Ester 1 - Chuj San Sebastian Bible

Jun q'uin̈ ya'jnac 'och rey Asuero

¹ 'Ix uj jun tic yic 'aych win Asuero reyl 'a yol smacb'en Persia. 'Ay 127 niwc chon̈b' 'a yol smacb'en, tz'el yich 'a India masnto tzc'och 'a Etiopía.

² Ax chon̈b' Susa a sat yaj 'a eb' chon̈b' cha, ata 'ay sdespacho win rey.

³ A yic stz'acw yoxl ab'il yoch win Asuero chi reyal, 'ix ya'n 'och win jun niwn wa'el, yet' jun niwquil q'uin̈ yet' smasnil ewin niwc yajal, ewin 'ay yopiso yet' winac, eb' syajlil eb' soldado 'aj Persia, yet' eb' 'aj Media; eb' gobernador, yet' pax eb' yajl yaj 'a junjn niwc chon̈b' cha.

⁴ Nan̈l ab'il 'ix yac' jun q'uin̈ cha, yuj sch'oxn 'el win sricoal, yet' sniwquil-l yel'ch yopiso 'a eb' 'anma cha.

⁵ Xlajw cha, 'ix ya'n 'och win rey chi uque xo c'u q'uin̈ 'a yamq'uil sti jun despacho cha, atn 'a 'aj 'awb'il te 'awb'ente'. Smasnil eb' cajn 'ec' 'a yol chon̈b' Susa, eb' niwn yel'chi, yet' eb' may yel'chi c'uxn 'ix 'awtx cot eb'.

⁶ A jun 'amc' cha, wach'x yaj sb'o yet' jun tzo'n̈ te nip wach' yilxi, te sac yet' te q'uic'mucnac. Ax te púrpura 'aych sch'an̈loc, locb'il chan̈ te yuj jun tzo'n̈ sloclab'il nab'a plata. Ax yoyl yamjnac cha'an̈, nab'a mármol yaj sb'o'i. An̈jtona pax xilail, 'aych pax oro yet' plata 'a 'a. Ax 'a sat jun 'amc' cha, latz'b'il 'ejm q'uen q'uen man̈x jantcoc swach'l yilxi, atn q'uen mármol, q'uen alabastro yet' q'uen jacinto.

⁷ Ax 'a jun tzo'n̈ vaso nab'a oro, ata tzyu'j eb' tas tzyuq'uej. Chucchc yilx junjn vaso cha; caw niwn yal uva jawnac sti x'el 'a sc'ojl win rey chi ya'ni.

⁸ 'Ix yaln win 'a eb' yajl yaj 'a eb' tz'aw servil cha, to may junc mach tz'ajx pural yu'n yal uva; junjn eb' 'awtb'il cha, mun tzyu'j eb' tas tznib'j yuc'.

⁹ An̈jtona pax 'ix reina Vasti, 'ix yac' 'ix b'o jun niwn wa'el, yic wach' tzwa pax eb' 'ix yistzil ewin 'awtb'il 'a sdespacho win rey cha.

¹⁰ A wal 'a yic stz'acw yucl c'u q'uin̈, caw wal tzalj sc'ojl win rey chi yuj yal uva jawnac sti', yuj cha, schecn 'at win ucwn̈ eb' winc 'aych ya'malc servil to 'aych yipc sc'ojol, atn Mehumán, Bizta, Harbona, Bigta, Abagta, Zetar yet' Carcas

¹¹ yic tz'at yi'nc cot ewin 'ix reina Vasti 'a yojltac win rey. Tznib'j win to tzjaw 'ix yet' scorona to caw tzwetzwni, yic tzch'oxn pax 'el 'ix swach'l yilx 'a sat smasnil eb' 'anma', yet' 'a sat smasnil eb' niwc yajal, yujto caw wal wach' yilx 'ix.

¹² Palta ma'ix schaj cot sb'a 'ix reina cha, stenc' 'ix schecnb'il win rey x'at yal ewin schecb' cha. Yuj cha, caw wal xcot yowl win rey chi si'mb'il.

^13-14 'Ix yawtn cot win rey chi ucwn̈ eb' win 'aych yopiso yuj 'a Persia yet' 'a Media, to yipc'ojlal yaj eb' yuj winac, atn Carsena, Zetar, Admata, Tarsis, Meres, Marsena yet' Memucán. A eb' tic yojc eb' ley si'mb'il, caw jeln eb', yuj cha, a 'a eb' tzc'anb'j win rey junc snab'en yuj tas tzb'o'i.

¹⁵ 'Ix sc'anb'n win rey chi 'a eb' 'ixtic: —A tzyal qui leyec, nac wet'oc tas tz'aj 'ix reina Vasti cha, yujto ma'ix syiclj 'ix in checnb'il, 'ix 'at wac' yal eb' in checb' 'a 'ix, xchi winac.

¹⁶ Wal 'a sat smasnil eb' oyn 'ec' 'a jun cumjb'a cha, 'ix yaln Memucán 'a win rey chi 'ixtic: —A 'ix reina Vasti cha, man̈ cojnoc 'aych x'och stenmtacl 'ix, palta x'och pax smul 'ix 'a 'ayn̈ an̈ niwc yajl on̈ tic on̈, yet' pax 'a smasnil eb' winc 'ay 'a junjn niwc chon̈b' 'aych 'a yol a macb'en mamin rey.

¹⁷ A jun tas 'ix sb'o 'ix reina cha, 'ac' yojcoc 'el smasnil eb' 'ix 'ix, sec matz cuy sb'a eb' 'ix to may yel'ch yichmil eb' 'ix 'a sat, toq'ue 'oj yal eb' 'ix 'ixtic: A win rey Asuero 'ix 'awtx 'at 'ix reina Vasti yuj winac, palta ma'ix syicl 'ix s'ati, 'oj schic eb' 'ix.

¹⁸ A wal eb' yistzil ewin niwc yajl 'a Persia yet' 'a Media, a yic 'oj yab'nc eb' 'ix yuj tas xyutj sb'a 'ix reina tic, 'oj yal am eb' 'ix jun tic 'a yichmil, yujn̈ej cha, ax spatquiln 'el eb' 'ix yichmil, ax scot am yowl ewin 'a eb' 'ix.

¹⁹ Yuj cha, toto wach' tzab' mamin rey, 'ac' b'o junc ley, tz'ib'x can 'a yol yun̈al qui leyl an̈ 'aj Persia yet' an̈ 'aj Media on̈ tic, sec man̈x 'a b'a'n̈ 'oj jelxoc: Man̈x 'a cab' b'a'n̈ 'oj jawc 'ix reina Vasti 'a yojltac win rey, xchi cab' jun ley cha. Ax junc 'ix 'ix yel xo wal wach' 'a yib'n̈ 'ix, a 'ix tz'ochx can reinail sjelc 'ix cha.

²⁰ A jun ley cha, yowlal tz'ojcax 'el 'a yol smasnil qui nacion̈. Toto 'ixta', smasnil eb' 'ix 'ix, yiclum 'oj yutc sb'a eb' 'ix 'a yichmil, yaln̈j tas 'anma'il, xchi winac.

²¹ A jun nab'en 'ix yac' win Memucán cha, caw wal schaj sc'ojl win rey chi yet' eb' 'ayc' 'a jun c'umjb'a cha. 'Ix 'och jun nab'en chi 'a yopiso yuj win rey cha.

²² Xlajw cha, xya'n 'at win scarta 'a junjn niwc chon̈ab', 'ix tz'ib'x 'at 'a sti junjn chon̈ab'. 'Ix yaln 'at win 'a ch'an̈ scarta cha, chajtlto 'ay cab' yel'ch eb' winc 'a yol yatut, a cab' eb' tzalni tas smoj tzb'o'i.