Esdras 8 - Chuj San Sebastian Bible

Slistail eb' xmeltzj yet' Esdras

¹ Atn slistail eb' yajl yaj 'a yib'n̈ eb' yican tic, a tzyal yaj stzib'x eb' 'a junjn 'in̈tal, eb' x'elt yet' Esdras 'a Babilonia yic 'aych win Artajerjes reyal.

^2-14 Atn Gersón, yin̈tl Finees; Daniel, yin̈tl Itamar; Hatús, yin̈tl Secanías win yin̈tl can David; Zacarías yin̈tl Paros, 150 eb' winc tz'ib'b'il sb'i 'a jun c'aj eb' tic. Elieonai, yunnal Zeraías, yin̈tl Pahat-moab, ajun chab' ciente winc yet'oc. Secanías, yunnal Jahaziel, yin̈tl Zatú, ajun 'oxe ciente winc yet'oc. Ebed, yunnal Jonatán, yin̈tl Adín, ajun 50 winc yet'oc. Jesaías, yunnal Atalías, yin̈tl Elam, ajun 70 winc yet'oc. Zebadías, yunnal Micael, yin̈tl Sefatías, ajun 80 winc yet'oc. Obadías, yunnal Jehiel, yin̈tl Joab, ajun 218 winc yet'oc. Selomit, yunnal Josifías, yin̈tl Bani, ajun 160 winc yet'oc. Zacarías, yunnal Bebai, yin̈tl can pax Bebai, ajun 28 winc yet'oc. Johanán, yunnal Hacatán, yin̈tl Azgad, ajun 110 winc yet'oc. Elifelet, Jeiel yet' Semaías, slajb' yin̈tl Adonicam, ajun 60 winc yet' eb', slajb'xoj xmeltzj cot eb'. Ax Utai yet' Zabud, yin̈tl Bigvai, ajun 70 winc yet' eb'.

A eb' tz'a'n cuenta yatut Dios

¹⁵ An Esdras in tic, 'ix wac' syam sb'a eb' wit chon̈b' tic 'a sti jun a a tzcuch Ahava, 'oxe c'u on̈ 'ec' ta'. A yic x'ec' in saync jun tzo'n̈ xo eb' levita 'a scal eb' 'anma', yet' 'a scal eb' ya'mal 'och sti eb' 'anma 'a Dios, may junc eb' x'ilchj wu'uj.

¹⁶ Xlajw cha, xin checn 'at Eliezer, Ariel, Semaías, Elnatán, Jarib, Elnatán, Natán, Zacarías, yet' Mesulam. A eb' tic, caw niwn yel'ch eb', an̈jtona xin checb't Joiarib, yet' Elnatán, caw wal cuywjum eb'.

¹⁷ 'Ix wal 'a eb' to tz'at sc'umc eb' win Iddo, yajl yaj 'a jun lugar tzcuch Casifia to tzalx 'a Iddo cha, yet' 'a smasnil eb' yican, atn eb' yin̈tl eb' tz'a'n cuenta yatut Dios cajn 'a Casifia cha, to tzchec cot ewin eb' 'anma tztac' scolwj quet' 'a yatut qui Diosalec.

¹⁸ Yuj scolwal Dios, 'ix checx cot Serebías yuj eb'. A jun winc cha, caw wal tznachj 'el yu'uj, yin̈tl jun levita tzcuch Mahli. A jun cha, 'ix cot yet' eb' yunnal, yet' eb' yu'tac; wajxclajn̈wan̈ sb'ey eb' 'a smasnil.

¹⁹ An̈jtona', xchecx cot pax Hasabías yet' Jesaías. A eb' cha, yin̈tl Merari eb', xcot eb' yet' yunnal yet' eb' yu'tac, junc'l sb'ey eb' 'a smasnil.

²⁰ 'Ix jaw pax 220 eb' tz'a'n cuenta yatut Dios. A eb' cha yin̈tl can eb' 'ac'b'il 'och yuj rey David yet' eb' 'aych yajlil yet'oc yic tzcolwj eb' yet' eb' levita 'a smunljel. Smasnil jun tzo'n̈ eb' tic, tz'ib'b'il sb'i eb' 'a jun lista.

'Ochnc Esdras 'a c'ajb'c'ojlal

²¹ Xlajw cha, xwaln 'ixtc 'a eb' wit chon̈b' cha: To tzon̈ 'ochc 'a c'ajb'c'ojlal 'a sti a Ahavá, sec wach' tzquijec 'ejm qui b'a 'a yojltac qui Diosalec. Tzqui c'annec 'a 'a, to tzon̈ yijec b'ey 'a wach' yet' eb' cunnalec yet' smasnil tas 'ay 'ayn̈ec.

²² Tox 'ix calc 'a win rey cha, to a qui Diosalec a tztan̈wni mach tz'och 'emmquilal 'a 'a, palta tzcot yowl sc'ojl 'a mach matz yiclni tas tzyala. Yuj cha, tzin q'uixw in c'ann in soldado 'a win rey, atn eb' tzb'ey 'a yoc, yet' eb' tzq'ue 'a yib'n̈ chej yic tzon̈ stan̈wni eb' 'a yol b'e, xin chi 'a eb'.

²³ Yuj wal cha, on̈ 'och 'a c'ajb'c'ojlal, xqui c'ann 'a Dios to tzon̈ stan̈wj 'a yol b'e, 'ix yab'n pax qui lesl chi 'on̈.

A jun tzo'n̈ ofrenda 'ix 'echtaxi

²⁴ Yajn̈ej xin si'n 'el lajchwan̈ eb' yajl yaj 'a scal eb' wit ya'mal 'och qui ti 'a Dios: atn Serebías, Hasabías, yet' lajn̈wan̈ xo eb'.

²⁵ Wal 'a sat eb' 'ix wechtan q'uen plata, q'uen oro yet' jun tzo'n̈ xo yamc'ab' 'ix yac' win rey, yet' yic eb' ya'mal snab'en winac, yic eb' 'aych yajlil yet'oc, yet' yic smasnil eb' quit israelal 'ayc' ta', atn scolwal eb' chi 'ix yac' yuj sb'omb'ilc yatut qui Diosalec.

²⁶ 'Ix wa'n jun tzo'n̈ chi 'a yol sc'ab' eb'; o'e ciente quintal q'uen tumn plata, yet' jun tzo'n̈ yamc'ab' to nab'a plata, 75 quintal yalil, yet' 75 quintal q'uen oro.

²⁷ An̈jtona yet' junc'l niwc vaso to nab'a oro, 'ec'b'al waclajn̈e libra yalil, yet' chab' vaso to nab'a bronce wach' yaj sb'o'i, lajn stojl 'icha yamc'ab' to nab'a oro.

²⁸ Yajn̈ej xwaln 'a eb' 'ixtic: Ax tic sic'b'ilx 'el yico'oc Jehová, an̈jtona yic pax jun tzo'n̈ yamc'ab' tic: Q'uen plata, q'uen oro, yet' q'uen ofrenda siyx 'a Jehová atn qui Diosalec yet' eb' qui mam quichmec.

²⁹ Caw tzeya'ilj eyi'n b'ey jun tzo'n̈ tic, masnto 'oj 'echtaxc q'uen 'a yojltac eb' syajlil eb' wit ya'mal 'och sti eb' 'anma 'a Dios yet' 'a yojltac jun tzo'n̈ xo eb' levita, yet' 'a yojltac eb' yajl yaj 'a yib'n̈ eb' quit israelal, atn 'a yol jun tzo'n̈ cuarto 'a yatut Jehová 'a Jerusalén, xin chi 'a eb'.

³⁰ Xlajw cha, 'ix schan eb' wit ya'mal-l 'och sti eb' 'anma 'a Dios, yet' jun tzo'n̈ xo eb' levita q'uen plata, q'uen oro yet' jun tzo'n̈ yamc'ab' tox 'ix 'echtax cha, 'ix yi'n 'at eb' 'a Jerusalén 'a yatut qui Diosalec.

'Ix jaw eb' israel 'a Jerusalén

³¹ A yic lajchwe yoch b'ab'l 'uj, on̈ 'el 'a sti a Ahavá, 'a yol yic Babilonia yic on̈ 'at 'a Jerusalén. A qui Diosalec caw 'ix colwj quet' on̈, a on̈ coln 'el 'a yol sc'ab' eb' 'ajc'ojol yet' 'a eb' 'elc'm 'a yol b'e.

³² A yic on̈ jaw 'a Jerusalén, on̈ 'ilj 'oxe c'u.

³³ Ax 'a schan̈l c'ual on̈ 'at 'a yatut qui Diosalec. Yajn̈ej 'ix quechtan q'uen plata, q'uen oro yet' jun tzo'n̈ xo yamc'ab'. 'Ix ca'n 'a yol sc'ab' eb' wit ya'mal-l 'och sti eb' 'anma 'a Dios, atn win Meremot, yunnal Urías. 'Ayc' pax Eleazar yet'oc, atn yunnal Finees, yet' jun tzo'n̈ xo eb' levita, atn Jozabad, yunnal Jesúa yet' Noadías yunnal Binuy.

³⁴ A 'a yic jun c'u cha, ata 'ix 'echtaxi, 'ix b'isx smasnil jun tzo'n̈ cha, tz'acn 'ix stz'ib'x smasnil 'a yun̈al.

³⁵ Ax qui masnil on̈ paxt 'a Babilonia cha, xcac' qui xajmb'al to tz'a smasnil 'a qui Diosalec: lajchwan̈ no quelm wacx xcac' cuj qui masnil an̈ israel on̈ tic, 96 no mam calnelu, 77 no quelm calnelu. 'Ix ca'n pax lajchwan̈ no mam chiwo xajmb'alil yic tz'ajx lajwc qui mul. Smasnil jun tzo'n̈ cha, 'ix cac' tz'a 'a yojltac Jehová.

³⁶ Xlajw cha, xca'n ch'an̈ scarta win rey 'a eb' gobernador yet' 'a eb' capitan̈ yaj 'a sc'axpil 'e't a Éufrates. Ax x'aji xcolwj eb' 'ayn̈ on̈, locn xo pax eb' scolwj quet' 'a yatut Dios.