Ester 4 - Chuj San Sebastian Bible

'Ochnc scusc'ojlal eb' israel yuj jun ley

¹ A yic xyab'n Mardoqueo jun ley 'ix alx 'el cha, yuj cha, 'ix stzilnjat spichul, 'ix ya'n 'och spichl n̈achtac sat yuj cusc'ojlal, xya'n q'ue stan̈il c'ac' 'a sjolom. 'Ix syamn 'och sb'eyc' 'a yol chon̈ab', tz'el yaw yuj cusc'ojlal yujto caw ya tzyab'i.

² Ax yic xc'och 'a spuertail 'aj 'ay yatut win rey, ma'ix 'och 'a yojol, yujto matz chax 'och junc mach to 'aych pichl yic cusc'ojlal yu'uj.

³ An̈jtona pax 'a smasnil chon̈b' 'aj 'ix c'och ch'an̈ un̈ 'aj tz'ib'b'il jun ley cha, 'ix 'och smasnil eb' israel 'a cusc'ojlal. A yic sch'oxn 'el eb' scusc'ojlal cha, 'ix 'och eb' 'a c'ajb'c'ojlal, caw tz'oc' eb', caw ya tzyab' eb', til wal eb' x'ec' teln 'a scal stan̈il c'ac', xya'n pax 'och eb' te pichl to n̈achtac sat yuj scusc'ojlal.

Tewnac 'ix Ester

⁴ A eb' 'ix 'ix tz'a'n servil 'ix reina Ester, yet' pax eb' winc tztan̈wni 'ix, 'ix yal eb' yab' 'ix tas yaj Mardoqueo cha. Yuj cha, 'ix cus chan̈ sc'ojl 'ix, 'ix ya'n 'at 'ix pichl 'a Mardoqueo yic tzjeln 'el win te pichl n̈achtac sat 'aych yuj cha, palta ma'ix yal sc'ojl scha'aj.

⁵ Yuj cha, 'ix yawtn cot Ester jun win schecb' win rey, atn win Hatac. A win tic 'ac'b'il 'och win schecb'oc 'ix Ester tic yuj win rey. 'Ix schecn 'at 'ix win 'a win Mardoqueo, yic tz'at sc'anb'noc tas yuj 'ixta tzyutj sb'a, yet' pax tas yaj jun tzo'n̈ paxti tzalx cha.

⁶ Xc'och Hatac sc'umc Mardoqueo 'a jun plas 'ayc' 'a yojltac 'at yatut win rey.

⁷ 'Ix yaln Mardoqueo smasnil tas tzalx cha, 'ix yaln pax yuj jantc sb'isl q'uen tumn plata tzyal win Amán yac' 'a win tzmoln stumn win rey yic wach' tzmilx eb' israel smasnil.

⁸ An̈jtona', 'ix ya'n pax Mardoqueo jun ch'an̈ scopiail jun ley chi 'a win Hatac, yic tzya'n win ch'an̈ 'a 'ix Ester, sec tzyojquej 'el 'ix smasnil tas wan yuj 'a yol chon̈b' Susa cha. 'Ix yaln pax 'at winac, to tztew 'ix Ester chi 'a win rey, sec toq'ue wal tztac' to yec' jun paxti chi 'a yib'n̈ eb' yit chon̈ab'.

⁹ Xlajw cha, 'ix meltzj pax win Hatac cha, 'ix wul yalnc 'a 'ix Ester smasnil tas xyal Mardoqueo cha.

¹⁰ 'Ix schecn pax 'ix win Hatac yic tz'at yalnc jun tzo'n̈ xo paxti chi 'ixtc 'a winac:

¹¹ Smasnil mach 'aych schecb'oc win rey, yet' pax smasnil eb' chon̈b' 'ay 'a yol smacb'en winac, yojc eb' to a smasnil mach tz'och 'a yol sti sdespacho winac, 'ay jun ley tzalni chajtlto tojln̈ej schami. Wach'xam winac, mto 'ix, toto man̈oc win tz'awtni, yowlal tzchami. Cojxn toto tzyij chan̈ win rey chi jun sc'occh nab'a oro, tzch'oxn 'elt win 'a 'a; toto 'ixta', a jun cha, matz chami. An tic, 'ayx jun 'uj man̈x 'a 'aj tzin yawtj 'at win rey 'a 'a, xchi 'ix.

¹² A yic xyab'n Mardoqueo tas 'ix yalb't Ester 'a 'a,

¹³ yuj cha, 'ix yaln cot pax 'ixtc 'a 'ix yuj jun tzo'n̈ spaxti cha: Man̈ a na', to yujn̈ej to 'aych 'ec' 'a yatut win rey ax a colchji, ya' sb'a ax smasnil eb' quit israelal 'oj cham eb'.

¹⁴ Toto mayn̈ej tas 'oj al ticnec, toto 'ixta', 'ajmn̈ej 'oj cot junc qui colmalec an̈ israel on̈c tic, palta ach xo tic yet' smasnil eb' ecan, c'uxn 'oj qui satli. Toq'ue yuj jun yailal tic, ach si'x 'och reinail yic tzon̈ a coln 'eli, xchi Mardoqueo cha.

¹⁵ Yuj cha, 'ix yaln pax 'at Ester chi 'a win 'ixtic:

¹⁶ 'Ixic, molb'tzej smasnil eb' quit chon̈b' cajn 'a yol chon̈b' Susa tic, 'och cab' eb' 'oxe'oc c'u 'a c'ajb'c'ojlal wuj an tic. May cab' tas tze c'uxu, may pax cab' tas tzeyu'j 'a 'oxe c'u cha, yet' 'oxe'oc 'ac'wal. An̈jtona pax eb' 'ix tzin 'a'n servil an tic, 'oj 'och eb' 'ix 'a c'ajb'c'ojlal wet'oc. 'Oj lajwc cha, ax 'at wilnc win rey cha, wach'xam man̈ 'ixta'oc yaln ley. Toto yuj cha, ax in milx cham jun, chamquin cab'i', xchi Ester.

¹⁷ Xlajw cha, 'ix 'at Mardoqueo, 'ix syiclni sb'on smasnil tas xyal 'ix Ester cha.