Ester 9 - Chuj San Sebastian Bible

Lajwnac 'el eb' 'ajc'ojl 'a eb' israel

¹ A 'a yic yoxlajn̈il c'u yoch slajchwil 'uj, 'a jun 'uj Adar sb'i, atn jun c'u chi checlxon yaji, yic tz'el'ch tas tzyal jun ley alb'il yuj win rey, palta atn 'a jun c'u chi sc'ul slajw 'el eb' israel chi yuj eb' 'ajc'ojl cha. Ax x'aji ma'ix 'el'ch 'ixta', palta to a eb' x'ejm yuj eb' israel cha.

² A 'a smasnil yol smacb'en win rey Asuero, c'uxn 'ix syam sb'a smasnil eb' israel 'a junjn chon̈b' 'aj 'ayq'ui, syamn 'och eb' ya'n owl yet' eb' xnib'n milnc cham eb' cha. Toc 'ayt junc mach ste'wtzej sb'a 'a yojltac eb', yujto tox x'och xiwc'ojlal 'a scal eb' 'anma smasnil.

³ Smasnil eb' niwc yajl 'ay yopiso 'a junjn chon̈ab', yet' eb' to niwc yel'ch yopiso 'a yol smacb'en win rey, c'uxn xya'ch sb'a eb' yet' eb' israel, yujto caw tzxiw eb' 'a Mardoqueo,

⁴ to caw niwquil yopiso 'a sdespacho win rey. C'uxn xc'och yab'xil win Mardoqueo 'a smasnil chon̈ab', 'a junjn c'u tzq'ue'ch yopiso.

⁵ 'Ix stzu'n cham eb' israel chi eb' 'ajc'ojol cha. C'uxn 'ix satl eb' smasnil, 'ix sb'o wal eb' 'icha tas snib'ej.

⁶ A 'a chon̈b' Susa, 'ay o'e ciente eb' 'anma smil cham eb' israel.

⁷ Smiln cham pax eb' win Parsandata, Dalfón, Aspata,

⁸ Porata, Adalía, Aridata,

⁹ Parmasta, Arisai, Aridai, yet' Vaizata,

¹⁰ yunnal win Amán eb' slajn̈wan̈il, atn win 'ochnc 'ajc'ojl 'a eb' israel. May xon wal jac tas 'ay 'a eb' xcham chi 'ix yij 'at eb' israel cha.

¹¹ A 'a jun c'u cha, 'a yic xyab'n win rey jantc sb'isl eb' 'anma xcham 'a chon̈b' Susa, atn 'a 'aj 'aych win reyal,

¹² 'ix yaln win 'a 'ix reina Ester 'ixtic: —A eb' etchon̈ab', 'ix smil cham eb' o'e ciente eb' winac, yet' pax eb' yunnal win Amán slajn̈wan̈il 'a chon̈b' Susa tic. ¿Tasm wal 'ix 'uj 'a jun tzo'n̈ xo chon̈b' 'ay 'a yol in macb'en? Al 'ayin, tas nan̈locx tza nib'ej, 'oj wa'n̈j 'ayach, xchi win rey cha.

¹³ 'Ix ta'w 'ix Ester 'ixtic: —Toto tzchaj 'a c'ojl mamin rey, tztac' tzala to tzb'o eb' wit chon̈b' pax 'a chon̈b' Susa tic q'ui'n jun 'ejm xo 'icha wal tas 'ix sb'o eb' ticnec, a tzyal yaln a ley. Tzaln paxi to tzq'ue locn sniwnal eb' yunnal win Amán slajn̈wan̈il 'a te 'oy, xchi 'ix.

¹⁴ 'Ix yaln win rey, to tzb'o 'ixta'. 'Ix alx 'el jun ley chi 'a smasnil yol chon̈b' Susa, yuj cha, x'ajx q'ue locn sniwnal eb' yunnal Amán slajn̈wan̈il 'a te 'oy cha.

¹⁵ Smasnil eb' israel cajn 'a yol chon̈b' Susa, 'ix syam sb'a eb' 'a yic chan̈lajn̈e yoch 'uj Adar sb'i. 'Ix smiln cham eb' 'oxe xo ciente eb' winac, palta may jac tas 'ay 'a eb' xcham chi xyij 'at eb'.

^16-17 A smasnil eb' israel cajn 'a jun tzo'n̈ xo chon̈ab', 'ix syam sb'a eb' 'a yic 'oxlajn̈e yoch 'uj cha, yuj stan̈wni sb'a eb', yuj pax scoln sb'a eb' 'a eb' 'ajc'ojol. 'Ix smil cham eb' 75 mil eb' 'ajc'ojl cha, palta may jac tas 'ay 'a eb' xcham chi xyij 'at eb'. Ax 'a yic chan̈lajn̈e yoch 'uj cha, 'ix 'ilj eb', xya'n 'och eb' jun q'uin̈, caw xwa eb' 'a tzaljc'ojlal.

¹⁸ Yujto a eb' israel cajn 'a chon̈b' Susa cha, 'ix syam sb'a eb' yuj scoln sb'a 'a yic 'oxlajn̈e yoch 'uj, yet' pax 'a yic chan̈lajn̈e yoch 'uj cha, yuj cha, at 'a yic olajn̈e yoch 'uj cha, atta 'ix 'ilj eb', xya'n 'och eb' jun q'uin̈, caw xwa eb' 'a tzaljc'ojlal.

¹⁹ Ax pax eb' israel cajn 'a jun tzo'n̈ xo chon̈ab', yet' 'a jun tzo'n̈ aldea to may smuroal schon̈ab', a 'a yic chan̈lajn̈e yoch 'uj Adar sb'i, ata xya'ch eb' q'uin̈ 'a tzaljc'ojlal, 'ix laj siylan eb' tastc 'a 'a.

A jun q'uin̈ Purim sb'i

²⁰ 'Ix stz'ib'n Mardoqueo smasnil jun tzo'n̈ tas 'ix uj tic, xya'n 'at scarta 'a smasnil eb' yit israelal cajn 'a yol smacb'en win rey Asuero, 'a eb' cajn 'a lac'an, yet' pax 'a eb' cajn 'a najat.

²¹ 'Ix yaln 'ati, to a 'a junjn ab'il 'a yic chan̈lajn̈e' yet' 'a yic olajn̈e yoch jun 'uj Adar, yowlal tznax q'uin̈ ta'.

²² Yujto a 'a jun tzo'n̈ c'u cha, ata 'ix yac' lajwc eb' israel eb' 'ajc'ojl yajch 'a 'a. A wal 'a jun c'ul cha, 'aych wal eb' 'a 'oq'uel, tz'el yaw eb' yuj chamel. Palta 'ix jelmji, tzaljc'ojlal xo x'aj 'el'chi. Yuj cha, a 'a jun tzo'n̈ c'u cha, ata tzna eb' q'uin̈, tzsiyn eb' tastc 'a 'a, tzya'n eb' scolwal 'a eb' meb'a'.

²³ A eb' israel cha, a jun ley stz'ib'j can win Mardoqueo cha, 'ix 'ochcn sb'eyb'alc eb'.

²⁴ Yujto a win Amán, win 'ajc'ojl yajch 'a eb' israel, 'ix ya'ch win suerte 'a yib'n̈ eb', yic tzcheclji tas c'ul tzcham eb' smasnil.

²⁵ Palta yujto xc'och 'ix Ester paxtinc 'a win rey, yuj cha, xya'n 'elt win jun ley, to a smasnil tas tu 'ix sna Amán sb'on 'a eb' israel cha, a 'a yib'n̈ win tz'atcni, yuj cha, 'ix q'ue locn win yet' eb' yunnal smasnil.

²⁶ Yuj cha, a jun tzo'n̈ c'u tic, tzcuch sc'ul Purim. A jun paxti tic, tzyal 'el'chi, jun tzo'n̈ tas tzc'an eb' 'a suerteal. A tas tzyal ch'an̈ scarta win Mardoqueo, yet' tas 'ix sb'o eb',

²⁷ a chi 'ix sb'eylb'ej eb' israel chi yet' yin̈til, yet' pax smasnil eb' tzya'ch sb'a israelal yet' eb'. Yowlal tzna eb' chab' c'u q'uin̈ chi 'a junjn ab'il, 'icha 'ix 'aj yalxcani.

²⁸ 'Ixta x'ajcni, sec tznax cot yuj smasnil yin̈tl eb' israel 'a junjn niwc chon̈ab' yet' 'a jun tzo'n̈ xo chon̈ab', to yowlal tzna cot eb' q'uin̈ Purim chi 'a smasnil tiempo.

²⁹ Ax pax 'ix reina Ester yisl win Abihail, yet' Mardoqueo win israel, 'a sb'i yopiso eb', 'ix stz'ib'n eb' junx ch'an̈ carta yuj q'uin̈ yic Purim, yic tzwach' 'ajx 'och yip ch'an̈ b'ab'l carta.

³⁰ Xlajw cha, xya'n 'at eb' ch'an̈ 'a smasnil eb' yit israelal cajn 'a 127 niwc chon̈b' 'ay 'a yol smacb'en win rey cha. 'Ix 'ajx 'at stzatzl sc'ojl eb' yet' jun tzo'n̈ paxti to caw yel.

³¹ Xlajw cha, 'ix alxi, to yowlal tznax q'uin̈ yic Purim 'a jun tzo'n̈ sc'ul to checl xon yaji, 'icha wal xyutj win Mardoqueo yet' 'ix reina Ester yalni. Yowlal tzyiclj pax eb' yin̈tl eb', yuj snax cot c'ajb'c'ojlal yet' cusc'ojlal.

³² A jun checnb'il xyac' 'ix Ester, a tzalni tas wal tz'aj snax jun q'uin̈ cha. A jun tic, 'ix tz'ib'x can 'a yojl jun ch'an̈ u'un̈.