Ex 11 - Chuj San Sebastian Bible

Yaljnac Jehová*r* yuj schamlil eb' b'ab'l 'unin

¹ Yaljnacx can pax Jehová 'ixtc 'a Moisés: —Tot 'oj wac' junc xo yailal 'a yib'n̈ win rey yet' 'a yib'n̈ smasnil eb' 'anma 'a Egipto tic. 'Oj lajwc xoj cha, man̈ ton̈joc 'oj ex yac' 'elt winac, palta to caw wal 'oj e pechx 'elt yuj win 'a jun 'ejmn̈ej.

² Yuj cha, al 'a smasnil eb' et israelal tic, eb' winac yet' eb' 'ix 'ix, to tzc'an eb' oro yet' plata 'a eb' 'aj Egipto cajn 'a stz'ey, xchi Dios.

³ 'Ix ya'n Jehová nachjoc 'el yuj eb' 'aj Egipto, to wach' tzyutj eb' snab'en 'a eb' israel. 'Ixta pax ewin 'aych yajlil yet' win rey cha, 'ix yal eb' to caw wal niwn yel'ch Moisés 'a sat eb', 'ichn̈jta yaln smasnil 'anma 'a Egipto cha.

⁴ A yic mantzac 'elt Moisés 'a yojltac win rey cha, 'ix yaln can 'a win 'ixtic: —'Ixtc wal xyutj Jehová yalni: A yic 'oj 'och chim'ac'wal, ax wec' 'a smasnil yol yic Egipto.

⁵ 'Oj 'ec' in mil cham eb' b'ab'l winc 'unn 'a junjn n̈al eb' et chon̈ab', yet' win a b'ab'l 'unnal to jab'xoj yochx can a jelc 'a a despacho. 'Oj cham pax eb' sb'ab'l 'une eb' 'ix a'mal servil tzmunlj 'a q'uen cha'. 'Oj cham pax smasnil sb'ab'l 'une no 'e cajb'en noc'.

⁶ Man̈x yalnb'ilc 'o'l 'oj 'och 'a smasnil yol yic Egipto tic. May xon 'aj 'ix uj jun tic jun 'ejmoc 'a yaln̈taxi, man̈x pax b'a'n̈ 'oj ujc jun 'ejmoc xo.

⁷ 'Ixta to b'ia'n, ax eyojcan 'eli to an Jehová in, to chuc yel eb' israel tic 'a in sat 'a eyib'n̈ ax 'aj Egipto ex tic, to caw xajn eb' israel tic wu'uj, man̈x 'a tas 'oj 'i'nc eb', yet' pax scajb'en noc' eb', xchi Dios.

⁸ A yic cha, 'oj cob' to jawc jun tzo'n̈ eb' winc 'aych yajlil et' tic 'ayin, 'oj 'em cumn eb', ax yaln eb' 'ayn 'ixtic: 'Ixc yet' smasnil eb' chon̈b' tza'n 'och oj cha, 'oj schic eb'. A yic tox x'el'ch jun tzo'n̈ tic, ax qui 'at on̈, xchi Moisés. Caw wal ow Moisés yic 'ix 'el paxt 'a yojltac win rey cha.

⁹ Atn jun tzo'n̈ tic 'ix yal Jehová 'a Moisés yic yaln 'ixtic: —Ma'oj scha win rey yab' tas 'oj eyala', yuj cha, til wal tas satjub'tac yilx 'oj in ch'ox 'a Egipto tic, xchi.

¹⁰ A Moisés yet' Aarón 'ix laj sb'o eb' smasnil tas 'ix alx 'a 'a, atn tas satjub'tac yilx sch'ox eb' 'a yojltac win rey cha. Palta 'ix ya'x Jehová pitb'oc 'el snab'en winac, ma'ix schaj 'elt win eb' israel 'a yol yic Egipto chi muc'uc.