Ester 2 - Chuj San Sebastian Bible

A 'ix Ester sic'b'il 'och 'ix reinail

¹ 'Ix 'ec' junc tiempoal, 'ix sicb' yowl win rey Asuero cha, 'ix snan cot win 'ix Vasti yuj tas sb'ojnac, yet' pax yuj ley tox x'ajx 'el 'a yib'n̈ 'ix.

² Yuj cha, ax ewin 'aych yajlilal yet' win rey, 'ix yaln ewin 'ixtic: —Yowlal tzsayx cot eb' 'ix cob'stac 'ix to caw wal wach' yilx 'a win rey, eb' 'ix to mant 'ojtnacoc winac.

³ Si' cab' win rey tic junjnoc schecb' 'a junjn niwc chon̈ab' 'a yol smacb'en, yic wach' a eb' tz'i'n cot smasnil eb' 'ix cob'stac 'ix to caw wach' yilxi. Jaw cab' eb' 'ix 'a yatut win rey 'a Susa tic. Tz'ochcn eb' 'ix 'a yol sc'ab' win Hegai, atn win tztan̈wni eb' 'ix yistl win rey, ax win tzb'on yilx eb' 'ix.

⁴ A junc 'ix cob's to 'oj scha sc'ojl win rey, atn 'ix chi 'oj 'ochx can reinail sjelc 'ix Vasti, xchi ewinac. A jun nab'en cha, caw wal schaj sc'ojl win rey, yuj cha, 'ix ya'n win b'o 'ixta'.

⁵ A 'a chon̈b' Susa cha, ata cajn jun win israel Mardoqueo sb'i, yunnal Jair, yixchicn Simei. Ax Simei cha, cotnc 'a yin̈tl Cis, ax Cis cha, cotnc 'a yin̈tl can Benjamín.

⁶ A win Cis cha, locn win yet' eb' 'ijxnac cot 'icha presoal yuj win rey Nabucodonosor 'a Jerusalén, axta xjawcn eb' 'a Babilonia. Junn̈j x'aj eb' sjawcn yet' Jeconías win sreyl Judá.

⁷ A Mardoqueo cha, 'ay jun yisl jun win yican 'ayc' yet'oc, Hadasa sb'i 'ix, mto Ester. Meb'a 'ix 'ix yujto chamnc smam snun 'ix; ax Mardoqueo chi 'ix q'uib'tzani. 'Icha wal yisil, 'ixta xyutej. Caw wal wach' yilx sat, yet' sniwnal 'ix cob's cha.

⁸ Ax yic x'elt jun ley chi yuj win rey, til wal eb' 'ix cob'stac 'ix x'ijx 'at 'a chon̈b' Susa 'a sdespacho win rey cha. 'Ix 'ajx 'och win Hegai stan̈malc eb' 'ix, atn win tztan̈wni eb' 'ix yistzil win rey. Locn 'ix Ester 'aych 'a scal eb' 'ix.

⁹ A 'ix Ester cha, caw wal wach' snab'en 'ix xyilch win Hegai, yuj cha, caw wach' xyutj win snab'en 'a 'ix. Wal 'a yajn̈ej, xya'n win 'ajxoc b'o yilx 'ix, ax tas caw wach' sc'uxxi, a xyac' win 'ajxoc 'a 'ix. 'Ix 'ajx 'och ucwn̈ eb' 'ix ya'mal servil win rey chi ya'malc servil 'ix, eb' 'ix to caw wach' ya'w servil. Xlajw cha, x'ajx 'at eb' 'ix yet' 'ix Ester chi 'a jun cuarto caw wach' 'a jun n̈a 'aj cajn 'ec' eb' 'ix yistzil win rey.

¹⁰ A 'ix Ester cha, may tas tzyal 'ix yuj 'aj cotnc yin̈til, yet' tas chon̈b'al 'ix, yujto a Mardoqueo 'ix alni, chajtlto may 'aj tzyal 'ix.

¹¹ Junjn c'u tz'ec' Mardoqueo chi 'a sti 'el te n̈a 'a 'aj 'ayc' eb' 'ix yistzil win rey cha, yic tz'ec' yilnoc toto wach' sc'ojl 'ix Ester cha, yet' yuj tas tz'aj yajx servil 'ix.

¹² Jun ab'il xyac'a, yic xb'o yilx eb' cob'stac chi smasnil. B'ab'el, waque 'ujl xyac' sucx 'och yalil te mirra 'a sniwnal eb' 'ix, ax waque xo 'ujal, sucx 'och perjuma yet' crema 'a eb' 'ix, atn jun tzc'an xon eb' 'ix 'ix. Ax yic xlajw sb'o 'el'ch yilx eb' 'ix, junjnal 'ix 'ijx 'at eb' 'ix wayc yet' win rey Asuero cha.

¹³ 'Ixta x'aj sc'och junjn eb' 'ix 'a win rey cha. A yic tz'elt eb' 'ix 'a yol n̈a 'a 'aj 'ayc' eb' 'ix 'ix cha, tztac' yi'n 'at eb' 'ix tas tznib'j tzyij 'ati.

¹⁴ A 'a yic sq'uic'b'alil tz'at eb' 'ix wayc yet' win rey cha, ax 'a yic junx sq'uin̈b'ial, tz'ec' eb' 'ix 'a junx n̈a 'a 'aj 'ayc' eb' 'ix schab'l 'istzil win rey, atn 'a 'aj 'aych win Saasgaz yilmalc eb' 'ix schab'l 'istzil winac. Tzcan eb' 'ix ta'. Man̈xtzac c'och eb' 'ix 'a win rey chi jun 'ejm xo, cojn toto 'ay junc 'ix caw tzchaj sc'ojl win rey cha, to 'ixta', tz'awtx sb'i 'ix, 'ixta to tz'aj 'ix tzc'ochx 'a winac.

¹⁵ Ax x'aji, a yic xjaw stzol-l yic 'ix Ester, 'ix yisl win Abihail yican Mardoqueo, yic tz'at 'ix wayc yet' win rey, cojn wal tas 'ix yal Hegai win yilmal eb' 'ix 'ix, cojn chi xyij 'at 'ix. Caw wach' 'ix Ester chi 'a sat smasnil eb' tztan̈wni 'ix.

¹⁶ A 'a yic slajn̈il 'ujal, 'a jun 'uj Tebet sb'i, 'a yic yucl ab'il xo yoch win Asuero reyal, ata 'ix 'ijx 'at 'ix Ester 'a win rey, yic tz'at 'ix wayc yet' winac.

¹⁷ Yel xo wal xchamc'ojlax 'ix Ester chi yuj win rey cha. May xon junc 'ix 'aj 'ay schamc'ojlal win 'icha xyutj schamc'ojlan win 'ix Ester. Yel xo niwn swach'c'ojlal win 'a 'ix 'a yib'n̈ jun tzo'n̈ xo eb' 'ix cob'stac cha. Yuj cha, xya'n q'ue win jun corona yic reyl 'a sjolm 'ix. Xlajw cha, xya'n can 'och win 'ix reinail sjelc 'ix Vasti.

¹⁸ Wal 'a yajn̈ej xya'n 'och win jun niwn wa'el, yuj yijx chan̈ sb'i 'ix Ester. 'Ix yawtn cot win smasnil eb' 'aych yajlil yet' win 'a yol smacb'en, xyi'n 'emt win tojlb'al tzyac' eb' 'anma 'a junjn niwc chon̈ab', caw niwn pax siylab' xyac' win 'a eb'. 'Ixta wal xyutj win rey chi sch'oxn 'el swach'c'ojlal.

Yab'jnac sb'a Mardoqueo*r* 'a tas tzb'o 'a spatc win rey

¹⁹ 'Ay jun c'ual, 'a yic 'ix molb'tzax jun tzo'n̈ xo eb' 'ix cob'es, ax Mardoqueo 'ayx yopiso 'a sdespacho win rey.

²⁰ Ax 'ix Ester, may tas tzyal 'ix tas chon̈b'al yet' 'aj 'aycn yin̈tl 'ix, 'icha wal yaj yaln Mardoqueo 'a 'ix, yujto syiclj tas tzyal winac, 'icha xon 'a yic 'ayc' 'ix 'a yatut winac.

²¹ A yic 'aych Mardoqueo chi 'a yopiso 'a sdespacho win rey cha, 'ix yab'n spaxtin chawn̈ winc 'aych stan̈malc spuertail jun despacho cha, atn win Bigtán yet' Teres. Caw wal ow ewin 'a win rey, smol aln ewinac tas 'oj yutc ewin smiln cham win rey cha.

²² A yic xyab'n Mardoqueo jun paxti cha, 'ix yaln 'a 'ix reina Ester, ax 'ix xaln 'a win rey yuj jun tas 'ix yab' win Mardoqueo cha.

²³ A jun paxti cha, 'ix sayx 'ec' wal si'mb'il toto caw yel, ax yic xcheclji, chajtlto caw yel, yuj cha, a eb' schecb' win rey chi schawn̈il, 'ix 'ajx q'ue locn eb' 'a jun te', yic tzcham eb'. A jun 'ix uj cha, 'ix yac' win rey chi tz'ib'xoc can 'a ch'an̈ un̈ 'a 'aj tz'ib'x yab'xil jun nacion̈ cha.