Ex 13 - Chuj San Sebastian Bible

¹ 'Ix yaln pax Jehová 'a Moisés 'ixtic:

² A eb' b'ab'l winc 'unn tz'alj 'a e cal, pojc 'el eb', yujto wic tz'ajcn eb'. An̈jtona no cajb'en noc', a sb'ab'l 'une e no', wic yaj no', xchi.

³ 'Ix yaln Moisés 'a smasnil eb' yit chon̈b' chi 'ixtic: Yowlal 'oj qui nac cot jun q'uin̈ tic 'a junjn ab'il yujto on̈ yijec 'elt Jehová yet' spoder 'a Egipto, 'a 'ajtil on̈ 'e'c mosoal. Yuj cha, ma'oj qui wac 'ixm pan 'ay yich.

⁴ A jun 'uj 'aj on̈ 'eltec 'a Egipto tic, Abib sb'i.

⁵ Atn 'a jun 'uj tic, 'aj tzqui nac cot jun q'uin̈ tic, yic tox on̈ c'ochc yuj Jehová 'a lum lum caw 'ay syaxil, lum 'ajtil cajn eb' cananeo, eb' hitita, eb' amorreo, eb' heveo, yet' eb' jebuseo. Atn lum yaljnac can Jehová 'a eb' qui mam quichmec, to a 'ayn̈ec tzyac' jun lum cha.

⁶ Uque c'u 'oj qui wac 'ixm pan may yich, ax 'a yucl c'u cha, tzon̈ 'ochc 'emmquilal 'a Jehová, yic tzqui'nec chan̈ sb'i.

⁷ A 'a yic uque c'u cha, may xon 'ixm pan 'ay yich 'oj qui wa'ec, may xon pax yich pan 'ayc' 'a catutec, may pax yich pan 'oj 'ilchjoc 'a 'aj 'oj qui c'ochc cha.

⁸ A 'a jun tiempoal cha, 'oj calc 'a eb' cunnal 'ixtic: A jun q'uin̈ tzqui nac cot tic, snanb'il cot tas 'ix yutj Jehová sch'oxn swach'c'ojlal 'ayon̈, yic on̈ yi'n 'elt 'a Egipto, 'oj qui chic 'a eb'.

⁹ 'Icha wal yopiso no tz'um 'aych 'a qui c'ab' yet' 'a snan̈l qui sat, 'ixta yopiso jun q'uin̈ tic yic tzqui nan coti. Yuj cha, to 'oj calb'tan̈c sley Jehová, ax qui yiclniec paxi, yujto a on̈ 'i'nec 'elt 'a Egipto yet' spoder.

¹⁰ 'A junjn ab'il ax qui nanec cot jun q'uin̈ tic; atn 'a jun 'uj ch'oxb'il can tic.

Tzpojx 'el eb' b'ab'l winc 'unin

¹¹ A yic 'oj qui c'ochc yuj Jehová 'a lum slum eb' cananeo, lum 'aj ya'jnac can sti 'a eb' qui mam quichmec, to a 'ayn̈ec tzyac' lu'um,

¹² a yic cha, 'oj qui pojc 'el eb' qui b'ab'l winc 'unin, yet' no sb'ab'l 'une no qui cajb'en noc', atn no smam, yujto yic Jehová yaj eb'.

¹³ Palta ax no sb'ab'l 'une no 'axna, toto smam no', a junc no calnelu, mto junc no chiwo tzca'c sjelc no', toto matz ca'c no calnelu cha, tzqui c'uychtejec 'el sjaj no yune b'uru cha. 'Ixta pax yuj qui b'ab'l winc 'unin, yowlal tz'ajx junc no calnelu sjelc eb'.

¹⁴ A yic 'oj sc'anb'noc eb' cunnalec 'ayn̈ b'aq'uin̈: ¿Tas tzyal 'el'ch jun tic? toto xchi eb', tzcalnec 'ixtc 'a eb': Sch'oxnb'il yic on̈ yi'n 'elt Jehová yet' spoder 'a yol yic Egipto, 'a 'ajtil 'e'nc on̈ mosoal.

¹⁵ Yujto a yic 'ix pitb' 'el snab'en win rey, ma'ix yal sc'ojl win on̈ ya'c 'elta, ax Jehová a 'ix miln cham sb'ab'l 'unnal eb' 'aj Egipto, yet' sb'ab'l 'une no scajb'en noc' eb'. Yuj cha, a no sb'ab'l 'une no qui cajb'en noc', tzqui milc cham no xajmb'al-l 'a Jehová. Tzca'n pax junc no sjelc eb' qui b'ab'l winc 'unin.

¹⁶ Yuj cha, 'icha yopiso no tz'um 'aych 'a qui c'ab' yet' 'a snan̈l qui sat, 'ixta yopiso jun ley tic. A tz'a'n qui na coti, yic on̈ yi'n 'elt Jehová yet' spoder 'a yol yic Egipto, xqui chic 'a eb', xchi Moisés.

A jun topn̈ 'asun yet' jun topn̈ c'ac'

¹⁷ A yic 'ix 'ajx 'elt chon̈b' Israel yuj win rey 'a yol yic Egipto, ma'ix yal sc'ojl Dios to xyij 'at eb' 'a jun b'e tz'ec' 'a yic ewin filisteo. Wach'xam tojl jun b'e cha, palta 'ix sna Dios, lemb'il tzyac' eb' filisteo chi owl yet' eb' israel cha, toq'ue tzmeltzj eb' 'a Egipto, yic 'oj yilnc eb' to 'ay owal.

¹⁸ Yuj cha, 'ix 'ec' oyyoc eb' yuj Dios 'a lum cusltac lu'um, yet' 'a sti a Chac Mar. A yic 'ix 'elt eb' israel 'a yol yic Egipto, yet' eb' syamc'ab' yic owal, 'icha yic eb' soldado.

¹⁹ 'Ix yaln Moisés 'a eb' to tzyij 'at eb' sniwnal win José, yujto yaljnac can win 'a eb' smam yichm eb', to tzya'cn eb' sti 'a winac chajtlto 'oj sb'o eb' 'icha tznib'j win cha. Yaljnac can win 'a eb' 'ixtic: Wal yel a Dios 'oj colwjoc eyet'oc. A yic 'oj ex yi'nc 'el 'a tic, yowlal tzeyij 'at in niwnal tic eyet'oc, xchi can José chi 'a eb'.

²⁰ 'Ix 'el paxt eb' israel 'a Sucot, 'ix jaw eb' 'a Etam axta x'ochx wan eb', 'a 'aj tz'el yich lum cusltac lu'um.

²¹ A 'a c'ual, b'ab'l Jehová yuj eb' 'a scal jun topn̈ 'asun, a tzch'oxn b'e 'a eb'. Ax 'a 'ac'wal, a 'a scal jun topn̈ c'ac' ata 'aychi. A tz'a'n sacq'uinl 'a eb' 'anma cha, sec wach' sb'ey eb' 'a c'ual mto 'a 'ac'wal.

²² A jun topn̈ 'asn cha, b'ab'ln̈ej s'at 'a yojltac eb' 'a c'ual, ax jun topn̈ c'ac' cha, a 'ix 'i'n b'ey eb' 'a 'ac'wal, may xon 'ajtil 'ix 'el 'a stz'ey eb' israel cha.