Ex 10 - Chuj San Sebastian Bible

Yailal yuj no c'ulub'

¹ 'Ix yaln pax Jehová 'a Moisés 'ixtic: —'At 'ilt pax win rey cha, an 'ix wa'x pitb'oc 'el snab'en win yet' eb' 'aych yajlil chi yet'oc, sec tzyil eb' jun tzo'n̈ milagro satjub'tac yilx tzin ch'oxo.

² 'Oj eyal cot yab' eb' eyunnal yet' eb' eyiechicn jun tzo'n̈ tic, yujto an tzwac' jawc smasnil jun tzo'n̈ tic 'a yib'n̈ Egipto tic, atn tas to satjub'tac yilx tzin b'o'o. 'Ixta tzeyutj eyojcan 'eli, chajtlto an ton Jehová in, xchi Dios.

³ Xlajw cha, 'ix 'atx Moisés yet' Aarón 'at yil win rey chi jun 'ejm xo, 'ix yaln pax eb' 'a win 'ixtic: —A Jehová qui Diosal an̈ israel on̈ tic on̈, a tzaln 'ixtc 'ayach: ¿Jantcto wal tiempo 'oj ac' pitb'oc a b'a, yic matz ej 'ejm a b'a 'ayin? 'A'l eb' in chon̈b' tic 'a libre, yic tz'at ya'nc eb' 'emmquilal 'ayin.

⁴ Toto mantzac a chaj 'at eb' in chon̈b' tic, q'uic'an ax wa'n jawc no c'ulb' 'a eb'n̈ yet' a nacion̈ tic.

⁵ 'Oj b'ut'joc 'el smasnil sat lum lum tic yuj no', man̈x 'a jac lum 'oj checljoc. Ax swach' c'uxn 'ejm no jantcn̈ej tas ma'ix lajw yuj q'uen sacb'at, smasnil te te tzyac' sat, 'oj sc'ux no te smasnil.

⁶ 'Oj b'ut'joc 'el yojl a despacho yuj no', 'oj 'och no 'a yol yatut eb' 'aych yajlil et'oc, yet' 'a yol yet'l smasnil eb' 'anma 'a jun nacion̈ tic. A eb' e mam yet' eb' e mam eyicham, may xon 'aj yiljnac eb' jun wan yuj tic, xchi Moisés. A yic xlajw yaln Moisés jun tzo'n̈ tic, 'ix 'el paxt 'a yol sdespacho win rey cha.

⁷ 'Ix yaln ewin 'aych yajlil yet' win rey chi 'ixtic: —¿B'a'n̈ wal 'oj yactc jun winc tic on̈ yixtnec? ¿Tas yuj matz a chaj 'at jun tzo'n̈ 'anma chi 'at yac' 'emmquilal 'a Jehová sDiosal cha? ¿Tom matz a na jab'oc, to wan slajw 'ejm qui nacion̈ec tic? xchi eb'.

⁸ Yuj cha, 'ix yawtn paxt win rey chi Moisés yet' Aarón, 'ix yaln win 'a eb' 'ixtic: —'Ixquec, 'at 'a'c 'emmquilal 'a Jehová e Diosal cha, palta tzeyalcn 'ayin, machtc ex 'oj e 'at cha, xchi win rey cha.

⁹ 'Ix ta'w Moisés, xyaln 'ixtic: —Qui masnil 'oj qui 'at on̈. 'Oj 'at eb' 'unn q'uet on̈, eb' 'ichmtac winac, eb' cunnal on̈, eb' 'ix quisl on̈; yet' smasnil qui calnelu, qui wacax, qui chiwo. Smasnil qui cajb'en noc' on̈, 'oj 'at no quet' on̈, yujto caw wal niwquil q'uin̈ 'oj qui b'o ta 'on̈, yic tzqui'n chan̈ sb'i Jehová qui Diosal chi 'on̈, xchi Moisés.

¹⁰ Yuj cha, xyaln win rey chi 'ixtic: —Wach'xam 'aych Jehová e Diosal chi eyet'oc, palta toxn to ma'oj ex in chaj 'at yet' eyistzil yet' eb' eyunnal cha. 'In to chuc tas wan e nani.

¹¹ Cojn ax winc ex tic tzex 'at eyac' 'emmquilal 'a Jehová e Diosal cha, 'in a jun chi tze c'an 'ayin, xchi winac. Xlajw xoj yaln win jun tzo'n̈ cha, 'ix ya'n win pechxoc 'elt Moisés yet' Aarón 'a yojltac.

¹² Palta 'ix yaln pax Jehová 'ixtc 'a Moisés cha: —'A't a c'ab' 'a yib'n̈ lum Egipto tic, sec 'oj jawc no c'ulub', ax wul swach' c'uxnc no smasnil tas 'ix can yuj q'uen sacb'at, xchi.

¹³ 'Ix ya'n 'at Moisés te sc'occh chi 'a yib'n̈ Egipto cha. Ax Jehová 'ix 'a'n cot jun niwquil 'ic' 'a yib'n̈ smasnil yol yic Egipto, 'ix cot jun 'ic' chi 'a stojlal 'aj tzq'uel c'u; jun c'u jun 'ac'wl 'ix yac' jun niwquil 'ic' cha. Ax yic sacb' 'el 'a junx c'u cha, man̈x yalnb'ilc no c'ulb' xyij cot jun 'ic' cha.

¹⁴ Smasnil yol yic Egipto 'ix b'ut'j 'el yuj no'. Mant xon 'aj 'ix uj jun 'ejmoc jun tic 'a yictax yalan̈, man̈x 'a pax 'aj 'oj yac' jun 'ejmocx 'icha jun tic.

¹⁵ Caw wal 'ix macchj 'el sat lum lum yuj no', man̈x 'a jac lum chequel. A jancto tas 'ix can yuj q'uen sacb'at cha, c'uxn 'ix lajw yuj no', man̈x 'a 'awb'en xcan yuj no'. Man̈x 'a jac 'ix can 'a sc'ab'te', 'ixta pax 'a jolmctac te', c'uxn 'ix lajw smasnil, cojxn̈ej te spenc 'ix cani.

¹⁶ Yuj cha, wal 'a yajn̈ej xya'n win rey chi 'ijxoc cot Moisés yet' Aarón, 'ix yaln win 'ixtc 'a eb': —Caw 'ix 'och qui tenmtacl 'a Jehová e Diosal yet' pax 'ayex.

¹⁷ Tzin tew wal 'ayx ticnec, comnoc tzeyac' wal niwnc'ojlal 'ayn yuj in tenmtacl 'ix 'och 'ayx tic. Cojxn jun 'ejm tic 'ixta xwutej. Leslwan̈c 'a Jehová e Diosal cha, sec tzyij 'el jun yailal to yic chaml yaj 'a jun in nacion̈ tic, xchi winac.

¹⁸ Cojxn̈ej wal yic x'el paxt Moisés 'a yol sdespacho win rey cha, 'ix leslwi 'a Jehová.

¹⁹ Xlajw xoj cha, 'ix ya'n cot Jehová jun niwquil 'ic' 'a stojlal 'aj tz'em c'u, ax 'a yol a Chac Mar, ata 'ix 'atcn no c'ulb' chi yu'uj. Man̈x 'a junc no 'ix can 'a yol yic Egipto cha.

²⁰ Palta 'ix ya'n Jehová pitb'oc pax 'el snab'en win rey chi jun 'ejm xo, yuj cha, ma'ix 'ajx 'elt eb' israel chi yu'uj.

'Ochnc q'uic'q'uinl 'a yol yic Egipto

²¹ 'Ix yaln pax Jehová 'ixtc 'a Moisés: —A ticnec, 'ij chan̈ a c'ab' 'a satcha'an̈, sec 'oj 'och q'uic'q'uinl 'a yol yic Egipto tic, xchi.

²² 'Ix yi'n chan̈ Moisés sc'ab' 'a satcha'an̈. Yuj cha, 'ix jaw jun niwquil q'uic'q'uinl 'a yol yic Egipto smasnil.

²³ 'Oxe c'u x'och q'uic'q'uinl cha, man̈xtzac stac' yil-lan 'och sb'a eb' 'anma yet' eb' 'ayc' 'a stz'ey, man̈xtzac stac' sb'eyc' eb'. Ax 'a yol yic Gosén, caw wal 'ay sacq'uinal, atn 'a 'aj cajn eb' israel cha.

²⁴ Yuj cha, 'ix ya'n win rey chi 'awtxoc cot Moisés, 'ix yaln win 'ixtc 'a eb': —Tztac' tzex 'at eyac' 'emmquilal 'a Jehová, 'ijec 'at eyistzil yet' eyunnal; cojn b'i'an, tzeyactj can e calnelu, e wacax yet' e chiwo, xchi.

²⁵ 'Ix yaln pax Moisés 'ixtc 'a winac: —Yowlal tzon̈ a chaj 'at yet' qui cajb'en noc', yujto a no 'oj cac' qui xajmb'alc 'a Jehová qui Diosal on̈.

²⁶ Yuj cha, a smasnil no qui cajb'en noc' chi 'on̈, 'oj quic' no smasnil quet' on̈. Man̈x 'a junc no 'oj stac' scani, yujto a 'a scal no 'oj qui sic' 'elt no 'oj ca' qui xajmb'alc 'a Jehová qui Diosal on̈. Yic mantzac on̈ c'och 'a jun lugar cha, mantzac nachj 'el cu'uj, 'aj 'ay no 'oj cac' qui xajmb'alc 'a Jehová qui Diosal chi 'on̈, xchi.

²⁷ Palta an̈j 'ijnoc 'ix yac' Jehová pitb'oc 'el snab'en win rey chi jun 'ejm xo, yic matz chaj 'el win eb' israel cha.

²⁸ Yuj cha, 'ix yaln pax win rey chi 'ixtc 'a Moisés: —'Eln̈ 'a in tz'ey tic. Man̈x b'a'n̈ tzin nib'j tzach wil jun 'ejm xo 'a tic. Toto tzach jaw jun 'ejmoc xo, a 'a yic xon jun c'u cha, tzach cham 'a tic, xchi win rey cha.

²⁹ 'Ix ta'w pax Moisés 'ixtc 'a winac: —Caw wal yel ton tzal b'i'an, man̈x ton b'a'n̈ 'oj ach wila', xchi Moisés.