smolo, palta ma'ix yac' sobra yic eb' cha, ax eb' jab' wal yico', may tas xyac' palta 'a eb', colb'il x'e'ch yic eb' chi 'a junjn c'u.

¹⁹ 'Ix yaln pax Moisés 'a eb' 'ixtic: —Man̈ e molcn yic e q'uic'an, xchi.

²⁰ 'Ay eb' ma'ix yiclni tas xyal Moisés cha, smoln to can pax eb' yic junx c'u; a tas smolcn eb' cha, yajn̈ej 'ix 'och yayil, 'ix 'aj sjab'. Yuj cha, 'ix cot yowl Moisés 'a eb' ma'ix yiclni cha.

²¹ Junjn sq'uin̈b'ial, tzmolb'tzan eb' tas tzc'ux 'a junjn c'u, ax sc'a'l yoc c'u, a tz'a'n 'ulb'xoc jantc to tzcan yuj eb' 'a sat lu'um.

²² Ax 'a yic swacl c'u, junjn to 'echtab' sobrail tzyij can junjn 'anma', yuj cha, cha'chb' 'echtab' yic junjn eb'. Ax eb' 'aych yajlil 'a scal eb' 'anma cha, x'at yalnc eb' jun tic 'a Moisés.

²³ 'Ix yaln Moisés 'ixtc 'a eb': —A jun cha, a Jehová 'ix alni, yujto q'uic'an sc'ul 'iljelal, a jun sc'ul 'iljelal cha, sc'ul yic tz'ijx chan̈ sb'i Jehová. A tas tze c'ux q'uic'an, tz'an̈c can ticnec, mto tzeya'cn xejc tas yic e q'ui'n cha, tze moln cani, sec wach' toxn̈ej 'oj e c'ux q'uic'an, xchi 'a eb'.

²⁴ Syiclni eb' 'anma smasnil tas xyal Moisés cha, smoln can eb' tas tzc'ux yic sq'uic'an. Ma'ix 'aj sjab', ma'ix 'och pax yayil.

²⁵ Ax 'a junx c'u, 'ix yaln Moisés 'ixtc 'a eb': —Wan̈ec ticnec, yujto sc'ul 'iljelal, 'ijec chan̈ sb'i Jehová. A 'a jun c'u tic, may xon jac tas 'oj 'ilchjoc eyuj 'a spatc 'el camplamento tic.

²⁶ Cojn waque c'u tztac' e moln tas tze c'uxu, ax 'a yucl c'ual, man̈x 'a tas tzjawi, yujto sc'ul 'iljelal, xchi Moisés.

²⁷ 'Ay cob' eb' x'el say jacx yic 'a yucl c'ul cha, palta may xon tas x'ilchj yuj eb'.

²⁸ Yuj cha, xyaln Jehová 'a Moisés 'ixtic: —Yel xo wal matz eyiclj in checnb'il yet' in ley. ¿B'a'n̈ wal 'oj eyoch wan eya'n tenmtacl 'ayin?

²⁹ Nac wal si'mb'il, chajtlto an Jehová in, an tzwala, to yowlal tzeyiclj sc'ul 'iljelal. A 'a yic swacl c'ual, ata tze molcn tas tze c'ux 'a yucl c'ual, sec ax 'a yucl c'u cha, 'ayx 'ec'n̈ej 'a yol eyet'ul, may mach tz'elt munljoc, xchi Dios.

³⁰ 'Ix 'ilj eb' 'anma chi 'a yucl c'ul cha.

³¹ A eb' israel cha, maná 'ix yac' eb' sb'ic jun tzo'n̈ 'ix sic' sc'ux cha. Sac yilxi, lajn yilx 'icha sat te culantro, caw chi swax 'icha 'ixm c'oxox pan 'aych yal chab' 'a 'a.

³² Xlajw cha, xyaln Moisés 'ixtc 'a eb' israel cha: —'Ix yal Jehová 'ayn 'ixtic: Molc can junc 'echtab' e maná, sec 'oj yil eb' eyin̈tl b'aq'uin̈, yic wach' 'oj yil eb' tas 'ix 'ajx e c'ux 'a cusltac lum tic, yic ex wi'n 'elt 'a Egipto, xchi Dios 'ayin, xchi Moisés.

³³ 'Ix yaln Moisés chi 'ixtc 'a Aarón: —'Ij cot junc chen, tza'n 'ejm junc 'echtab' maná 'a yojol, 'icha 'ix yutj Jehová yalni. Tz'at a molcn 'och 'a yojltac Jehová, sec 'oj yil eb' quin̈tlec chi b'aq'uin̈, xchi.

³⁴ 'Icha wal xyutj Jehová yaln 'a Moisés, 'ixta xyutj Aarón smoln can jun chen 'a stz'ey te scaxail strato Dios.

³⁵ A eb' israel cha, chawinc ab'il sc'ux eb' maná, masnto 'ix jaw eb' 'a smon̈jonal lum Canaán.

³⁶ (A jun 'echtab' cha, gomer sb'i, 'aym nan̈loc yoxl litro a tz'ejm 'a yojol.)