Ester 8 - Chuj San Sebastian Bible

Jun ley yuj swach'loc eb' israel

¹ A 'a yic jun c'u cha, a smasnil tas 'ay 'a win Amán, win 'ajc'ojl yajch 'a eb' israel, 'ix yac' win rey chi yico'oc 'ix reina Ester. Ax pax win Mardoqueo, 'ix 'ajx pax jun niwquil 'opiso 'a win yuj win rey cha, yujto tox 'ix yal Ester chajtlto yican sb'a 'ix yet' winac.

² Xlajw cha, xyi'n 'elt win rey q'uen colc'ab' 'aj 'aych seyo, atn q'uen xyijcan 'ec' win 'a win Amán, xya'n win q'uen 'a Mardoqueo. Ax jun tzo'n̈ tas 'ay 'a win Amán x'ajx yico'oc 'ix Ester, xya'cn 'ix 'a yol sc'ab' Mardoqueo yic tzya'n cuenta winac.

³ Xlajw cha, x'atx Ester chi paxtinc yet' win rey jun 'ejm xo. X'em cumnjoc sc'ochx 'a yojltac winac, syamn 'och 'ix yoq'ui, 'ix yaln 'ix 'ixtic: Mamin rey, comnoc to tzsatx 'el jun ley caw tu sb'ojnac win Amán yin̈tl Agag, comnoc matz 'el'ch tas tzyal chi 'a yib'n̈ eb' wit israelal, xchi.

⁴ 'Ix ya'n cot win rey chi sc'ab' yet' sc'occh nab'a oro 'a 'ix Ester cha, 'ix q'ue lin̈njoc 'ix 'a yojltac win rey cha.

⁵ Xyaln pax 'ix 'ixtic: —Toto wach'n 'a a sat mamin rey, toto tojl tas tzwal 'aych tic tzab'i, toto caw 'ay a chamc'ojlal 'ayin, 'ac' tz'ib'xoc junc a carta 'aj tzyala to tzsatx 'el tas tz'ib'b'il 'a ch'an̈ carta ya'jnac 'at win Amán, win yunnal Amedata 'a junjn chon̈b' 'ay 'a yol a macb'en, 'a 'aj tzyala to tzmilx cham smasnil eb' wit israelal.

⁶ Yujto caw ma'oj techjoc wu'uj, yic 'oj wilnc tas 'oj jawc 'a yib'n̈ eb' wit chon̈ab', yet' 'a yib'n̈ eb' wican, yuj tas tzon̈ satn 'el qui masnil on̈, xchi 'ix.

⁷ 'Ix yaln win rey Asuero 'a 'ix reina Ester yet' 'a win Mardoqueo 'ixtic: —A win Amán cha, tox 'ix q'uelocan, yujto caw tu tas 'ix sna chan̈ 'a yib'n̈ eb' eyit chon̈ab'. A smasnil tas xcan yuj winac, tox 'ix wac' 'aych Ester.

⁸ A ticnec, tz'ib'jec 'at 'icha wal tas tze na'a, yuj e wach'loc yet' smasnil eb' eyit chon̈b' cha. Tzeya'n 'och in b'i, yet' pax in seyo yic wopiso 'a ch'an̈, yujto a junc ch'an̈ un̈ 'aj 'aych in b'i, 'aych pax in seyo 'a 'a, caw matz tac' stenx 'ec' tas tzyala, xchi winac.

⁹ Wal 'a yajn̈ej 'ix 'awtx cot smasnil eb' yajtz'ib' win rey. A 'a yic 23 yoch yoxl 'uj atn 'a jun 'uj tzcuch Siván. Smasnil tas xyal Mardoqueo, 'ix tz'ib'x 'at 'a smasnil eb' israel, 'a eb' gobernador, 'a eb' capitan̈, yet' pax 'a smasnil eb' yajl 'a 127 niwc chon̈b' macb'il yuj win rey cha, tz'atn̈j 'a India masnto 'a Etiopía. 'Ix tz'ib'x 'at 'a sti', yet' 'a sletra junjn chon̈ab'. An̈jtona 'ix tz'ib'x 'at 'a sti eb' israel cha.

¹⁰ A jun tzo'n̈ carta 'aj stz'ib'x jun ley cha, 'ix yac' pax win rey seyo 'a ch'an̈. Xlajw cha, x'ajx ch'an̈ 'a eb' checab', ax eb' x'i'n 'at ch'an̈, xq'ue eb' 'a yib'n̈ e no chej caw jeln sb'eyi, atn e no schej win rey 'ayc' 'a scabayerisa.

¹¹ A 'a ch'an̈ carta cha, ata xyalb't win rey chajtlto tztac' scoln sb'a eb' israel yaln̈j tas chon̈b'al 'aj 'ayc' eb'. Yowlal jun yamn tz'aj eb' yic tztan̈wni sb'a eb'. Toto 'ay eb' 'ajc'ojl tzc'och 'a eb', tztac' smilx cham eb' 'ajc'ojl chi yuj eb', tzsatx 'el eb' yuj eb' 'a jun 'ejmn̈ej. Ax eb' tz'i'n can tas 'ay 'a eb' 'ajc'ojl cha, atn eb' tzyac' owl yet' eb', yaln̈j tas chon̈b'al tz'och 'ajc'ojlal 'a eb', tojln̈ej scham eb' yet' yistzil yet' pax yunnal eb'.

¹² A jun tzo'n̈ tic, junn̈j c'u tz'aj sb'o smasnil 'a yol smacb'en win rey cha, atn 'a jun c'u checl xon yaji, 'a 'oxlajn̈e yoch slajchwil 'uj, jun 'uj Adar sb'i.

¹³ A scopiail jun un̈ cha, yowlal tz'at 'a junjn chon̈b'al, tzlajw cha, tzalx 'el 'a smasnil eb' 'anma', chajtlto caw ley jun cha, yic wach' a 'a jun c'u cha, a smasnil eb' israel yojc xo eb' to 'oj spac sb'a eb' 'a eb' 'ajc'ojl cha.

¹⁴ Wal 'a yajn̈ej x'at eb' checb' chi 'a yib'n̈ chej 'icha yaln win rey. 'Ix alx 'el pax jun ley chi 'a yol chon̈b' Susa, atn 'aj 'aych win rey yajlil.

¹⁵ A yic x'elt win Mardoqueo 'a yol despacho, 'aych spichl yic yopiso yu'uj, q'uic'mucnac yet' sac, 'icha yic eb' rey. 'Ay q'ue jun niwquil corona nab'a oro 'a sjolom, 'aych pax junx spichl nab'a lino, chacmucnac yilxi. A yic cha, smasnil eb' 'anma cajn 'a yol chon̈b' Susa, caw 'ix 'awj chan̈ eb' yuj tzaljc'ojlal.

¹⁶ Yuj cha, a eb' israel caw wal x'el leynjoc xyil eb', man̈x jantcoc stzaljc'ojlal eb', caw x'ijx chan̈ eb' xyab'i.

¹⁷ A yic xc'och jun ley chi 'a smasnil lugar yet' 'a smasnil chon̈ab', a smasnil eb' israel cha, caw wal stzalj chan̈ eb'. 'Ix ya'n 'och eb' jun q'uin̈, 'ix laj wa eb'. Til wal eb' 'anma 'aj chon̈b' chi xya'ch sb'a israelal yet' eb' israel cha, yuj xiwc'ojlal eb' 'a eb'.