Esdras 9 - Chuj San Sebastian Bible

Smul eb' israel yet' slesl Esdras

¹ 'Ix ec' jun tiempoal, ax eb' yajl yaj wuj 'a scal eb' chon̈b' cha, 'ix jaw eb' 'ayin, xyaln eb' 'ixtic: A eb' quit israelal, yet' eb' ya'mal 'och qui ti 'a Dios, yet' pax jun tzo'n̈ xo eb' levita, matz pojl sb'a eb' 'a scal eb' chuc chon̈b'al cajn 'a jun nacion̈ tic, 'in to tzb'eylb'ej eb' stu b'eyb'al eb' cananeo, eb' hitita, eb' ferezeo, eb' jebuseo, eb' amonita, eb' moabita, eb' egipcio yet' eb' amorreo.

² A eb' cha, wan laj yi'lan sb'a eb' yet' eb' chuc chon̈b'al cha, tzlaj yi'n pax sb'a yunnal eb' yet' eb' 'ix yisl jun tzo'n̈ 'anma cha, yuj cha, a schon̈b' Dios tox 'ix scalj sb'a yet' jun tzo'n̈ chuc chon̈b'al cha. A eb' xb'ab'l 'och smul cha, atn eb' yajl yaj 'a qui calec, xchi eb' 'ayin.

³ A yic 'ix wab'n jun cha, xin tzilnjat in pichul, xin to'n 'el xil in jolom, yet' xil in ti', yuj in ch'oxn 'el in cusc'ojlal. Xlajw cha, in 'em wocan, man̈x in 'anmac xwab'i.

⁴ 'Ix syamn sb'a smasnil eb' wit israelal wet'oc, atn eb' to tzxiw 'a spaxti Dios, eb' tzyab' syal yuj smul eb' paxncta 'a Babilonia. Palta an xo tic, an̈ja wocn in 'ejmi, man̈x 'anmac yaj in nab'en xwab'i, masnto 'a yorail yajx xajmb'al yic yemc'ual.

⁵ Ax 'a yorail yic yajx xajmb'al cha, in q'ue wan 'aj wocn in 'ejm yuj in cusc'ojlal. In 'em cumn in leslwi, xwi'n chan̈ in c'ab' 'a yojltac Jehová qui Diosal, tzilquintac yaj in pichl in jatni.

⁶ Xwaln 'a 'ixtic: Ach in Diosal, caw wal tzin q'uixw wi'n chan̈ in sat 'ayach, man̈xtzac nachj wu'uj tas tzwutj waln in b'a 'ayach. Yujto x'ec' 'a yib'n̈ yoch qui mul on̈, 'ix q'ue'ch wal qui mul 'a satchan̈ on̈.

⁷ Yictax 'a yol stiempoal eb' qui mam quichm on̈, masnto ticnec, caw wal 'ayn̈ 'at 'a scal maysch'olnil on̈. On̈ 'ajx 'och 'a yol sc'ab' sreyl jun tzo'n̈ xo nacion̈ yet' eb' qui reyal, yet' pax eb' ya'mal 'och qui ti 'a 'aych on̈. 'Ay mach xlaj milx cham 'ayn̈ on̈, on̈ laj 'ijxc 'at 'a 'icha presoal on̈, 'ix laj 'el'x 'at tastc 'ay 'ayn̈ on̈, caw wal q'uixweltac on̈ 'ajcni, 'icha wal caj ticnec on̈.

⁸ Palta a ticnec Mamin Jehová, qui Diosal ach on̈, a yuj a chamc'ojlal 'ayn̈ on̈, wach'xam jaywn̈ wal qui b'ey on̈ 'elt 'a libre tic on̈, palta tztac' qui b'on pax 'ejm qui b'a 'a sat lum lum to ec yaji. Ach qui Diosal on̈, 'ix ac' qui tzaljc'ojlal jun 'ejm xo on̈, on̈ a coln pax 'elt 'aj 'ayn̈ 'och mosoal on̈.

⁹ Wach'xam mosoal caji, palta ma'on̈ actjcan on̈. Ach qui Diosal on̈, 'ix a ch'ox a chamc'ojlal 'a q'uib'n̈ 'a sat eb' sreyl Persia. 'Ix 'ac' qui tzatzl on̈ yic tzqui b'on pax sjel atut 'aj pojnc 'ejmi, ach on̈ a tan̈wj 'a Judá yet' 'a Jerusalén tic on̈.

¹⁰ Ax ticnec ach qui Diosal on̈, ¿tas wal wach' caln 'aych on̈, yujto tox 'ix 'och qui mul on̈? Ma'ix qui yiclj a checnb'il on̈,

¹¹ atn tas 'ix 'ac' yal eb' a checab', eb' tzach 'a'n servil. Ach tic 'ix al 'ayn̈ on̈ to jun 'eln̈ej maysch'olnil sb'eyb'al jun tzo'n̈ 'anma cajn 'a sat lum lum tzac' quico'oc on̈, b'ut'jnac 'el smasnil snacion̈ eb' yuj stu b'eyb'al.

¹² An̈jtona 'ix aln paxi, to a eb' quisl on̈, to matz tac' ca'n yi' sb'a eb' yet' eb' chuc chon̈b'al cha, an̈jtona eb' cunnal on̈ yet' yisl eb', matz tac' yi'n sb'a eb'. May xon b'a'n̈ tztac' qui colwj 'a eb' on̈ sec wach' tz'el'ch eb'. Toto tzqui yiclj jun tic on̈, caw wach' 'oj quel'ch on̈, ax qui c'uxn smasnil tas wach' tz'el 'a sat lum lum tic, ax cactn can lum yico'oc eb' quin̈tl on̈.

¹³ A wal yuj smasnil maysch'olnil x'el qui b'on on̈, yet' qui mul x'och 'ayach, yuj cha, x'ec' jun tzo'n̈ yailal tic 'a quib'n̈ on̈. Palta ach tic ach qui Diosal on̈, ma'ix a'ch qui yailal 'a quib'n̈ on̈, 'icha tas smoj qui chan 'aych on̈, palta x'el 'a a c'ojl pitzn on̈ jaywn̈ xo on̈ tic on̈.

¹⁴ Toto tenmtac tzcutj qui b'a jun 'ejm xo 'a a checnb'il, junn̈j pax tzcutj qui b'a yet' jun tzo'n̈ 'anma chuc chon̈b'al maysch'olnil sb'eyb'al cha, ¿tom ma'oj cot yowl a c'ojl 'a quib'n̈ on̈, ax on̈ a satn 'eli? Smoj am man̈x 'a junc on̈ tzon̈ can 'a qui pitznal on̈.

¹⁵ Mamin Jehová, qui Diosal ach an̈ israel on̈ tic on̈, caw wach' a nab'en 'ayn̈ on̈. 'Ix 'el 'a a c'ojol, to pitzn on̈ jaywn̈ xo on̈ colchj can 'el tic. Yuj cha, tzcaln q'uet qui mul 'a ojltac on̈, caw wal man̈ smojc tzon̈ 'och 'a ojltac yuj jun tic, xchi Esdras 'a slesal.