Ex 1 - Chuj San Sebastian Bible

'Ixtxnac eb' israel 'a Egipto

¹ Atn sb'i eb' yunnal win Israel tic, eb' ajun yet' winac yic xc'och 'a Egipto, 'ay pax yunnal junjn eb'.

² Atn ewin tic: Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad yet' Aser.

⁵ 'Ay 70 sb'isl smasnil eb' yin̈tl Jacob ajun yet'oc yic xc'och 'a Egipto, al pax win José, 'ayc' xon win ta'.

⁶ A win José cha, yet' pax smasnil eb' yu'tac, yet' smasnil eb' ajun yet' win Jacob yic xc'och 'a Egipto cha, c'ojnc'ojnil 'ix cham eb' smasnil.

⁷ Palta til wal yunnal eb' x'alj cani. Yuj cha, 'ix niwtj sb'isl eb' israel cha, yel xo wal 'ay smay eb', 'ix b'ut'j 'el smasnil yol yic Egipto chi yuj eb'.

⁸ 'Ix 'ec' jun tiempoal yuj eb' ta', ax x'aji 'ix 'och junx win rey 'a Egipto cha, man̈x 'ojcab'ilc José yuj winac.

⁹ Yuj cha, 'ix yaln win rey chi 'a smasnil eb' schon̈b' chi 'ixtic: Tzeyil am ticnec, chajtlto a eb' israel tic, caw 'ec'b'alx sb'isl eb' 'ayn̈ec, yel xo pax caw 'ay yip eb' 'a quib'n̈ec.

¹⁰ Yuj cha, a ticnec, yowlal tzqui na'ec tas tz'aj eb', sec ma'oj 'ec' sb'isl eb' 'ayn̈ec, toq'ue 'ay b'a'n̈ 'ay junc owl tzjaw 'a qui calec, ax am tz'aji tzya'ch sb'a eb' yet' ewin 'ajc'ojl cha, tzya'n eb' owl quet'ec, ax yel am ewin 'a qui chon̈b'ec tic, xchi win rey cha.

¹¹ Yuj cha, 'ix 'ajx 'och yilmal eb', x'ajx 'och eb' 'a munljel caw ya. 'Ix 'ajx sb'o eb' chab' niwc chon̈ab', atn Pitón yet' Ramesés. A 'a chab' chon̈b' cha, ata tzyac' win rey molxoc 'ixm trigo.

¹² Caw wal tz'ixtx eb' israel chi yuj ewin 'aj Egipto cha, palta yel xo wal xq'uib' pax sb'isl eb'. Yuj cha, caw tzxiw pax eb' 'aj Egipto chi 'a eb'.

¹³ 'Ix 'och eb' israel 'a munljel caw wal ya yuj eb' 'aj Egipto cha.

¹⁴ Yel xo wal ya tz'ec' eb' smunlji, a eb' tzb'ow xamit, tzb'ow pax n̈a eb'. Man̈ cojnoc cha, palta a eb' tz'a'w pax 'och trigo, tzb'on eb' jun tzo'n̈ xo munljel. Caw wal 'oltac tz'ec' eb'.

¹⁵ 'Ay wal junx 'ix 'aj eb' israel chi yuj win rey. 'Ix yal win 'ixtc 'a eb' 'ix wetz'wjum, atn 'ix Sifra yet' 'ix Fúa, eb' 'ix si'm 'unn yaj 'a scal eb' 'ix israel cha:

¹⁶ —A yic tzeyiln yalj yune eb' 'ix israel cha, cojn yic tz'alj junc 'unn chi muc'uc, tze sayn eyila'; toto 'ix 'unin, q'uib' cab'i', palta toto winc 'unin, tze mil chamoc, xchi win rey cha.

¹⁷ Palta ax eb' 'ix wetz'wjum cha, caw wal 'ay xiwc'ojlal eb' 'ix 'a Dios, yuj cha, ma'ix syiclj eb' 'ix 'icha xyutj win sreyl Egipto chi yalni, ton̈j tzyil eb' yic tz'alj eb' winc 'unn cha.

¹⁸ A yic 'ix yab'n win rey jun cha, 'ix ya'n win 'awtxoc cot eb' 'ix wetz'wjum cha, 'ix yaln win 'ixtc 'a eb' 'ix: —¿Tas yuj ton̈j tzeyila tz'alj jun tzo'n̈ winc 'unn cha? xchi winac. 'Ix yaln eb' 'ix 'a win 'ixtic:

¹⁹ Yujto man̈ lajnoc eb' 'ix israel chi quet' an̈ 'aj Egipto on̈ tic; caw 'ay yip sniwnal eb' 'ix, mantzac on̈ c'och on̈, tz'alj yune eb' 'ix, xchi eb' 'ix.

^20-21 Yujto 'ixta sb'o eb' 'ix wetz'wjum cha, yuj cha, caw wal 'ix q'uib' sb'isl eb' israel, yel xo wal caw 'ay smay eb'. Ax eb' 'ix wetz'wjum cha, caw wal 'ay xiwc'ojlal eb' 'ix 'a Dios, yuj cha, xya'n pax Dios syaxilal 'a yib'n̈ eb' 'ix, caw wal wach' sq'uib' yune eb' 'ix.

²² A yic 'ix yiln win rey chajtlto matz tac' 'ixta', yuj cha, 'ix yaln win 'ixtc 'a smasnil eb' schon̈b' cha: A smasnil eb' winc 'unn tz'alj 'a scal eb' israel tic, tze xutcn 'at eb' 'a yojl a Nilo, palta toto 'ix 'unin, q'uib' cab'i', xchi win rey cha.