Ex 15 - Chuj San Sebastian Bible

A sb'it Moisés

¹ Xlajw cha, 'ix sb'itnan Moisés jun b'it yet' smasnil eb' israel 'a yojltac Jehová, xyaln eb' 'ixtic: Caw wal tzon̈ b'itnec 'a Jehová yic tzqui'nec chan̈ sb'i, yujto caw wal satjub'tac 'ix yutj ya'n ganar owal. 'Ix mucchj can 'ejm no chej 'a yojl a mar yet' ewin 'et'jnac e no'.

² A jun b'it tic a 'a Jehová tzcalec, yujto a qui Colmalec yaji, 'a 'aych quipoc. 'Ijx cab' chan̈ sb'i qui Diosalec, alx cab' wach' paxti 'a 'a, atn sDiosal eb' qui mam quichmec.

³ A Jehová caw jeln 'a owal; Jehová ton wal sb'i.

⁴ A scaruaje win sreyl Egipto, eb' soldado yet' eb' 'aych yajlil yet' winac, 'ix mucchjcan 'ejm eb' yet' jun tzo'n̈ chi 'a yojl a Chac Mar yuj Jehová. A eb' capitan̈ niwn yel'ch yet' yopiso, 'ix 'atcn eb' 'a yojl a mar cha.

⁵ 'Icha wal q'uen q'ue'en, 'ixta x'aj eb' s'atcn 'a yich a'; 'ix mucchj can 'ejm eb' yuj a mar cha.

⁶ Mamin Jehová, caw wal 'ay a poder, 'ix a satl eb' 'ajc'ojl cha.

⁷ Yet' wal a niwquil poder 'ix a'n 'ejm eb' tznib'j tzyac' owl et'oc. A wal yic tzcot owal, 'icha wal stz'a 'ejm te 'ac, 'ixta wal tz'aj slajw 'ejm eb' o'oj.

⁸ 'Ix otz'j 'at ec' 'a yib'n̈ a a', yajn̈j wal cha spojn sb'a a'. 'Icha muro 'ixta 'ix 'ajcn a 'a sti b'e, 'ix 'ochcn yip a'.

⁹ 'Ix yaln eb' 'ajc'ojl chi 'ixtic: 'Oj cochc tza'n yuj eb' israel cha, masnto 'oj yamchjoc eb' cujec. 'Oj qui'c 'ec' smasnil tas 'ay 'a eb', ax qui pojnec 'eq'ui. 'Oj qui'cq'uet qui espada 'a yol yatut, ax qui tzu'nec cham can eb'. 'Ixta to b'i'an, ax sb'o wal qui c'ojlec, xchi eb'.

¹⁰ A yic 'ix otz'n 'at ec' 'a yib'n̈ a mar, 'ix mucchj can 'ejm eb' 'ajc'ojl chi yuj a'; 'icha q'uen plomo, 'ixta 'ix 'aj eb' s'atcn 'a yich a'.

¹¹ Mamin Jehová, may junc xo dios tztac' slajb'tzan sb'a et'oc, may junc xo mach caw wach' 'icha ach tic, may junc xo mach tztac' sch'oxn milagro 'icha tas satjub'tac tza b'o'o.

¹² 'Ix a'n cot yowl a c'ojl 'a yib'n̈ eb' 'anma yet' a poder, ax lum lum 'ix b'u'n 'ejm eb'.

¹³ Yuj a niwn chamc'ojlal, tzon̈ e'n b'ey an̈ a chon̈b' on̈ tic, on̈ a coln 'elt yet' a poder, yic tzon̈ e'n 'at 'a lum lum to sic'b'il 'el o'oj yic tzach 'aj cajn ta'.

¹⁴ A yic 'oj yab'nc jun tzo'n̈ xo nacion̈ jun tic, caw 'oj 'ib'xoc eb' yuj xiwlal, 'oj xiw chan̈ pax eb' filisteo.

¹⁵ A eb' syajlil eb' 'aj Edom, toxn̈ej 'oj sat sc'ojl eb'. Ax eb' syajlil eb' 'aj Moab, 'oj laj 'ib'xoc eb' yuj xiwlal cha. 'Ixta pax eb' cananeo, 'oj laj sc'ub'c 'el sb'a eb'.

¹⁶ Mamin Jehová, xiw cab' chan̈ eb' yajl cha, sicb'oc cab' can 'el eb'. 'Icha cab' q'uen tz'ajcn eb' yuj a poder, masnto 'oj que'cn an̈ colb'iln̈ 'el 'oj tic.

¹⁷ 'Ij on̈ 'at 'a lum jolmctac witz to ecn̈ej yaji, jun lugar to ach si'jnac can 'eli yic tzach 'aj cajn ta.

¹⁸ ¡Mamin Jehová reych 'a smasnil tiempo! xchi Moisés 'a sb'it yet' eb' yit chon̈b' cha.

A sb'it María

¹⁹ A yic x'e't scaruaje win sreyl Egipto yet' jun tzo'n̈ xo eb' 'et'jnac no chej 'a yojl a mar, 'ix schan sb'a a 'a yib'n̈ eb' yuj Jehová. Ax pax eb' israel, caw wach' 'ix 'aj ye't eb' 'a stacn̈il lum lum 'a yojl a mar cha.

²⁰ A 'ix María schecb' Dios yanb' Aarón, xyij chan̈ spandereta, sjucb'tzan eb' yit 'ixl cha yic tzyucn eb' spandereta, xlaj b'atj chan̈ eb' yuj stzaljc'ojlal.

²¹ 'Ix b'itn 'ix 'a yojltac eb' 'ix 'ixtic: B'itncoyec, qui'c chan̈ sb'i Jehová, yujto caw satjub'tac yilx xyutj ya'n ganar owal. 'Ix mucchj can 'ejm no chej 'a yol a', yet' smasnil eb' 'anma 'ay q'ue 'a yib'n̈ no', xchi María 'a sb'it.

A jun a a caw c'a

²² Xlajw cha, xyi'n 'elt Moisés eb' israel chi 'a sti a Chac Mar, 'ix cot eb' 'a lum cusltac lum yic Shur. 'Oxe c'u xb'ey eb', may xon 'aj 'ix 'ilchj jac a a yuj eb'.

²³ 'Ix jaw eb' 'a lum lum 'aj 'ay cob' a a', palta ma'ix stac' yu'n eb', yujto caw wal c'a a'; yuj cha, Mara 'ix ya'cn eb' scuch jun lugar cha.

²⁴ 'Ix syamn 'och eb' 'anma chi yaln tu paxti 'a Moisés, 'ix laj sc'anb'lan eb' 'ixtc 'a 'a: ¿Tas 'oj cu'c ticnec? xchi eb'.

²⁵ Xlajw cha, 'ix sc'ann Moisés scolwal Jehová; 'ix sch'oxn Dios jun te te', xya'n 'ejm Moisés chi te 'a yojl a a cha, 'ix b'o a yuj te'. Ata 'ix yac' Jehová jun schecnb'il 'a eb', yic tzya'lni prowal eb' toto tzyiclj eb' schecnb'il.

²⁶ 'Ix yaln Jehová 'a eb' 'ixtic: Toto tzeyiclj tas 'oj wal an Jehová e Diosal in tic, ax eyiclni tas 'oj yal in checnb'il yet' smasnil in ley, toto 'ixta', ma'oj wa' cot yab'il 'a eyib'an̈, 'icha 'ix wutj wa'n cot 'a yib'n̈ eb' 'aj Egipto, yujto an Jehová in tic, an 'oj ex wan̈toc, xchi 'a Moisés.

²⁷ Xlajw cha, 'ix cotx eb', 'ix jaw eb' 'a lum Elim, ata 'ay lajchwe spac'b'a' yet' 70 te palma. Sb'on eb' smantiado 'a sti eb' a a cha.