Ester 3 - Chuj San Sebastian Bible

Mardoqueo yet' Amán

¹ 'Ix ec' jun tiempoal, 'ix ya'n 'och win rey yopiso win Amán yunnal Hamedata yin̈tl can Agag. A Amán cha, 'ix 'ajx 'och sat yajlil 'a yib'n̈ jun tzo'n̈ xo eb' yajl yaj 'a jun nacion̈ cha.

² 'Ix yal win rey to smasnil eb' yajal yet' eb' tz'a'n servil 'a sdespacho, yowlal tz'em cumn eb', tz'em pax n̈ojn eb' 'a yojltac win Amán cha, ax pax win Mardoqueo, ma'ix syiclj jun checnb'il cha.

³ Xlajw cha, sc'anb'n jun tzo'n̈ xo eb' yajl chi 'a Mardoqueo tas yuj matz yiclj jun checnb'il cha.

⁴ Junjn c'u tzlaj sc'anb'noc eb' 'a 'a, palta matz chaj yab' tas tzyal eb', yujto tox 'ix yal 'a eb' to israel. Yuj cha, x'at yalnc eb' 'a Amán, yic tzyiln eb' toto 'oj cann̈j yuj win 'a 'ichn̈jta'.

⁵ A yic xyiln Amán to caw yel matz 'em cumn Mardoqueo cha, matz 'em pax n̈ojn 'a yojltac winac yic tz'ec' win 'a stz'ey, yuj cha, caw xcot yowlal.

⁶ Yujto 'ojcab'il xo tas chon̈b'al Mardoqueo cha, yuj cha, 'ix sna Amán to man̈ colb'loc cojn tzchami, 'ix sna wal si'mb'il tas tz'aj slajw 'el smasnil eb' israel cajn 'a yol smacb'en win rey Asuero cha.

A jun ley tzalni to tzsatx 'el eb' israel

⁷ A yic b'ab'l 'uj 'a jun ab'il cha, atn 'a jun 'uj Nisán sb'i 'a yic slajchwil xo ab'il yoch win Asuero reyal, 'ix 'och suerte 'a yojltac Amán yic tzyojcan 'eli tas c'ual yet' tas tiempoal tz'el'ch tas tzna cha. Ax x'aji, 'ix 'el'ch jun suerte chi 'a yic 'oxlajn̈e yoch slajchwil 'uj, atn 'a jun 'uj Adar sb'i.

⁸ Yuj cha, 'ix yaln Amán 'a win rey Asuero 'ixtic: —A 'a smasnil chon̈b' 'ayc' 'a yol a macb'en 'ach mamin rey, 'ay wal jun macn̈ 'anma chuc yeli; chuc yel sley 'a yib'n̈ jun tzo'n̈ xo chon̈ab', matz yiclj xon a ley mamin rey. Caw man̈ smojc cajnn̈ej 'ec' eb' 'a yol a macb'en 'aj tzac' reyal.

⁹ Yuj cha, toto tzchaj a c'ojl mamin rey, 'a'l junc ley sec tzyab' smasnil chon̈ab' chajtlto 'oj lajwc 'el eb' smasnil. Toto chaj a c'ojl tzsatl eb' smasnil, an xo an tic 'oj wac' junc nan̈l swajxquil mil quintal q'uen tumn plata 'a win tzmoln 'a tumn mamin rey, yic tz'och q'uen eco'oc, xchi winac.

¹⁰ Xlajw cha, 'ix yi'n 'elt win rey scolc'ab' 'aj 'aych seyo, 'ix ya'n 'a win Amán, win 'ajc'ojl yajch 'a eb' israel.

¹¹ 'Ix yaln win rey chi 'a win 'ixtic: —A q'uen plata cha, can cab' q'uen 'ayach, palta a eb' 'anma 'ix al cha, tztac' a b'on tas tza nib'j 'a eb', xchi win rey chi 'a Amán.

¹² A 'a yic yoxlajn̈il yoch b'ab'l 'uj 'a jun ab'il cha, 'ix 'awtx smasnil eb' yajtz'ib' win rey, ax eb' stz'ib'n jun ley 'ix yac' Amán b'o'oc, yic tz'ajx 'at 'a junjn eb' yajl 'ay 'a junjn niwc chon̈b' 'ay 'a yol smacb'en win rey. A jun ley cha, 'ix tz'ib'x 'a sti', yet' 'a sletra junjn chon̈b'al eb' 'anma', 'ix 'och seyo win rey 'a 'a, yujto locn win 'ix alni.

¹³ Wal 'a yajn̈ej, 'ix 'ajx 'at eb' checb' 'a smasnil chon̈b' 'ay 'a yol smacb'en win rey cha. A 'a jun ley cha, ata tzyala chajtlto junn̈j c'u 'oj satxoc 'el eb' israel smasnil, tzyal 'el'chi smasnil eb' winac, eb' 'ix 'ix, eb' 'ichmtac 'anma' yet' smasnil eb' 'unin; tzlajw cha, tz'ijx can 'ec' smasnil tas 'ay 'a eb'. A jun cha, tz'el'ch 'a yol jun 'uj Adar sb'i.

¹⁴ C'uxn 'ix pucb't scopiail jun ley chi 'a smasnil niwc chon̈b' 'a yol smacb'en win rey. 'Ix alx 'el 'a scal smasnil eb' 'anma', sec wach' lista xo yaj eb' 'a jun c'ul cha.

¹⁵ Wal 'a yajn̈ej 'ix spucn 'el eb' checb' chi ch'an̈ un̈ 'aj tz'ib'b'il jun ley cha, a tzyal xyutj win rey yalni. 'Ix alx 'el jun paxti chi mu'c 'a yol chon̈b' Susa. Ya' sb'a wan yu'w 'an̈ win rey yet' win Amán, ax eb' 'anma 'a chon̈b' Susa cha, caw wal somchj chan̈ eb' yuj jun paxti cha.