Esdras 7 - Chuj San Sebastian Bible

'Ix c'och Esdras 'a Jerusalén

^1-5 A yic 'aych win Artajerjes reyl 'a Persia, a yic cha, ata 'ayc' jun win ya'mal 'och sti' eb' israel 'a Dios 'a Babilonia, tzcuch Esdras. Ax eb' smam yichm 'aj cotnc yin̈til, atn eb' tic: Seraía, Azarías, Hilcías, Salum, Sadoc, Ahitob, Amarías, Azarías, Meraiot, Zeraías, Uzi, Buqui, Abisúa, Finees, Eleazar, yet' Aarón, win b'ab'l ya'mal 'och sti eb' 'anma 'a Dios.

⁶ A Esdras tic paxncta 'a Babilonia cha. Caw cuywjum 'a sley Jehová, atn sDiosal chon̈b' Israel, atn jun ley ya'jnac Jehová 'a Moisés. Yujto 'ix colwj Jehová Dios yet'oc, yuj cha, xya'n win rey Artajerjes smasnil tas 'ix sc'ana.

⁷ A 'a yic yucl ab'il xo yoch Artajerjes reyal, 'ix jaw Esdras 'a Jerusalén yet' nan̈l eb' yit israelal, yet' eb' yit ya'mal 'och sti eb' 'anma 'a Dios, yet' jun tzo'n̈ xo eb' levita, eb' tzb'itni, eb' tan̈m puerta, yet' eb' tz'a'n cuenta yatut Dios.

^8-9 'Ix colwj Dios yet' winac, yuj cha, 'ix paxt 'a Babilonia 'a yic b'ab'l c'u yic b'ab'l 'uj yic yucl xo ab'il yoch Artajerjes reyal. 'Ix jaw 'a Jerusalén 'a b'ab'l c'u yic yol 'uj yoch yucl ab'il cha.

¹⁰ Yujto caw 'aych 'a snab'en Esdras scuyn sley Jehová, tzb'eylb'an paxi, tzcuyn pax eb' yit israelal 'a jun ley cha.

A ch'an̈ scarta win Artajerjes

¹¹ Atn scopiail ch'an̈ carta tic xyac' rey Artajerjes 'a Esdras, win ya'mal 'och sti eb' 'anma 'a Dios, to cuywnac 'a schecnb'il jun Dios 'ay yic satcha'an̈, atn cuynb'il 'ac'b'il 'a chon̈b' Israel:

¹² An Artajerjes in, syajlil eb' rey waji, an tzwac' stzatzl a c'ojl ach Esdras, ya'mal 'och sti eb' 'anma aji, cuywjum ach 'a sley Dios 'ay yic satcha'an̈.

¹³ Tox 'ix wal 'a smasnil eb' et chon̈b' 'ayc' 'a yol in macb'en tic, toq'ue tzyal sc'ojl eb' tz'at et' 'a Jerusalén: atn eb' ya'mal 'och sti eb' 'anma 'a e Diosal, yet' jun tzo'n̈ xo eb' levita.

¹⁴ Yujto an reyn tic yet' eb' ucwn̈ ya'mal 'och in nab'en, tzach ca't ela', chajtl wal yaj Judá yet' Jerusalén, tzam yiclx sley a Diosal 'aycn 'a yol a c'ab'.

¹⁵ A q'uen plata, yet' q'uen oro to tz'el 'a qui c'ojl ca'n 'ayach, 'ij 'at 'a e Diosal ax israel ex cha, atn jun 'ay yatut 'a Jerusalén.

¹⁶ Tze'n pax 'at smasnil q'uen plata, q'uen oro xa chaj 'a eb' 'anma 'a yol smacb'en Babilonia, yet' jantcn̈ej q'uen ofrenda tz'el 'a sc'ojl eb' ya'mal 'och sti eb' 'anma 'a Dios ya'ni, yet' yic jun tzo'n̈ xo eb' et chon̈ab', atn q'uen tzyac' eb' yuj yatut e Diosal 'a Jerusalén.

¹⁷ Tza ya'ilj a c'ann jun tzo'n̈ tumn cha, a yet' q'uen tza man no quelm wacax, no mam calnelu, no quelm calnelu, yet' jun tzo'n̈ tas tz'ajx yet' no xajmb'al-l, atn 'ixm trigo, cebada yet' yal uva. Tza'n 'ajxc xajmb'al-l 'a yib'n̈ yet'l 'a yatut e Diosal 'a Jerusalén cha.

¹⁸ Ax jantcto q'uen plata yet' q'uen oro tzcani, 'oj eyil tas 'aj tz'och yopiso eyu'uj, a tzyal 'ixta tz'el 'a sc'ojl e Diosal.

¹⁹ Ax pax smasnil jun tzo'n̈ yamc'ab' x'ajx 'ayach, yic tzc'anx 'a yatut a Diosal, ach wal caw tza'ch 'a yojltac a Diosal 'a Jerusalén cha.

²⁰ Tzann̈j junc xo tas to 'ay tz'och eyuj 'a yatut e Diosal cha, tztac' e c'ann 'elt stojl 'a win molm tumn yaj 'ayin.

²¹ An rey Artajerjes in, an tzwal ax e masnil ex molm tumn eyaj 'a sc'axpil 'ec' a Éufrates, 'a'c mu'c smasnil tas tzc'an Esdras ya'mal 'och sti eb' 'anma 'a sDiosal, to cuywjum 'a sley jun Dios 'ay yic satcha'an̈.

²² Tztac' eya'n junc 75 quintal q'uen plata 'a 'a, 'oxe ciente quintal trigo, nan̈lswacl ciente galón yal uva, nan̈l ciente galón aceite yet' smasnil 'atz'm tzc'ana.

²³ Smasnil tas tzc'an Dios 'ay yic satcha'an̈, yajn̈ej tzeya'n mu'c 'a yatut Dios cha, sec wach' matz cot yowl 'a wib'n̈ an reyn tic yet' eb' wunnal, yet' pax 'a yib'n̈ eb' 'anma 'ay 'a yol in macb'en.

²⁴ Tzeyojcan pax 'eli to matz tac' e c'ann jun tzo'n̈ tojlb'al yet' q'uen colwal tumn 'a eb' 'ay yopiso 'a yatut Dios cha: atn eb' ya'mal 'och sti eb' 'anma 'a Dios, yet' jun tzo'n̈ xo eb' levita, eb' tzb'itni, eb' tan̈m puerta, yet' eb' ya'mal cuenta yatut Dios cha.

²⁵ Ach xo tic Esdras, caw 'ay a jelnal 'ac'b'il yuj a Diosal, yuj cha, 'a'ch eb' juez yet' eb' gobernador, sec a eb' tzb'on yaj smasnil eb' chon̈b' 'ay 'a sc'axpil 'ec' a Éufrates. Tza sic' 'elt eb' yojc xo sley a Diosal cha, ax eb' mant 'ojtnacoc, tza cuy eb'.

²⁶ Tzann̈j mach matz yiclni sley a Diosal cha, yet' in ley an reyn tic, b'eyc'ojlaxc cab' muc'uc: tom tz'ajx chamoc, mto tz'ijx 'el 'a yol chon̈ab', mto tz'ijx 'ec' tas 'ay 'a a, mto tz'atcn 'a preso, xchi win rey 'a scarta cha.

A swach' paxti Esdras

²⁷ Yuj cha, xyaln Esdras 'ixtic: Alx cab' wach' paxti 'a Jehová qui Diosalec yet' eb' qui mam quichmec, yujto a 'ix 'a'n jawc 'a snab'en win rey, sec to niwn yel'ch yatut Jehová 'a Jerusalén.

²⁸ Yuj schamc'ojlal Jehová, yuj cha, wach'n 'a sat win rey, 'a sat eb' ya'mal 'och snab'en winac, yet' 'a sat smasnil eb' niwc yel'ch yopiso yet' win rey cha. Yuj scolwal Jehová qui Diosalec 'a wib'an̈, yuj cha, xin te'wtzan in b'a, 'ix wa'n syam sb'a smasnil eb' yajl yaj 'a yib'n̈ yin̈tl eb' wit israelal, sec tzmeltzj eb' wet'oc, xchi Esdras.