Ester 5 - Chuj San Sebastian Bible

C'ochnc Ester 'a yojltac win rey

¹ Ax yic xlajw 'oxe c'u cha, sb'on sb'a Ester yet' spichul, xya'n 'och spichl yic sreinail. Xlajw cha, xc'och 'ix 'a yamq'uil yatut win rey 'a stojlal 'elt spuertail yet'l win 'aj wocn 'elt 'a sdespacho.

² Ax yic xyiln 'elt win rey to 'ayc' Ester 'a sti 'elt sdespacho, caw x'o'ch sc'ojl win 'a 'ix, yuj cha, xya'n 'elt sc'ab' yet' sc'occh nab'a oro 'a 'ix. 'Ix 'ochch Ester 'a stz'ey winac, syamn cot 'ix sn̈i te c'occh cha.

³ 'Ix sc'anb'n win rey chi 'ixtc 'a 'ix: —¿Tas tzach 'i'n reina Ester? ¿Tas wal tza nib'ej? Toto tza nib'j tza c'an spacloc tas 'ay 'a yol in c'ab', 'oj wa'n̈j 'ayach, xchi win 'a 'ix. Yuj cha, xta'w 'ix Ester 'a win 'ixtic:

⁴ —Toto tzchaj a c'ojl mamin rey, tzin tew 'ayach, to tzach 'at wac wet' ticnec. 'Ix wac' b'o tas tza c'uxu, yujto caw niwn el'ch 'a in sat, tzej 'at win Amán et'oc, xchi 'ix. Xlajw cha, xyaln win rey 'ixtic:

⁵ —'Awtjec cot win Amán muc'uc, yiclx cab' tas tzyal 'ix reina Ester, xchi winac. Xlajw cha, x'at win rey yet' win Amán 'a 'aj 'awtb'il eb' yuj 'ix reina cha.

⁶ A yic wan swa eb', a yic wan yu'n eb' yal uva jawnac sti', 'ix yaln win rey 'a 'ix 'ixtic: —C'an tas tza nib'j 'ayin, 'oj wa'n̈j 'ayach; wach'xam tza c'an spacloc tas 'ay 'ayin, 'oj wa'n̈j 'ayach, xchi winac.

⁷ 'Ix yaln Ester 'ixtc 'a winac: —A wal tas tzin nib'j tzin c'an 'ayach, atn tic:

⁸ Toto yel 'ay a chamc'ojlal 'ayn mamin rey, tzyaln̈j a c'ojl a'n tas tzin c'ana, scha cab' a c'ojl a cotx q'ui'n jun 'ejm xo yet' win Amán yic tzex wa wet'oc, yujto caw niwn el'ch 'a in sat. At q'ui'n chi 'oj wal 'ayach tas tzin nib'j in c'an 'aych mamin rey, xchi 'ix.

Snalb'ej Amán smil Mardoqueo

⁹ Caw tzalj Amán yic x'el paxt 'a 'aj xwa eb' cha, palta a yic xyilni to 'ayc' Mardoqueo 'a spuertail sdespacho win rey, yuj cha, caw wal xcot yowl winac, yujto a yic x'ec' win 'a stz'ey, ma'ix q'ue lin̈njoc, ma'ix 'em n̈ojn pax jac 'a winac.

¹⁰ A 'a yic mu'c cha, ma'ix sch'oxl Amán schichnc'ojlal, palta ton̈j 'ix pax 'a yatut. Ax yic xc'ochi, xyawtn cot win 'ix yistzil, atn 'ix Zeres. Xyawtj cot pax win eb' swach'c'ojol.

¹¹ 'Ix syamn 'och sb'an̈n sb'a 'a sat eb', yujto caw wal rico win si'mb'il, caw niwn pax yunnal winac. 'Ix yaln paxi to 'ix si'x 'elt yuj win rey 'a scal jun tzo'n̈ xo eb' 'aych yajlil yet'oc, 'ix 'ajx 'och wal yopiso sat yajlil 'a yib'n̈ jun tzo'n̈ xo eb' cha.

¹² 'Ix yaln wal 'ixtic: —An̈jtona', cojn in pax in 'awtx 'at wac yet' win rey yuj 'ix reina Ester. May junc xo mach x'ati. 'Awtb'iln pax wac yet' win rey chi yuj 'ix jun 'ejm xo q'uic'an.

¹³ Palta a wal yic tzwiln 'och jun israel tzcuch Mardoqueo wocn 'ejm 'a spuertail sdespacho win rey, ax smasnil jun tzo'n̈ 'ay 'ayn cha, man̈x 'a jac yel'ch 'a in sat yuj in chichnc'ojlal 'a 'a, xchi Amán.

¹⁴ Yuj cha, 'ix yaln 'ix yistzil win cha, yet' pax eb' swach'c'ojl win chi 'a 'ixtic: —'Ac' b'o junc te 'oy, jun ch'an̈l tz'aj ste'il, ax q'ui'n 'a sq'uin̈b'ial, tza c'ann 'a win rey to tzq'ue locn win Mardoqueo chi 'a te', yic wach' caw tzaljc'ojlal 'oj a wa yet' win rey chi q'uic'an, xchi eb'. A wal jun nab'en cha, caw schaj sc'ojl win Amán, yuj cha, 'ix ya'n win b'o jun te 'oy cha.