Ester 6 - Chuj San Sebastian Bible

'Ijxnac chan̈ sb'inab'ilal Mardoqueo

¹ A wal 'a yic jun 'ac'wl cha, caw ma'ix cot xon swayn̈ win rey. Yuj cha, 'ix yaln winac, to tz'ijx cot ch'an̈ un̈ 'aj tz'ib'b'il smasnil tas 'e'nc xo 'a yib'n̈ jun nacion̈ cha, 'ix 'awtx ch'an̈ 'a yojltac winac.

² 'Ix 'ilchj 'a yojl ch'an̈, 'a 'aj tzyala to a Mardoqueo 'ix alni tas 'ix yal win Bigtán yet' win Teres, atn eb' stan̈mal spuertail sdespacho win rey, ata 'ix smol alj eb' tas tzyutj eb' smiln cham win rey cha.

³ Yuj cha, 'ix sc'anb'n win rey 'ixtc 'a eb' 'ay yopiso yuj win ta': —¿Tas junc 'ix 'ajxi, yet' tas 'ix 'utx Mardoqueo yuj jun tas sb'ojnac tic? xchi winac. —May xon jac tas 'ix 'ajx 'a 'a, xchi eb' 'a winac.

⁴ Wanto cha, xjaw Amán 'a yamq'uil sti despacho, yic tzwul sc'annoc 'a win rey cha, to tz'ajx q'ue locn Mardoqueo 'a jun te 'oy xyac' win b'o'oc. 'Ix sc'anb'n win rey chi 'ixtic: —¿Mach jun 'ayc' 'a sti 'el cha? xchi winac.

⁵ —A win Amán 'ayq'ui, xchi ewin schecb' win cha. 'Awtjec 'oxt winac, xchi win rey cha.

⁶ Yuj cha, x'och win Amán cha, 'ix sc'anb'n win rey chi 'a win 'ixtic: —¿Tas smoj tz'aj junc winac, toto tzin nib'j tzwij chan̈ sb'inab'ilal? xchi winac. 'Ix snan Amán chi 'a yol yic 'ixtic: ¿Mach to wal junc xo 'oj yi' chan̈ win rey sb'i, an toni? xchi.

⁷ Yuj cha, xta'w win 'ixtic: —A wal tas smoj tz'aj junc mach cha,

⁸ to tz'ijx cot junc a pichl tza c'an 'a opiso tic mamin rey, yet' pax no 'a chej tza c'anlb'ej xoni, ax 'a sjolm no', ata tz'ajx q'ue junc 'icha corona yelwnub'loc no', yic tzch'oxn 'eli, to ec no'.

⁹ Ax jun pichl cha, yet' no chej cha, tz'ajx 'a junc eb' yajl tic to yel xo niwc yel'ch yopiso, ax tz'a'n 'och te pichl chi 'a junc mach tza nib'j tzej chan̈ sb'i cha. Tz'ajx q'ue pax 'a yib'n̈ no chej cha, tzlajw cha, tzquetzx b'eyc'oc no chej chi yet' win 'a yol caye 'a yol chon̈ab'. Tzyaln 'a yojltac win 'ixtic: 'Ixtc wal tz'aj junc winc to tznib'j win rey tzyij chan̈ sb'i, xchi cab'i', xchi win Amán cha.

¹⁰ Xlajw cha, xyaln win rey chi 'ixtc 'a win Amán cha: —'Ixc muc'uc, 'ij 'at te in pichul yet' no in chej cha, 'icha wal 'ix otj aln 'ayn tic. 'Ixta wal tzotj a b'on Mardoqueo win israel, atn win wocnn̈ej 'ejm 'a sti spuertail in despacho. May cab' wal junc tas 'ix al chi to ma'oj a b'o', xchi winac.

¹¹ Yuj cha, xyi'n 'at win Amán chi jun te pichl cha, 'ix ya'n 'och 'a Mardoqueo. Xlajw cha, syamn 'och win squetzn b'eyc'oc no chej chi 'a yaln̈ Mardoqueo 'a yoltc caye 'a yol chon̈ab' cha. Tz'awj chan̈ win 'a yojltac winac, tzyaln win 'ixtic: 'Ixtc wal tz'aj junc winc to tznib'j win rey tzyij chan̈ sb'i, xchi.

¹² A yic xlajw yijx b'eyc'oc Mardoqueo chi yu'uj, 'ix 'atx can win 'a spuertail despacho chi jun 'ejm xo. Ax Amán, caw ji'lti xpax 'a yatut, cusc'ojlal yaji, smacn sat yuj q'uixwc'ojlal.

¹³ 'Ix yaln 'a yistzil, yet' 'a eb' swach'c'ojl yuj tas 'ix 'aji, yuj cha, xyaln eb' 'ixtc 'a 'a: —A jun winc cha, israel winac, 'in to wan sat 'ejm opiso 'a spatic, caw ma'oj 'ejmc o'oj, palta ach 'oj 'em yuj tzyal cha, xchi eb' 'a 'a.

¹⁴ Mantzac lajw spaxtin eb', 'ix c'och eb' schecb' win rey chi muc'uc, yic tz'ijx 'at Amán wac yet' win rey chi 'aj 'awtb'il yuj 'ix Ester.