Ester 7 - Chuj San Sebastian Bible

'Ochnc chaml 'a yib'n̈ Amán

¹ 'Ix 'at win rey yet' Amán wac 'a 'aj 'awtb'il cha.

² An̈jtona 'a yic jun c'u cha, yic wan yu'n eb' yal uva, 'ix yaln win rey 'a 'ix Ester 'ixtic: —C'an tas tza nib'j 'ayin, wach'xam tza c'an spacloc tas 'ay 'ayin, 'oj wa'n̈j 'ayach, xchi winac.

³ —Toto 'ay wal a chamc'ojlal 'ayn mamin rey, toto wach'n 'a a sat, a tas tzin nib'j tzin c'ana, to tzac' niwnc'ojlal 'ayn yet' eb' wit chon̈ab', comnoc matz in cham yet' eb'.

⁴ Yujto an tic yet' eb' in chon̈ab', on̈ chon̈xi, sec tzon̈ milx cham qui masnil on̈. Comnoc ton̈j on̈ chon̈x 'at mosoal on̈ mto 'a'j servil, to 'ixta', may tas tzwal ab'i'; nab'a am tzwij 'ec' a tiempo. Ocxo jun, to 'oj qui satx 'el 'a jun 'ejmn̈ej on̈, xchi 'ix Ester cha.

⁵ Yuj cha, sc'anb'n win rey Asuero chi 'a 'ix 'ixtic: —¿Mach wal jun cha? ¿'Ajtil 'ay jun chi tznib'n b'onc jun tzo'n̈ chi tzal cha? xchi winac.

⁶ —A jun 'ajc'ojl tu snab'en cha, atn ton win Amán tic, xchi 'ix. A wal yic xyab'n win Amán jun paxti cha, caw wal sacb'el sat win yuj xiwlal 'a yojltac win rey yet' 'a yojltac 'ix reina Ester.

⁷ Yuj cha, 'ix q'ue wan win rey, caw wal 'ay cot yowl si'mb'il. 'Ix 'elt win 'a yol n̈a 'a 'aj tzwa eb' cha, x'el-l 'a 'aj 'ay te nichte 'a sti sdespacho. Palta ax Amán, a yic xyilni to 'oj 'ajxoc 'och chaml 'a yib'n̈ yuj win rey, 'ix cancn 'a yol n̈a cha, 'ix tew 'och 'a 'ix reina Ester, sec tzcolchji.

^8-9 A yic 'ix 'ochx c'och win rey 'a yol n̈a 'a 'aj tzwa eb' cha, ax xyiln winac cumn 'ejm win Amán 'a stz'ey 'aj wocn 'ejm 'ix reina Ester cha, 'ix yaln win rey chi 'ixtic: —¿Tom tza nib'j tzach muln yet' 'ix reina tic 'a yol watut tic? xchi winac. A yic xyaln win rey jun tzo'n̈ paxti cha, wal 'a yajn̈ej xcot jun tzo'n̈ eb' schecb' win rey 'aych stan̈maloc, xwul smacnc eb' sat Amán cha, 'ix yaln jun win checb' tzcuch Harbona 'ixtic: —A 'a yatut win Amán tic, 'ay jun te 'oy 'ix yac' win b'o'oc, 'aym junc ch'an̈l stel te', sec ata tzq'ue locn win Mardoqueo yuj win yalni, atn win b'ojnac jun tas caw wach' 'aych mamin rey, xchi winac. —Locc q'ue win Amán tic 'a jun te cha, xchi win rey cha.

¹⁰ 'Ix slocn q'ue eb' win Amán 'a te 'oy ya'jnac b'o yuj Mardoqueo. 'Ixta x'aj sicb' yowl sc'ojl win rey cha.